កាលពីថ្ងៃទី២៧ ខែតុលា ឆ្នាំ២០២៣ គម្រោងថ្មីមួយត្រូវបានដាក់អោយដំណើរការក្នុងគោលបំណងលើកកម្ពស់ភាពធន់នឹងការប្រែប្រួលអាកាសធាតុរបស់កសិករខ្នាតតូច និងសហគមន៍មូលដ្ឋានតាមរយៈការបង្កើនលទ្ធភាពរបស់ពួកគេក្នុងការទទួលបានទីផ្សារ។
គំនិតផ្តួចផ្តើមនៃភាពជាដៃគូរវាងរដ្ឋ សមាគមន៍ និងវិស័យឯកជនដើម្បីមានលក្ខណៈភាតរបរិស្ថាននិងជីវភាពប្រជាជនកម្ពុជាមានភាពធន់នៅខាងជើងបឹងទន្លេសាប (PEARL) នឹងផ្តល់ផលប្រយោជន៍ដល់ប្រជាជនកម្ពុជាប្រហែល៣% ដោយផ្តល់អត្ថប្រយោជន៍ផ្ទាល់ដល់កសិករចំនួន ៤៥០ ០០០នាក់ និងដោយប្រយោលដល់ ១ ០០០ ០០០នាក់ និងអ្នកពាក់ព័ន្ធផ្សេងទៀតនៅខាងជើងបឹងទន្លេសាប។
នៅខាងជើងបឹងទន្លេសាបគឺជាប្រព័ន្ធកសិកម្មដ៏សំខាន់បំផុតមួយសម្រាប់អាស៊ីអាគ្នេយ៍ និងប្រទេសកម្ពុជា ដែលកសិករភាគច្រើនដាំដំណាំ គ្រាប់ស្វាយចន្ទី ស្វាយ ស្រូវ និងបន្លែ។ តំបន់នេះរងការគំរាមកំហែងយ៉ាងខ្លាំងដោយសារការប្រែប្រួលអាកាសធាតុ។ សីតុណ្ហភាពបានកើនឡើង ០.៨C° ចាប់តាំងពីឆ្នាំ១៩៥០មក។ លើសពីនេះ ភ្លៀងធ្លាក់កាន់តែញឹកញាប់ ហើយរដូវវស្សាកាន់តែមានភាពមិនប្រាកដប្រជា។ ជាលទ្ធផល តំបន់នេះប្រឈមនឹងការគំរាមកំហែងនៃទឹកជំនន់ និងគ្រោះរាំងស្ងួត ដែលធ្វើឱ្យមនុស្ស១.៤៥ លាននាក់ប្រឈមនឹងហានិភ័យដោយផ្ទាល់ ឬដោយប្រយោល។
ឯកឧត្តម កែន សេរីរដ្ឋា អគ្គនាយកនៃអគ្គនាយកដ្ឋានចំណេះដឹង និងព័ត៌មាបរិស្ថាន បានលើកឡើងថា “គម្រោងនេះមានគោលបំណងការពារប្រជាជនដែលងាយរងគ្រោះបំផុតពីផលប៉ះពាល់នៃការប្រែប្រួលអាកាសធាតុ វិបត្តិសកលលោក និងដើម្បីធានាបាននូវភាពធន់នឹងអាកាសធាតុ និងការអភិវឌ្ឍន៍ប្រកបដោយចីរភាពនៃវិស័យកសិកម្ម។ គម្រោងនេះនឹងជំរុញការផ្សព្វផ្សាយការអនុវត្ត និងបច្ចេកវិទ្យាធន់នឹងអាកាសធាតុ ដែលនឹងគាំទ្រដល់ការកសាងសមត្ថភាពមូលដ្ឋាន ដើម្បីទ្រទ្រង់ជីវភាពរស់នៅរបស់ប្រជាជនរស់នៅតាមជនបទប្រកបដោយចីរភាព”។
ឯកឧត្តមបានបន្ថែមថា គម្រោង PEARL គឺស្របតាមយុទ្ធសាស្ត្រ និងផែនការរបស់រាជរដ្ឋាភិបាលកម្ពុជា ហើយជាពិសេស អាទិភាពដែលមានចែងក្នុងកម្មវិធីដែលបានកំណត់ដោយជាតិ និងផែនការបន្ស៊ាំជាតិ ដែលកំណត់គោលដៅធ្វើឱ្យប្រសើរឡើងនូវសមត្ថភាពបន្សាំ និងការកសាងភាពធន់របស់ប្រជាជនរស់នៅតាមជនបទ។
ឯកឧត្តម យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងជាប្រធានគណៈកម្មាធិការដឹកនាំគម្រោង PEARL បានគូសបញ្ជាក់ថា “អត្ថប្រយោជន៍នៃគម្រោងនេះគឺជួយពង្រីក និងបង្កើនការអនុវត្តបច្ចេកវិទ្យាដែលធន់នឹងអាកាសធាតុដោយកសិករខ្នាតតូចដែលងាយរងគ្រោះ។ គម្រោង PEARL នឹងបំពេញបន្ថែមកិច្ចខិតខំប្រឹងប្រែងដែលធ្វើឡើងដោយដៃគូអភិវឌ្ឍន៍ផ្សេងទៀតនៅខាងជើងបឹងទន្លេសាបដើម្បីកសាងភាពធន់នៃជីវភាពរស់នៅ កែលម្អលទ្ធភាពទទួលបានទីផ្សារ និងការពារអាកាសធាតុ ស្របតាមគោលនយោបាយ និងផែនការនៃវិស័យកសិកម្ម។
Rebekah Bell តំណាងអង្គការFAOប្រចាំកម្ពុជាបាននិយាយថា“គម្រោង Pearl គឺជាផ្លែផ្ការនៃភាពជាដៃគូជោគជ័យរវាងស្ថាប័នរដ្ឋាភិបាល ដៃគូអភិវឌ្ឍន៍ និងធនធានក្រោមការឧបត្ថម្ភរបស់រាជរដ្ឋាភិបាលកម្ពុជា។ ចំពោះទស្សនវិស័យសកលដ៏ទូលំទូលាយរបស់ខ្លួន គម្រោងនេះមានគោលបំណងផ្លាស់ប្តូរពីផលិតកម្មអាហារបែបធុរកិច្ច ឆ្ពោះទៅរកគំរូធុរកិច្ចកសិផលដែលធន់នឹងអាកាសធាតុ ស្របតាមការប្តេជ្ញាចិត្តរបស់កម្ពុជា”។ លោកស្រីបានបន្ថែមថា “ខ្ញុំរំពឹងថាកិច្ចពិភាក្សាថ្ងៃនេះនឹងបង្កើតភាពជាដៃគូឡើងវិញ និងការប្តេជ្ញាចិត្តក្នុងការរក្សាភាពធន់ និងជីវភាពរស់នៅប្រកបដោយនិរន្តរភាពសម្រាប់កសិករជំនាន់ក្រោយនៅជនបទនាពេលបច្ចុប្បន្ន និងអនាគត”។
គោលបំណងសំខាន់នៃសិក្ខាសាលានេះគឺដើម្បីធានាឱ្យមានការយល់ដឹងរួមអំពីគោលដៅ និងគោលបំណងគម្រោងទាំងមូល លទ្ធផលរំពឹងទុក និងលទ្ធផល សកម្មភាពសំខាន់ៗ និងការអនុវត្តក្នុងចំណោមភាគីពាក់ព័ន្ធ ដើម្បីទទួលបានធាតុចូលក្នុងការអនុវត្តផែនការ។ សិក្ខាសាលានេះក៏ជូនដំណឹងបន្ថែមដល់ភាគីពាក់ព័ន្ធជាមួយនឹងតម្រូវការនៃមូលនិធិអាកាសធាតុបៃតង ដែលបានផ្តល់ថវិការចំនួន ៣៦.២ លានដុល្លារសម្រាប់ការអនុវត្តគម្រោងរយៈពេល៦ឆ្នាំ ចាប់ពីខែមេសា ឆ្នាំ២០២៣ ដល់ខែមេសា ឆ្នាំ២០២៩។
គម្រោង PEARL ត្រូវបានដាក់អោយប្រើប្រាស់ដោយក្រសួងបរិស្ថាន និងក្រសួងកសិកម្ម រុក្ខាប្រមាញ់ និងនេសាទ ដែលមានការគំាទ្រពីអង្គការ FAO។ គម្រោងនេះនឹងត្រូដាក់អោយអនុវត្តនៅខេត្តឧត្តរមានជ័យ កំពង់ធំ ព្រះវិហារ និងខេត្តសៀមរាប។ FAO Cambodia