សហភាពអឺរ៉ុបបានសន្យាផ្តល់ជំនួយប្រមាណ ៦,៣៧៥ លានអឺរ៉ូ ដល់កម្ពុជា ដើម្បីគាំទ្រដល់កំណែទម្រង់ក្នុងវិស័យជលផល។
ព័ត៌មាននេះត្រូវបានផ្តល់ដោយលោក Igor Driesmansឯកអគ្គរដ្ឋទូតសហភាពអឺរ៉ុបប្រចាំកម្ពុជា ក្នុងជំនួបសម្តែងការគួរសម និងពិភាក្សាការងារជាមួយឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី៤ ខែធ្នូ ឆ្នាំ២០២៣ ដែលក្នុងអំឡុងពេលនោះ ភាគីទាំងពីរបានពិភាក្សាអំពីបញ្ហាជាច្រើន រួមទាំងការធ្វើកសិកម្ម និង នេសាទប្រកបដោយចីរភាព។
ជំនួយនេះនឹងត្រូវបានប្រើប្រាស់ដើម្បីគាំទ្រការកំណែទម្រង់លើផ្នែកសំខាន់ៗនៃវិស័យជលផល ដូចជាការត្រួតពិនិត្យ វាយតម្លៃ ការការពារព្រៃលិចទឹក ការអភិរក្សជលផលសមុទ្រ ការផ្ទេរជំនួយដល់សហគមន៍នេសាទ ការស្រាវជ្រាវ និងសុវត្ថិភាពចំណីអាហារ។
លោក Igor Driesmansបានលើកឡើងថា «ភាពជាដៃគូរបស់យើងលើវិស័យជលផលមានវិសាលភាពធំធេង និងរឹងមាំ ទោះបីជាមានបញ្ហាប្រឈមខ្លាំងក៏ដោយ។ យើងត្រៀមខ្លួនជាស្រេចក្នុងការគាំទ្របន្ថែមទៀតនូវវឌ្ឍនភាពក្នុងវិស័យសុវត្ថិភាពកសិផល ដើម្បីលើកកម្ពស់គុណភាពផលិតផលដែលផលិតដោយវិស័យឯកជន និងត្រូវបានទិញយកទៅប្រើប្រាស់ដោយប្រជាជនកម្ពុជាក្នុងប្រទេស ក៏ដូចជាគាំទ្រដល់គ្រឹះស្ថានកែច្នៃនៅកម្ពុជា ដើម្បីឆ្លើយតបទៅនឹងនិងតម្រូវការទីផ្សារក្នុងតំបន់ និងអន្តរជាតិ។ នេះអាចផ្តល់នូវឱកាសទីផ្សារថ្មីសម្រាប់ផលិតផលរបស់កម្ពុជា ក៏ដូចជាបង្កើតការងារ”។
លោកបានបន្តថា វិស័យកសិកម្ម រួមទាំងជលផល និងព្រៃឈើកំពុងប្រឈមនឹងបញ្ហាជាសាកល ដែលបន្តទាមទារភាពជាដៃគូរឹងមាំជាមួយអ្នកពាក់ព័ន្ធទាំងអស់ រួមទាំងសហភាពអឺរ៉ុបផងដែរ ដើម្បីកាត់បន្ថយ និងសម្របខ្លួនទៅនឹងផលប៉ះពាល់អវិជ្ជមាន រួមទាំងបំប្លែងឧបសគ្គទៅជាឱកាស។
លោកបានគូសបញ្ជាក់ថា សម្រាប់វិស័យជលផល ក្រសួងកសិកម្ម រុក្ខាប្រមាញ់ និងនេសាទ បានប្តេជ្ញាចិត្តក្នុងការជួយដល់ការអភិវឌ្ឍន៍វិស័យជលផលប្រកបដោយចីរភាពនៅគ្រប់ទីកន្លែង តាមរយៈខ្សែសង្វាក់តម្លៃដើម្បីជាប្រយោជន៍ដល់ប្រជានេសាទ កសិករវារីវប្បកម្ម និងសហគ្រិន ក៏ដូចជាអតិថិជន។
ឯកឧត្តម ឌិត ទីណា បានលើកឡើងផងដែរថា “យើងប្តេជ្ញាការពារ និងអភិរក្សជម្រកសត្វ និងធនធានរបស់យើង”។
ក្នុងឆ្នាំ២០១៩កម្មវិធី CAPFISH (១១២លានអឺរ៉ូ) ត្រូវបានដាក់អោយប្រើប្រាស់ដោយសហភាពអឺរ៉ុបក្នុងគោលបំណងគាំទ្រវិស័យជលផលនៅក្នុងប្រទេសដៃគូ រួមទាំងប្រទេសកម្ពុជា ដែលត្រូវបានអនុវត្តដោយរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ ដែលគាំទ្រសសរស្តម្ភទាំងអស់នៃយុទ្ធសាស្ត្រជាតិក្នុងវិស័យជលផលរហូតដល់ឆ្នាំ ២០២៥។AKP