ក្រសួងសេដ្ឋកិច្ច និង ហិរញ្ញវត្ថុបានស្នើសុំឱ្យមូលនិធិរូបិយវត្ថុអន្តរជាតិ (IMF ) ជួយពិនិត្យឡើងវិញ លើក្របខណ្ឌ និងយន្តការនៃការគ្រប់គ្រងបំណុលសាធារណៈប្រកបដោយនិរន្ដរភាពនៅកម្ពុជា។
ការស្នើសុំនេះធ្វើឡើងក្នុងជំនួបរវាងលោកអូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និង លោក Yasuhisa Ojima ប្រធានស្ថានតំណាងមូលនិធិរូបិយវត្ថុអន្តរជាតិប្រចាំកម្ពុជានៅទីស្តីការក្រសួងកាលពីថ្ងៃទី ០៩ សីហា ក្នុងឱកាសលោកចាកចេញពីកម្ពុជា បន្ទាប់ពីលោកបានបញ្ចប់ការងារអាណត្តិបួនឆ្នាំ។
លោក មាស សុខសេនសាន អ្នកនាំពាក្យក្រសួងសេដ្ឋកិច្ចនិងហិរញ្ញវត្ថុមានប្រសាសន៍ប្រាប់ខ្មែរថាមស៍ថា លោក Ojima និងជំរុញការឆ្លើយតបរបស់ IMF នៅក្នុងសំណើរថ្មីនេះដើម្បីផ្តល់ការគាំទ្របច្ចេកទេសបន្ថែមសម្រាប់កម្ពុជា។
លោកមានប្រសាសន៍ថា៖ « ការត្រួតពិនិត្យរបស់ IMF និងជួយដល់កិច្ចការខាងលើ ពិសេសជួយរក្សាវិស័យហិរញ្ញវត្ថុនៅកម្ពុជាឲ្យល្អប្រសើរ»។លោកមានប្រសាសន៍បន្ថែមថា IMF ក៏ជួយរដ្ឋាភិបាលលើកកម្ពស់គំរូការព្យាករណ៍កំណើនសេដ្ឋកិច្ចផងដែរ។
លោកបានគូសបញ្ជាក់បន្ថែមថា ស្ថាប័ន IMF បានជួយវិទ្យាស្ថានជាតិស្ថិតិ (NIS) នៃក្រសួងផែនការក្នុងរៀបចំផលិតផលក្នុងស្រុកសរុប (GDP) របស់កម្ពុជាជាមួយនឹងឆ្នាំមូលដ្ឋានថ្មី និងស្ថិតិថវិការបស់រដ្ឋាភិបាល បន្ថែមពីលើជំនួយបច្ចេកទេសក្នុងការត្រួតពិនិត្យច្បាប់គយ និងការអភិវឌ្ឍន៍កម្មវិធីពង្រឹងសមត្ថភាពមន្ត្រី និងស្ថាប័នផងដែរ។
លោកមានប្រសាសន៍ថា IMF ក៏បានជួយដល់ធានាសុវត្ថិភាពវិស័យហិរញ្ញវត្ថុពិភពលោកតាមរយៈធនធានរបស់ខ្លួនក្នុងការជួយដល់ប្រព័ន្ឋហិរញ្ញវត្ថុឲ្យកាន់តែប្រសើរឡើងដែលចាត់ទុកប្រទេសកម្ពុជាជាប្រទេសដែលមាន ហានិភ័យទាបទាក់ទងនឹងការគ្រប់គ្រងបំណុល។
លោកមានប្រសាសន៍ថា៖ « ជំនួយរបស់ពួកគេនឹងពង្រឹងការគ្រប់គ្រងបំណុលរបស់យើង»។ លោកបន្ថែមថា រដ្ឋាភិបាលមានបំណុលសាធារណៈសរុបចំនួន ១០,២៧ ពាន់លានដុល្លារគិតត្រឹមត្រីមាសទីមួយនៃឆ្នាំនេះ។
លោក ជា វុទ្ធី អគ្គលេខាធិការរងនៃក្រុមប្រឹក្សាអភិវឌ្ឍន៍កម្ពុជា CDC មានប្រសាសន៍ថា ការព្យាករណ៍របស់ IMFនៃ កំណើន GDPរបស់កម្ពុជាសម្រាប់ឆ្នាំ ២០២៣ គឺខ្ពស់បើប្រៀបធៀបនឹងការព្យាករណ៍ផ្សេងៗដោយក្រសួងសេដ្ឋកិច្ច ធនាគារអភិវឌ្ឍន៍អាស៊ី (ADB) និងធនាគារពិភពលោក (WB)។
លោកមានប្រសាសន៍ថា IMF បានព្យាករណ៍ថា សេដ្ឋកិច្ចកម្ពុជានឹងលូតលាស់ក្នុងអត្រា ៥,៨ភាគរយនៅឆ្នាំនេះដែលតាមពីក្រោយដោយក្រសួងសេដ្ឋកិច្ចដែលបានព្យាករណ៍ថាសេដ្ឋកិច្ចនិងលូតលាស់ក្នុងអត្រា ៥,៦ ភាគរយ ADB និង WB បានព្យាករណ៍ដូចគ្នាក្នុងអត្រា ៥,៥ ភាគរយ ដែលបានត្រលប់មកវិញជាបន្តបន្ទាប់ពី ៣ភាគរយក្នុងឆ្នាំ ២០២១ និង ៥,២ ភាគរយនៅឆ្នាំ ២០២២ និងដក៣,១ភាគរយ
ក្នុងឆ្នាំ ២០២០។
លោកមានប្រសាសន៍ថា៖ « ទាំងអស់នេះឆ្លើយតបថាប្រទេសយើងមានឥទ្ឋិពលក្នុងកំណើនសេដ្ឋកិច្ច និង បង្កើនប្រាក់ចំណូល ខណៈដែលអតិផរណាគឺនូវកម្រិតអាចគ្រប់គ្រងបានដែលបានទាក់ទាញវិនិយោគិនចូលក្នុងប្រទេសយើង ខណៈដែលការគ្រប់គ្រប់ម៉ាក្រូសេដ្ឋកិច្ចគឺមានសារៈសំខាន់ណាស់សម្រាប់វិនិយោគិនក្នុងការសម្លឹងមើល ហើយពួកយើងមិននិយាយទេ ប៉ុន្តែស្ថាប័នអន្តរជាតិធ្វើវា»។
លោកមានប្រសាសន៍បន្ថែមថា៖ « យ៉ាងណាក៏ដោយ ខ្ញុំជឿជាក់ថា វិស័យនេះ ដឹងយ៉ាងច្បាស់ថាតើសេដ្ឋកិច្ចរបស់យើងមានសុខភាពល្អប៉ុណ្ណា ខណៈដែលអ្នកជំនួញជាអ្នកធ្វើ។ ដូច្នេះហើយការព្យាការណ៍គឺមិនសំខាន់ ប៉ុន្តែចំណុចសំខាន់គឺថាប្រសិនបើអ្នកជំនួញគិតថាល្អ ហើយពួកគេសប្បាយចិត្តនិងញញឹមធ្វើវា ។ ពួកយើងនិង ប្រជាជននឹងបង្ហាញពីក្តីសង្ឃឹមយ៉ាងជឿជាក់»៕ ប្រែសម្រួលដោយ៖ សុ ជាតា