សមាគមធនាគារនៅកម្ពុជា(ABC) បានប្តេជ្ញាបង្កើនការប្រើប្រាស់ប្រាក់រៀលតាមរយៈប្រតិបត្តិការរបស់សមាជិករបស់ខ្លួន ខណៈដែលបច្ចុប្បន្នរូបិយប័ណ្ណក្នុងស្រុកកំពុងទទួលបានប្រជាប្រិយភាពកាន់តែខ្លាំងឡើងក្នុងប្រតិបត្តិការជាសាច់ប្រាក់ និងឌីជីថល។
យោងតាមលោក រ័ត្ន សោភ័ណ្ឌ ប្រធាន ABC គិតមកដល់បច្ចុប្បន្ន ប្រាក់កម្ចីប្រាក់រៀលក្នុងវិស័យធនាគារមានចំនួន១១ ភាគរយនៃប្រាក់កម្ចីសរុប ខណៈដែលបញ្ញើជាប្រាក់រៀលមានការកើនឡើងគួរឱ្យកត់សម្គាល់បើធៀបនឹងរយៈពេល១០ឆ្នាំចុងក្រោយនេះ។
លោកបានលើកឡើងនៅក្នុងសន្និសីទសារព័ត៌មានកាលពីម្សិលមិញថា “ប្រព័ន្ធទូទាត់បាគងរបស់ធនាគារជាតិនៃកម្ពុជា (NBC) និងប្រព័ន្ធទូទាត់ឌីជីថលផ្សេងទៀតបានរួមចំណែកធ្វើឱ្យប្រជាជនមានភាពងាយស្រួលក្នុងការប្រើប្រាស់ប្រាក់រៀល”។
លោកបន្តថា សមាជិករបស់ ABC នឹងបន្តពង្រឹងប្រព័ន្ធទូទាត់ប្រាក់រៀលតាមប្រព័ន្ធឌីជីថល ដើម្បីសម្រួលដល់ប្រតិបត្តិការបន្ថែមទៀត។
របាយការណ៍របស់ ABC បានបង្ហាញថា នៅចុងឆ្នាំ២០២៣ ប្រាក់កម្ចីដែលផ្តល់ដោយស្ថាប័នហិរញ្ញវត្ថុបានកើនឡើងដល់ ៥៧,៦ ពាន់លានដុល្លារ ឬ ១៨០ ភាគរយនៃផលិតផលក្នុងស្រុកសរុបក្នុងប្រទេសកម្ពុជា តាមរយៈគណនីសរុបចំនួន ៣,៨ លានគណនី ខណៈដែលប្រាក់បញ្ញើមានចំនួន ៤៧,៩ ពាន់លានដុល្លារ តាមរយៈគណនីចំនួន ១៨,៦ លានគណនី។
ជាមួយនឹងយន្តការបដិដុល្លារូបនីយកម្មដោយផ្អែកទីផ្សារ ធនាគារជាតិនៃកម្ពុជាបានអនុវត្តគោលនយោបាយផ្សេងៗដើម្បីលើកកម្ពស់ប្រាក់រៀល។
ធនាគារជាតិក៏បានជំរុញឱ្យប្រជាពលរដ្ឋប្រើប្រាស់ប្រាក់រៀលបន្ថែមទៀតក្នុងប្រតិបត្តិការប្រចាំថ្ងៃរបស់ពួកគេ ដោយកត់សម្គាល់ថាប្រព័ន្ធទូទាត់ឌីជីថលបានធ្វើឱ្យចរាចររូបិយប័ណ្ណក្នុងស្រុកមានភាពងាយស្រួល។
លោកស្រី ជា សិរី ទេសាភិបាលធនាគារជាតិនៃកម្ពុជា បាននិយាយកាលពីខែមីនាថា សន្តិភាព និងស្ថិរភាពនយោបាយនៅក្នុងប្រទេសបានធ្វើឱ្យសាធារណជនមានទំនុកចិត្តលើប្រាក់រៀល។
លោកស្រីបានកត់សម្គាល់ថា ការទូទាត់តាមប្រព័ន្ធឌីជីថល ជាពិសេសការទូទាត់តាមរយៈប្រព័ន្ធបាគង បានជំរុញយន្តការទូទាត់អោយកាន់តែមានភាពរីកចម្រើន ទំនើប លឿន និងចំណាយតិច។
ទន្ទឹមនឹងនោះ ប្រធាន ABC បានអំពាវនាវឱ្យប្រជាពលរដ្ឋបង្កើនការប្រើប្រាស់ប្រាក់រៀលក្នុងសេដ្ឋកិច្ចជាតិ ដោយលោកបានបន្ថែមថា នេះអាចពង្រឹងអធិបតេយ្យភាព និងកំណើនសេដ្ឋកិច្ច អត្តសញ្ញាណជាតិ និងសាមគ្គីភាព។
លោកបានបន្ថែមថា “ដើម្បីលើកកម្ពស់ការប្រើប្រាស់ប្រាក់រៀលឱ្យកាន់តែទូលំទូលាយ ការចូលរួមរបស់អ្នកពាក់ព័ន្ធទាំងអស់ក្នុងការផ្លាស់ប្តូរការប្រើប្រាស់ប្រាក់ដុល្លារទៅជាការប្រើប្រាស់រូបិយប័ណ្ណជាតិគឺជាការចាំបាច់។
នៅឆ្នាំ២០២៣ ចំនួនគណនីកាបូបអេឡិចត្រូនិកបានកើនឡើងដល់ ១៩,៧ លាន ហើយចំនួនប្រតិបត្តិការសរុបបានកើនឡើងដល់ ៦០១,៣ លានដង ដែលកើនឡើង ២៨,៧ ភាគរយ នេះបើយោងតាមរបាយការណ៍របស់ធនាគារជាតិនៃកម្ពុជា។