ឯកឧត្តមបណ្ឌិត នាយករដ្ឋមន្ត្រី ហ៊ុន ម៉ាណែត កាលពីថ្ងៃពុធ បានបញ្ជាក់ពីការចូលរួមក្នុងកិច្ចប្រជុំកំពូលរំលឹកខួបអនុស្សាវរីយ៍អាស៊ាន-ជប៉ុន នៅប្រទេសជប៉ុន នៅក្នុងខែធ្នូ។
ឯកឧត្តមបណ្ឌិត បានធ្វើការបញ្ជាក់ក្នុងសុន្ទរកថាជាសាធារណៈរបស់លោកក្នុងពិធីសម្ពោធកំណាត់ផ្លូវជាតិលេខ៥ ពីព្រែកក្តាម ខេត្តកណ្ដាល ទៅក្រុងបាត់ដំបងប្រវែង ២៤៦,១៥ គីឡូម៉ែត្រ។
ឯកឧត្តមបណ្ឌិត បានគូសបញ្ជាក់យ៉ាងដូច្នេះថា «ក្នុងអំឡុងពេលនៃដំណើរទស្សនកិច្ចរបស់ខ្ញុំទៅកាន់ប្រទេសជប៉ុនសម្រាប់កិច្ចប្រជុំកំពូលរំលឹកខួបអនុស្សាវរីយ៍អាស៊ាន-ជប៉ុនក្នុងខែធ្នូ ខ្ញុំគ្រោងនឹងមានកិច្ចពិភាក្សាទ្វេភាគី ដើម្បីពង្រឹងកិច្ចសហប្រតិបត្តិការទ្វេភាគីក្នុងក្របខ័ណ្ឌនៃភាពជាដៃគូយុទ្ធសាស្ត្រគ្រប់ជ្រុងជ្រោយ»។
កិច្ចប្រជុំកំពូលរំលឹកខួបអនុស្សាវរីយ៍អាស៊ាន-ជប៉ុន ត្រូវបានគេរំពឹងថានឹងប្រព្រឹត្តទៅចាប់ពីថ្ងៃទី ១៦-១៨ ខែធ្នូ នៅទីក្រុងតូក្យូ ដើម្បីប្រារព្ធខួបអនុស្សាវរីយ៍លើកទី៥០ នៃមិត្តភាព និងសហប្រតិបត្តិការអាស៊ាន-ជប៉ុន។ កិច្ចប្រជុំកំពូលនេះនឹងដាក់ចេញនូវចក្ខុវិស័យថ្មីមួយ ដើម្បីពង្រឹងទំនាក់ទំនងរវាងអាស៊ាន និងជប៉ុន។
AKP