ព្រះមហាក្សត្រ នរោត្តម សីហមុនី បានមានបន្ទូលបំផុសស្មារតីប្រជាពលរដ្ឋ ជាពិសេសយុវជនចូលរួមលើកស្ទួយតម្លៃមរតកវប្បធម៌ជាតិ និងការថែរក្សាការពារអត្តសញ្ញាណជាតិបានស្ថិតស្ថេរគង់វង្ស។
ព្រះមហាក្សត្របានចេញព្រះរាជសារចុះថ្ងៃទី២៤ ខែកុម្ភៈ ដើម្បីអបអរសាទរទិវាវប្បធម៌ជាតិ៣មីនា លើកទី២៦សម្រាប់ឆ្នាំ២០២៤ ដែលជាទិវាដ៏មានសារៈសំខាន់ក្នុងការចូលរួមបំផុសស្មារតីប្រជាពលរដ្ឋ ជាពិសេសយុវជនស្រឡាញ់វប្បធម៌ជាតិ ទំនៀមទម្លាប់ ប្រពៃណី និងមនសិការស្នេហាជាតិ។
ព្រះអង្គមានបន្ទូលបន្តថា ទិវានេះប្រារព្ធធ្វើឡើងក្នុងគោលបំណងរំលឹកដល់គុណូបការៈចំពោះបុព្វបុរសខ្មែរគ្រប់ជំនាន់ដែលបានពលីកម្លាំងកាយ កម្លាំងចិត្ត បញ្ញាញាណ និងជីវិតក្នុងការបង្កើតសម្បត្តិវប្បធម៌ដ៏សម្បូរបែបសម្រាប់កូនចៅខ្មែរជំនាន់ក្រោយ។
ព្រះអង្គបន្ថែមថា៖ «ទិវានេះបំផុសស្មារតីស្រឡាញ់វប្បធម៌ជាតិ ទំនៀមទម្លាប់ ប្រពៃណី និងមនសិការស្នេហាជាតិក្នុងការចូលរួមលើកស្ទួយតម្លៃមរតកវប្បធម៌ជាតិ និងថែរក្សាការពារអត្តសញ្ញាណជាតិ មាតុភូមិស្ថិតស្ថេរគង់វង្សជារៀងរហូត»។
លោកនាយករដ្ឋមន្ត្រី ហ៊ុន ម៉ាណែត កាលពីសប្ដាហ៍មុនបានចេញសារាចររៀបចំទិវាវប្បធម៌ជាតិសម្រាប់ឆ្នាំ២០២៤ ក្រោមប្រធានបទ «យុវជនដើម្បីវប្បធម៌» ដើម្បីជំរុញពលរដ្ឋខ្មែរទាំងក្នុងនិងក្រៅប្រទេស ជាពិសេសយុវជនបន្តវេនចូលរួមក្នុងសកម្មភាពវប្បធម៌ជាតិកាន់តែច្រើន។
លោកបានជំរុញពួកគេចូលរួមលើកកម្ពស់ស្មារតីមោទនភាពជាតិ មនសិការស្នេហាជាតិ ភាពជាម្ចាស់កេរដំណែលវប្បធម៌ និងភាពជាពលរដ្ឋក្នុងសង្គមដែលមានអារ្យធម៌ខ្ពស់។
លោកថា៖ «ការជំរុញពួកគេបំផុសប្រជាជនខ្មែរចូលរួមសកម្មភាពវប្បធម៌ជាតិ គឺជាកម្លាំងចលករក្នុងកិច្ចអភិរក្ស លើកស្ទួយ និងអភិវឌ្ឍវប្បធម៌ជាតិ រួមទាំងវប្បធម៌ចម្រុះរបស់សហគមន៍ជនជាតិដើមភាគតិចនៅកម្ពុជាបានស្ថិតស្ថេរគង់វង្ស»។
លោកបានលើកទឹកចិត្តដល់ស្មារតីសហគ្រិនភាពនិងការបង្កើតការងារផ្នែកសិល្បៈវប្បធម៌នៅក្នុងចំណោមយុវជនកម្ពុជាគាំទ្រដល់ការអភិវឌ្ឍឧស្សាហកម្មវប្បធម៌និងច្នៃប្រឌិត ដែលជាសក្តានុពលមួយនៃប្រភពកំណើនសេដ្ឋកិច្ច ជាពិសេសតាមរយៈការផ្ដល់ឱកាសសម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យបានទទួលការបណ្ដុះបណ្តាលជំនាញវិជ្ជាជីវៈមរតដូនតា (ចម្លាក់ ស្មិត ស្មូន គំនូរ និងតម្បាញជាដើម) ដើម្បីធានាការផ្ទេរចំណេះដឹងនិងជំនាញប្រពៃណីដល់យុវជនជំនាន់ក្រោយ។
ជាមួយគ្នានេះលោកនាយករដ្ឋមន្ត្រី ហ៊ុន ម៉ាណែត បានណែនាំក្រសួងស្ថាប័នថ្នាក់ជាតិនិងក្រោមជាតិរួមគ្នារៀបចំទិវាវប្បធម៌ជាតិចាប់ពីខែមីនាដល់ពេលចូលឆ្នាំថ្មីប្រពៃណីខ្មែរ ដើម្បីលើកកម្ពស់តម្លៃវប្បធម៌ខ្មែរ។
នៅក្នុងនោះលោកបានណែនាំក្រសួងវប្បធម៌និងវិចិត្រសិល្បៈជំរុញអង្គភាពក្រោមឱវាទរៀបចំផ្សព្វផ្សាយសមិទ្ធផលការងារសំខាន់ៗពាក់ព័ន្ធនឹងការអភិរក្ស ការលើកស្ទួយ និងការអភិវឌ្ឍប្រកបដោយចីរភាពនៅតំបន់បេតិកភណ្ឌពិភពលោក រមណីយដ្ឋានវប្បធម៌ ដើម្បីអបអរសាទរទិវាវប្បធម៌ជាតិ។
លោកបានជំរុញក្រសួងស្ថាប័នពាក់ព័ន្ធផ្សេងទៀតចូលរួមផ្សព្វផ្សាយវប្បធម៌ជាតិ និងខ្លឹមសារទិវាវប្បធម៌ជាតិ ព្រមទាំងធ្វើសកម្មភាពបង្ហាញការប្រតិបត្តិប្រពៃណី ទំនៀមទម្លាប់ និងវប្បធម៌ជាតិនៅតាមគ្រឹះស្ថានសិក្សា វត្តអារាម រោងចក្រ សហគ្រាស និងនៅតាមសហគមន៍ជាដើម។ ចំណែកក្រសួងមហាផ្ទៃនិងក្រសួងការពារជាតិត្រូវចាត់ចែងកម្លាំងអង្គភាពមូលដ្ឋាន ដើម្បីរក្សាសន្តិសុខនិងសណ្ដាប់ធ្នាប់សាធារណៈក្នុងកំលុងពេលប្រារព្ធទិវាវប្បធម៌ជាតិ។
លោក ហ៊ុន ម៉ាណែត បានមានប្រសាសន៍ថា រដ្ឋបាលរាជធានីខេត្តត្រូវចូលរួមជួយឧបត្ថម្ភគាំទ្រមន្ទីរវប្បធម៌ និងវិចិត្រសិល្បៈអាចរៀបចំកម្មវិធីនិងសកម្មភាពផ្សព្វផ្សាយវប្បធម៌នៅក្នុងដែនដីរបស់ខ្លួនដោយផ្ដោតសំខាន់លើការអប់រំមហាជនចូលរួមថែរក្សា ការពារ លើកស្ទួយ អភិវឌ្ឍវប្បធម៌ជាតិ។
លោកបានបញ្ជាក់ថា៖ «អ្នកចូលរួមកម្មវិធីនិងសកម្មភាពផ្សព្វផ្សាយដែលពាក់ព័ន្ធនឹងព្រឹត្តិការណ៍ទិវាវប្បធម៌ជាតិត្រូវស្លៀកពាក់សមរម្យតាមបែបប្រពៃណីជាតិ»។
នៅក្នុងសន្នីសីទសារព័ត៌មានស្ដីពីការរៀបចំទិវាវប្បធម៌ជាតិពីម្សិលមិញ លោក ហាប់ ទូច រដ្ឋលេខាធិការប្រចាំការក្រសួងវប្បធម៌និងវិចិត្រសិល្បៈ បានថ្លែងថា ក្រសួងបានត្រៀមប្រារព្ធទិវាវប្បធម៌ជាតិទ្រង់ទ្រាយធំនៅថ្ងៃទី៧ ខែមីនា នៅមជ្ឈមណ្ឌលកោះពេជ្រ ដែលនឹងមានអ្នកចូលរួមប្រមាណ ៤ ០០០នាក់។
លោកថា លោកនាយករដ្ឋមន្ត្រី ហ៊ុន ម៉ាណែត និងភរិយារបស់លោកនឹងអញ្ជើញជាអធិបតីនៅក្នុងពិធីនោះ។
លោកបានពន្យល់ថា ចំពោះការជ្រើសរើសប្រធានបទ «យុវជនដើម្បីវប្បធម៌ជាតិ» សម្រាប់ទិវាវប្បធម៌ជាតិឆ្នាំនេះ ដោយសារតែយុវជនជាកម្លាំងចលករដ៏ខ្លាំងក្លាសម្រាប់ការទ្រទ្រង់វប្បធម៌ជាតិឱ្យរីកចម្រើនទៅមុខ។
លោកបាននិយាយថា៖ «បច្ចុប្បន្នយុវជនដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ច រួមចំណែកនៅក្នុងវិស័យវប្បធម៌ យុវជនក៏ចូលរួមច្រើនដែរ»៕