កម្ពុជាបានបញ្ជាក់ជាថ្មីពីការគាំទ្រដល់សមាជិកភាពរបស់ទីម័រខាងកើតក្នុងក្របខណ្ឌអាស៊ាន និងអង្គការពាណិជ្ជកម្មពិភពលោក ក៏ដូចជាក្នុងនិម្មាបនកម្មតំបន់ និងសកលដ៏ទៃទៀត។
ជំហរនេះ ត្រូវបានលើកឡើងដោយឯកឧត្តមបណ្ឌិត ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ខណៈដែលលោក Francisco Kalbuadi Lay ឧបនាយករដ្ឋមន្ត្រី រដ្ឋមន្ត្រីសម្របសម្រួលកិច្ចការសេដ្ឋកិច្ច និងជារដ្ឋមន្ត្រីក្រសួងទេសចរណ៍ និងបរិស្ថាននៃប្រទេសទីម័រខាងកើត បានចូលជួបសម្តែងការគួរសម និងពិភាក្សាការងារនៅវិមានសន្តិភាពកាលពីថ្ងៃចន្ទ។
ឯកឧត្តមបណ្ឌិត ហ៊ុន ម៉ាណែត ក៏បានលើកឡើងផងដែរអំពីទំនាក់ទំនងការទូតជាប្រវត្តិសាស្ត្ររវាងប្រទេសទាំងពីរ ដែលបានចាប់ផ្តើមនាឆ្នាំ ២០០២ និងបានសម្រេចជាផ្លែផ្កាគួរអោយកត់សម្គាល់ ជាពិសេសក្នុងអំឡុងពេលដែលកម្ពុជាធ្វើជាប្រធានអាស៊ាននៅឆ្នាំ ២០២២។
ឯកឧត្តមបណ្ឌិត ហ៊ុន ម៉ាណែត ក៏បានថ្លែងអំណរគុណដល់សមភាគីទីម័រដែលបានផ្ញើរសារអបអរសាទរក្នុងឱកាសដែលឯកឧត្តមបណ្ឌិតត្រូវបានជ្រើសតាំងជានាយករដ្ឋមន្ត្រីកម្ពុជា ហើយសង្ឃឹមថានឹងបានជួបលោកផ្ទាល់នៅក្នុងកិច្ចប្រជុំកំពូលអាស៊ាន នៅទីក្រុងហ្សាកាតា ប្រទេសឥណ្ឌូនេស៊ីនាពេលខាងមុខ។
លោក Kalbuadi Lay បានថ្លែងអំណរគុណចំពោះកម្ពុជានូវជំនួយ និងការគាំទ្រ ដោយអាស៊ានបានយល់ព្រមជាគោលការណ៍ក្នុងការទទួលទីម័រខាងកើតជាសមាជិកទី ១១ របស់អាស៊ាន និងបានផ្តល់ឋានៈជាអ្នកសង្កេតការណ៍។
តាងនាមអោយប្រជាជន និងរដ្ឋាភិបាលទីម័រខាងកើត លោក Kalbuadi Lay បានអញ្ជើញឯកឧត្តមបណ្ឌិត ហ៊ុន ម៉ាណែត ទៅបំពេញទស្សនកិច្ចនៅប្រទេសទីម័រខាងកើត តាមពេលវេលាសមស្រប។
លោក Kalbuadi Lay បានមកបំពេញទស្សនកិច្ចនៅកម្ពុជាពីថ្ងៃទី២៨ ដល់ថ្ងៃទី២៩ ខែសីហា ឆ្នាំ២០២៣។ C. Nika – AKP