ក្រុមហ៊ុនអាកាសចរណ៍ Emiratesនឹងចាប់ផ្តើមបើកជើងហោះហើរប្រចាំថ្ងៃរបស់ខ្លួនទៅកាន់ទីក្រុងភ្នំពេញឡើងវិញចាប់ពីថ្ងៃទី១ ខែឧសភា ដោយឆ្លងកាត់ប្រទេសសិង្ហបុរី ដែលនេះនឹងជំរុញការតភ្ជាប់ពីតំបន់អាស៊ីអាគ្នេយ៍ទៅ និងមកពីទីក្រុងឌូបៃ ព្រមទាំងភ្ជាប់មជ្ឈមណ្ឌលពាណិជ្ជកម្ម និងកន្លែងកម្សាន្តចំនួនពីរនៅក្នុងតំបន់។
Adnan Kazim អនុប្រធានក្រុមហ៊ុន Emirates និងជាប្រធានផ្នែកពាណិជ្ជកម្ម បានលើកឡើងថា “ការបើកជើងហោះហើរទៅទីក្រុងភ្នំពេញឡើងវិញបង្ហាញពីការប្តេជ្ញាចិត្តរបស់យើងក្នុងការពង្រឹងបណ្តាញនៅតំបន់អាស៊ីអាគ្នេយ៍ខណៈដែលយើងបន្តបង្កើតឱកាសកាន់តែច្រើនសម្រាប់អ្នកធ្វើដំណើរកម្សាន្តនៅតាមទីតាំងដ៍សម្បូរបែប និងជួយអាជីវកម្ម និងអ្នកនាំចេញពង្រឹងទំនាក់ទំនងពាណិជ្ជកម្មកាន់តែរឹងមាំ” ។
យន្តហោះ Boeing 777-300ER មានបីថ្នាក់នឹងត្រូវដាក់អោយដំណើរការ។ ជើងហោះហើរ EK348 របស់ Emirates នឹងចាកចេញពីទីក្រុងឌូបៃនៅម៉ោង ២៖៣០នាទី ហើយមកដល់សិង្ហបុរីនៅម៉ោង ១៤៖០៥នាទី។
បន្ទាប់មកជើងហោះហើរនឹងចាកចេញពីសិង្ហបុរីនៅម៉ោង ១៥៖៣៥ នាទី ហើយមកដល់ភ្នំពេញនៅម៉ោង ១៦៖៣៥។ ជើងហោះហើរ EK349 នឹងចាកចេញពីទីក្រុងភ្នំពេញនៅម៉ោង ២០៖៥០នាទីហើយទៅដល់សិង្ហបុរីនៅម៉ោង២៣៖៥០នាទី។
បន្ទាប់មកជើងហោះហើរនឹងចាកចេញពីសិង្ហបុរីនៅម៉ោង ០១៖៤០ នៅថ្ងៃបន្ទាប់ ហើយមកដល់ទីក្រុងឌូបៃនៅម៉ោង ០៤៖៥៥នាទី ម៉ោងក្នុងស្រុក។
ការតរភ្ជាប់ទីក្រុងភ្នំពេញជាមួយសិង្ហបុរីគឺផ្តល់ភាពងាយស្រួល ដោយផ្តល់នូវឱកាសតភ្ជាប់ដ៏ល្អប្រសើរទៅកាន់ និងមកពីទីក្រុងជាច្រើនក្នុងប្រទេសបារាំង ចក្រភពអង់គ្លេស អាល្លឺម៉ង់ ស្វីស និងសហរដ្ឋអាមេរិក។ តាមរយៈការតភ្ជាប់បន្ថែមនេះ Emirates នឹងមានជើងហោះហើរប្រចាំថ្ងៃចំនួន៤ដង ដែលនឹងចាប់ផ្តើមពីថ្ងៃទី១ ខែឧសភា។
Emirates SkyCargoក៏នឹងផ្តល់សមត្ថភាពផ្ទុកទំនិញលើយន្តហោះ Boeing 777-300ER ជាង៣០០ តោនក្នុងមួយសប្តាហ៍។
ទំនិញសំខាន់ៗដែលនាំចេញពីទីក្រុងភ្នំពេញរួមមាន វាយនភណ្ឌ ឱសថ និងទំនិញមានតម្លៃខ្ពស់ផ្សេងទៀត។
ក្រុមហ៊ុន Emirates បានដាក់ដំណើរការជើងហោះហើររបស់ខ្លួនមកទីក្រុងភ្នំពេញតាំងពីខែកក្កដា ឆ្នាំ២០១៧ មុនពេលដែលផ្អាកដំណើរការនៅឆ្នាំ២០២១ ដែលបណ្តាលមកពីជំងឺរាតត្បាតកូវីដ-១៩ ដែលធ្វើអោយប៉ះពាល់យ៉ាងខ្លាំងដល់តម្រូវការធ្វើដំណើរតាមផ្លូវអាកាស។
ទីក្រុងភ្នំពេញ គឺជាទីក្រុងធំជាងគេ និងកំពុងអភិវឌ្ឍន៍លឿនបំផុតរបស់កម្ពុជាសម្រាប់ទេសចរណ៍ និងពាណិជ្ជកម្ម ដែលផ្តល់ភាពទាក់ទាញយ៉ាងខ្លាំងសម្រាប់អ្នកធ្វើដំណើរមកពីអឺរ៉ុប និងអាមេរិក។
ការបើកជើងហោះហើរឡើងវិញត្រូវបានធ្វើឡើងចំពេលកម្ពុជា និងអារ៉ាប់រួម (UAE) ប្ដេជ្ញាចិត្តលើកកម្ពស់ទំនាក់ទំនងពាណិជ្ជកម្ម និងសេដ្ឋកិច្ច។
កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយកម្ពុជា-អារ៉ាប់រួមត្រូវបានដាក់ឱ្យចូលជាធរមាននៅថ្ងៃទី៣១ ខែមករា ឆ្នាំ២០២៤ បន្ទាប់ពីប្រទេសទាំងពីរបានបញ្ចប់កិច្ចពិភាក្សាស្តីពីការបង្កើតកិច្ចព្រមព្រៀងនៅខែមិថុនា ឆ្នាំ២០២៣។
យោងតាមក្រសួងពាណិជ្ជកម្ម ពាណិជ្ជកម្មរវាងកម្ពុជា និងអារ៉ាប់រួមឈានដល់ ១៥១ លានដុល្លារក្នុងឆ្នាំ ២០២១ ពោលគឺកើនឡើង ៥៣ ភាគរយពីឆ្នាំ ២០២០។
មុខទំនិញសំខាន់ៗដែលបាននាំចូល និងនាំចេញរវាងប្រទេសទាំងពីរ រួមមាន សម្លៀកបំពាក់ ស្បែកជើង កង់ ទំនិញធ្វើដំណើរ ថ្នាំជក់ អង្ករ គ្រឿងអគ្គិសនី គ្រឿងបន្លាស់រថយន្ត កៅស៊ូអាផាត ស្ករមើម ចំណីសត្វ ប្លាស្ទិក យានជំនិះ និងក្រដាស។