រដ្ឋាភិបាលតាមរយៈក្រសួងរៀបចំដែនដី នគរូបនីយកម្ម និងសំណង់ គ្រោងដាក់ឱ្យប្រើប្រាស់ច្បាប់ភូមិបាល (ថ្មី) ដែលបង្កើតថ្មីជំនួសឱ្យច្បាប់ភូមិបាលចាស់ដែលប្រើប្រាស់តាំងពីឆ្នាំ២០០១ ដើម្បីស្របទៅតាមការវិវត្តនៃសម័យកាល និងជំរុញសម្រេចគោលដៅឆ្នាំ២០៥០ ដែលមានចំណូលកម្រិតខ្ពស់។
គម្រោងដាក់ឱ្យប្រើប្រាស់ច្បាប់ភូមិបាលថ្មីនៅពាក់កណ្ដាលអាណត្តិទី៧ របស់រដ្ឋាភិបាល នៃរដ្ឋសភា បន្ទាប់ពីក្រសួងរៀបចំដែនដី នគរូបនីយកម្ម និងសំណង់ បានបញ្ចប់សេចក្ដីព្រាងច្បាប់ជាផ្លូវការ និងកំពុងប្រមូលធាតុចូលពីភាគីថ្នាក់ជាតិ មូលដ្ឋាន សង្គមស៊ីវិល និងស្ថាប័នពាក់ព័ន្ធ។
លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា បច្ចុប្បន្នក្រសួងបានរៀបចំសេចក្ដីព្រាងច្បាប់ភូមិបាលថ្មីរួចរាល់ ហើយបានបញ្ជូនសេចក្ដីព្រាងច្បាប់នេះទៅកាន់ស្ថាប័នទទួលបន្ទុកផ្នែកច្បាប់ អាជ្ញាធរដែនដីឃុំ សង្កាត់ ស្រុក ខេត្ត ធ្វើការពិនិត្យ និងផ្ដល់ធាតុចូលបន្ថែម ដើម្បីបំពេញចំណុចខ្វះខាតឱ្យបានកាន់តែល្អ និងគ្រប់ជ្រុងជ្រោយសម្រាប់ដាក់ឱ្យអនុវត្តជាផ្លូវការ។
លោកបន្ថែមថា ច្បាប់ភូមិបាលថ្មី នឹងដាក់ឱ្យដំណើរការមិនឱ្យលើសពាក់កណ្ដាលក្នុងរដ្ឋាភិបាល នីតិកាលទី៧ នៃរដ្ឋសភា (ចន្លោះឆ្នាំ២០២៥-២០២៦) ទោះជាយ៉ាងណាក្រសួងចង់បានធាតុចូលពីភាគីពាក់ឱ្យបានច្រើន ដើម្បីដាក់អនុវត្តជាផ្លូវការប្រព្រឹត្តទៅដោយរលូន មានគុណភាព និងប្រសិទ្ធភាព ជាពិសេសត្រូវនឹងតម្រូវការស្ថានភាពសេដ្ឋកិច្ច និងសង្គមនាពេលបច្ចុប្បន្ន។
លោក សេង ឡូត បញ្ជាក់ថា៖ «នៅពេលច្បាប់ភូមិបាលថ្មី ដាក់ឱ្យដំណើរការជាផ្លូវការ នោះច្បាប់ចាស់នឹងលែងប្រើប្រាស់ទៀតហើយ ប៉ុន្តែក្នុងច្បាប់ថ្មីនេះ យើងបានប្រមូលខ្លឹមសាររាល់ចំណុចណាដែលនូវមានតម្លៃ និងអនុវត្តបានក្នុងស្ថានភាពសេដ្ឋកិច្ច និងសង្គមបច្ចុប្បន្ន គឺយើងយកបញ្ចូលឡើងវិញ»។
អ្នកនាំពាក្យបន្ថែមថា៖ «ភាគច្រើនគេតែងធ្វើវិសោធនកម្មដោយបំពេញបន្ថែមនូវច្បាប់ផ្សេងៗ ប៉ុន្តែច្បាប់ភូមិបាលថ្មីនេះ យើងធ្វើថ្មីដោយសារច្បាប់នេះមានអាយុកាលតាំងពីឆ្នាំ២០០១ រហូតដល់បច្ចុប្បន្ន គឺសេដ្ឋកិច្ច និងសង្គមមានការរីកចម្រើន ព្រមទាំងមានធាតុផ្សេងៗជាច្រើនក្នុងសង្គមនាសម័យទំនើប»។
លោកបន្តថា មូលហេតុដែលមិនធ្វើបច្ចុប្បន្នកម្មច្បាប់ចាស់ឡើងវិញ ដោយសារតែមានតម្រូវការកែសម្រួលបំពេញបន្ថែមច្រើន ដូច្នេះក្រសួងសម្រេចរៀបចំធ្វើថ្មី ដោយមិនចាំបាច់ធ្វើវិសោធនកម្មនោះទេ។
លោកបញ្ជាក់ថា ក្រៅពីរៀបចំបង្កើតច្បាប់ភូមិបាលថ្មី ក្រសួងគ្រោងបង្កើតឱ្យមានច្បាប់រៀបចំដែនដី និងនគររូបនីយកម្មច្បាប់លំនៅដ្ឋាន និងធ្វើបច្ចុប្បន្នកម្មច្បាប់មួយចំនួនទៀត ដើម្បីឆ្លើយតបតម្រូវការសេដ្ឋកិច្ច និងសង្គមបច្ចុប្បន្ន ជាពិសេសបំពេញបន្ថែមឱ្យកាន់តែច្រើន មានប្រសិទ្ធភាព និងពេញលេញទៅតាមវិស័យនានាដែលក្រសួងទទួលភារកិច្ចពីរដ្ឋាភិបាល។
លោក ឡាំ សុជាតិ នាយកប្រតិបត្តិវិទ្យាស្ថានតស៊ូមតិនិងគោលនយោបាយ (API) បានឱ្យដឹងថា រាល់ការបង្កើតច្បាប់ថ្មី និងធ្វើវិសោធនកម្មច្បាប់លើវិស័យណាមួយ គួរមានការចូលរួមពីភាគីពាក់ព័ន្ធឱ្យបានគ្រប់ជ្រុងជ្រោយ ដើម្បីធានាឱ្យការអនុវត្តច្បាប់មានប្រសិទ្ធភាព សមភាព និងកាត់បន្ថយរងការរិះគន់ពីសាធារណជន។
លោក ថេង ច័ន្ធសង្វារ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បញ្ជាក់ថា ការរៀបចំច្បាប់ភូមិបាលថ្មី ធ្វើឡើងស្របតាមបរិបទថ្មី ដែលមានភាពជាក់ស្ដែងនិយម និងមានលក្ខណៈគ្រប់ជ្រុងជ្រោយ ដើម្បីជំនួសច្បាប់ភូមិបាលចាស់ដែលមានអាយុជាង២០ឆ្នាំ។
លោកបន្តថា ការកែសម្រួលនូវសេចក្តីព្រាងច្បាប់ភូមិបាលថ្មី ក៏ជាមូលដ្ឋានគ្រឹះមួយក្នុងការកែលម្អ និងផ្ដល់សេវាសាធារណៈលើវិស័យដីធ្លី ដើម្បីកាន់តែមានគុណភាព ភាពសាមញ្ញ ប្រសិទ្ធភាព និងភាពជឿទុកចិត្តបាន។
លោកបន្ថែមថា ច្បាប់ភូមិបាលថ្មី នឹងឆ្លើយតបបាននូវសេចក្តីត្រូវការរបស់ប្រជាពលរដ្ឋ តាមរយៈការកាត់បន្ថយនូវនីតិវិធី នៃការផ្ដល់សេវា ការជំរុញការផ្ដល់សេវាតាមប្រព័ន្ធអេឡិចត្រូនិក និងលក្ខខណ្ឌនៃការផ្ដល់សេវាដែលបានកំណត់។
ក្នុងសិក្ខាសាលាពិគ្រោះយោបល់លើសេចក្តីព្រាងច្បាប់ភូមិបាល (ថ្មី) កាលពីខែមីនា លោក សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លើកឡើងថា ច្បាប់ភូមិបាលថ្មី ពិតជាមានសារៈសំខាន់ និងចាំបាច់ក្នុងការចូលរួមអភិវឌ្ឍជាតិស្របតាមសម័យកាលរីកចម្រើន និងការអភិវឌ្ឍសង្គមជាតិទាំងបច្ចុប្បន្ន និងអនាគត។
លោកបានជំរុញអង្គពិគ្រោះយោបល់ធ្វើការពិភាក្សា និងសិក្សាឱ្យបានលម្អិត និងស៊ីជម្រៅពាក់ព័ន្ធនឹងការរៀបចំបង្កើតច្បាប់ភូមិបាលថ្មី ដែលរួមបញ្ចូលបញ្ហាដីសហគមន៍ ដីតំបន់ការពារ និងដីបញ្ចុះសព ជាដើម៕
Related Posts
February 3, 2024- February 3, 2024
- September 5, 2023
February 16, 2024
