គណៈប្រតិភូកម្ពុជា រួមនឹងបុគ្គលិកនៃកម្មវិធីស្បៀងអាហារពិភពលោករបស់អង្គការសហប្រជាជាតិ (WFP) ប្រមាណជិត២០នាក់បានបំពេញទស្សនកិច្ចសិក្សានៅប្រទេសកូរ៉េខាងត្បូងរយៈពេលប្រាំថ្ងៃ ដើម្បីពង្រឹងកម្មវិធីផ្ដល់ស្បៀងអាហារតាមសាលារៀននៅកម្ពុជា។ ពួកគេនឹងត្រឡប់មកកម្ពុជាវិញនៅថ្ងៃទី២៣ ខែកញ្ញា។
បេសកកម្មបំពេញទស្សនកិច្ចនេះគាំទ្រដោយទីភ្នាក់ងារសហប្រតិបត្តិការអន្តរជាតិកូរ៉េ (KOICA) ហើយតាមរយៈបេសកកម្មនេះ គណៈប្រតិភូទាំងមូលបានសិក្សាស្វែងយល់ដោយផ្ទាល់អំពីគំរូជោគជ័យរបស់កម្មវិធីអាហារតាមសាលារបស់ប្រទេសកូរ៉េ។
សេចក្ដីប្រកាសព័ត៌មានរបស់កម្មវិធីស្បៀងអាហារពិភពលោកពីម្សិលមិញ បានឱ្យដឹងថា គណៈប្រតិភូមកបំពេញទស្សនកិច្ចនៅកូរ៉េខាងត្បូងដឹកនាំដោយលោក ណាត ប៊ុនរឿន រដ្ឋលេខាធិការក្រសួងអប់រំ និងរួមមានសមាសភាពមន្ត្រីសំខាន់ៗមកពីក្រសួងអប់រំ ក្រសួងកសិកម្ម ក្រសួងសេដ្ឋកិច្ច ក្រុមប្រឹក្សាជាតិគាំពារសង្គម និងក្រុមប្រឹក្សាស្ដារអភិវឌ្ឍវិស័យកសិកម្មនិងជនបទ ដែលសរុបទាំងអស់មានចំនួន១៥នាក់ និងបុគ្គលិកបួននាក់មកពីកម្មវិធីស្បៀងអាហារពិភពលោករបស់អង្គការសហប្រជាជាតិ។
សេចក្ដីប្រកាសព័ត៌មានបន្តថា ពួកគេនឹងបានសិក្សាស្វែងយល់អំពីការអនុវត្តកម្មវិធីផ្ដល់ស្បៀងអាហារតាមសាលារៀននៅប្រទេសកូរ៉េ ដោយផ្តោតលើគោលនយោបាយ យន្តការអនុវត្តការងារ និងការសម្របសម្រួលអន្តរក្រសួង។
ប្រភពដដែលបញ្ជាក់ថា គណៈប្រតិភូកម្ពុជាចូលរួមជាមួយសមភាគីកូរ៉េ ដើម្បីសង្កេតមើលដំណើរការលទ្ធកម្មស្បៀងតាមមូលដ្ឋាន និងទស្សនកិច្ចនៅតាមសាលារៀនក្នុងសហគមន៍ដែលទើបកំពុងអនុវត្តកម្មវិធីនេះ។ បន្ទាប់មក គណៈប្រតិភូនឹងជួបជាមួយមន្ត្រីជាន់ខ្ពស់នៅទីស្នាក់ការកណ្តាលរបស់ KOICA ដើម្បីស្វែងយល់បន្ថែមអំពីការអនុវត្តកម្មវិធី ការគ្រប់គ្រង ការអភិវឌ្ឍគោលនយោបាយ យុទ្ធសាស្ត្រហិរញ្ញវត្ថុបែបច្នៃប្រឌិត និងតួនាទីរបស់វិទ្យាសាស្ត្រ បច្ចេកវិទ្យា និងការច្នៃប្រឌិតក្នុងការរចនាកម្មវិធីប្រកបដោយនិរន្តរភាព និងបង្កើតកិច្ចសហការប្រកបដោយប្រសិទ្ធភាពជាមួយដៃគូចម្រុះនិងភាគីពាក់ព័ន្ធ។
លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានសង្កត់ធ្ងន់លើសារៈសំខាន់នៃការផ្តល់អាទិភាពដល់សុខភាពសិស្សតាមរយៈកម្មវិធីអាហារូបត្ថម្ភ និងការគ្រប់គ្រងគុណភាពអាហារនៅតាមសាលារៀនដែលជាកម្លាំងចលករដ៏មានឥទ្ធិពលសម្រាប់កំណែទម្រង់ការអប់រំក្នុងអាណត្តិទី៧នៃរាជរដ្ឋាភិបាល។
លោកបាននិយាយថា៖ «ដំណើរទស្សនកិច្ចសិក្សាទៅប្រទេសកូរ៉េនេះស្របទៅតាមចក្ខុវិស័យរបស់កម្ពុជាសម្រាប់ការអភិវឌ្ឍប្រកបដោយនិរន្តរភាពនិងបរិយាប័ន្នដែលអនុញ្ញាតឱ្យមានការចែករំលែកចំណេះដឹងរវាងប្រទេសទាំងពីរ។ វាគឺជាព្រឹត្តិការណ៍សំខាន់មួយក្នុងកិច្ចសហការរវាងកម្ពុជានិងកូរ៉េ ដែលអាចធ្វើទៅបានតាមរយៈជំនួយគាំទ្រដ៏មានតម្លៃរបស់ទីភ្នាក់ងារសហប្រតិបត្តិការអន្តរជាតិកូរ៉េ»។
លោកបន្តថា៖ «ដំណើរទស្សនកិច្ចនេះបញ្ជាក់ពីភាពជាដៃគូដ៏ជ្រាលជ្រៅរវាងប្រទេសទាំងពីររបស់យើង និងបង្ហាញពីការប្តេជ្ញាចិត្តរួមគ្នារបស់យើងក្នុងការលើកកម្ពស់ការអប់រំ អាហារូបត្ថម្ភ និងការអភិវឌ្ឍជនបទ»។
លោក ហង់ជួន ណារ៉ុន បានសាទរ និងបន្ថែមថា តាមរយៈកម្មវិធីជំនួយចម្រុះរបស់ប្រទេសកូរ៉េខាងត្បូង កម្ពុជាកំពុងត្រួសត្រាយផ្លូវឆ្ពោះទៅកាន់អនាគតដ៏ត្រចះត្រចង់សម្រាប់វិស័យអប់រំ អាហារូបត្ថម្ភ និងការអភិវឌ្ឍប្រកបដោយចីរភាព។
លោកស្រី គ្លែរ កូណាន់ នាយិកាប្រចាំប្រទេសរបស់ WFP នៅកម្ពុជា បានលើកឡើងថា៖ «ជាមួយនឹងកម្មវិធីផ្ដល់ស្បៀងអាហារតាមសាលារៀនដោយប្រើប្រាស់កសិផលសហគមន៍ (HGSF) របស់យើង កម្ពុជាមានគោលបំណងផ្តល់អាហារដល់កុមារផង ហើយស្របពេលជាមួយនោះ ក៏លើកកម្ពស់កែលម្អអាហារូបត្ថម្ភ ពង្រឹងការអប់រំនិងការអភិវឌ្ឍន៍ជនបទ និងបង្កើនសន្តិសុខស្បៀងផងដែរ»។
លោកស្រីថា ជំនួយគាំទ្ររបស់ទីភ្នាក់ងារសហប្រតិបត្តិការអន្តរជាតិកូរ៉េមកលើកម្មវិធីកន្លងមក បានផ្ដល់ការកែប្រែគួរឱ្យកត់សម្គាល់ក្នុងការកសាងហេដ្ឋារចនាសម្ព័ន្ធសំខាន់ៗតាមសាលារៀន និងលើកកម្ពស់សមត្ថភាពរបស់អ្នកអនុវត្តកម្មវិធី។
លោកស្រីបន្ថែមថា ជំនួយនេះក៏បានរួមចំណែកទៅដល់សេដ្ឋកិច្ចក្នុងស្រុកផងដែរ តាមរយៈការលើកកម្ពស់ការដាំដុះកសិផលតាមផ្ទះសម្រាប់ផ្គត់ផ្គង់តាមមូលដ្ឋាន ការបង្កើនភាពអង់អាចរបស់កសិករ ការលើកកម្ពស់កំណើនកសិកម្ម និងការបង្កើតនូវប្រព័ន្ធស្បៀងមួយដែលប្រកបដោយនិរន្តរភាព។
គួរបញ្ជាក់ថា លទ្ធផលនៃដំណើរទស្សនកិច្ចសិក្សានេះនឹងរួមចំណែកយ៉ាងសំខាន់ដល់ការអនុវត្តគោលនយោបាយស្ដីពីការផ្តល់ស្បៀងអាហារតាមសាលារៀននៅកម្ពុជា និងការអភិវឌ្ឍកម្មវិធីជាតិផ្ដល់ស្បៀងអាហារតាមសាលារៀនដោយប្រើប្រាស់កសិផលសហគមន៍ ខណៈដែលកម្មវិធីនេះកំពុងឈានដល់ដំណាក់កាលសំខាន់ក្នុងការផ្ទេរមកក្នុងការគ្រប់គ្រងទាំងស្រុងរបស់រដ្ឋាភិបាលក្នុងឋានៈយន្តការមួយដ៏សំខាន់នៃបណ្តាញសុវត្ថិភាពសង្គម៕
Related Posts
- September 5, 2023
- December 19, 2022
- January 10, 2023
- January 20, 2023
