មូលនិធិរូបិយវត្ថុអន្តរជាតិ (IMF) បាននិយាយកាលពីថ្ងៃអង្គារថា សេដ្ឋកិច្ចរបស់កម្ពុជាត្រូវបានព្យាករណ៍ថានឹងកើនឡើង ៥.៦ ភាគរយនៅឆ្នាំនេះ និង ៦.១ ភាគរយនៅឆ្នាំក្រោយ ពោលគឺកើនឡើងពី ៥.២ ភាគរយកាលពីឆ្នាំមុន។
ការព្យាករណ៍ដែលមាននៅក្នុងទស្សនវិស័យសេដ្ឋកិច្ចពិភពលោកចុងក្រោយរបស់ IMF មានន័យថាកម្ពុជាទំនងជាជាប្រទេសដែលមានកំណើនលឿនបំផុតរបស់អាស៊ានក្នុងរយៈពេលពីរឆ្នាំជាប់គ្នា។
ប្រទេសហ្វីលីពីនឈរនៅចំណាត់ថ្នាក់ទី២ជាមួយនឹងកំណើន ៥.៣ ភាគរយនៅឆ្នាំនេះ និង ៥.៩ ភាគរយនៅឆ្នាំក្រោយ។
សេដ្ឋកិច្ចរបស់ប្រទេសឥណ្ឌូនេស៊ីត្រូវបានគេព្យាករណ៍ថានឹងកើនឡើង ៥.០ ភាគរយទាំងនៅឆ្នាំនេះ និងឆ្នាំក្រោយ ហើយកំណើននៅក្នុងប្រទេសវៀតណាមត្រូវបានព្យាករណ៍ថានឹងកើនឡើង ៤.៧ ភាគរយនៅឆ្នាំនេះ និង ៥.៨ ភាគរយនៅឆ្នាំក្រោយ។
សេដ្ឋកិច្ចឡាវ និងម៉ាឡេស៊ីត្រូវបានគេរំពឹងថានឹងកើនឡើង ៤.០ ភាគរយនៅឆ្នាំនេះ ជាមួយនឹងកំណើនមិនផ្លាស់ប្តូរនៅក្នុងប្រទេសឡាវ និងកើនឡើងដល់ ៤.៣ ភាគរយសម្រាប់កំណើននៅក្នុងប្រទេសម៉ាឡេស៊ីនៅឆ្នាំក្រោយ។
ប្រទេសថៃត្រូវបានគេព្យាករណ៍ថានឹងកើនឡើង ២.៧ ភាគរយនៅឆ្នាំនេះ និង ៣.២ ភាគរយនៅឆ្នាំក្រោយ។ កំណើនសេដ្ឋកិច្ចក្នុងប្រទេសមីយ៉ាន់ម៉ាត្រូវបានគេរំពឹងថានឹងមាន ២,៦ ភាគរយទាំងឆ្នាំនេះ និងឆ្នាំក្រោយ។
សិង្ហបុរី និងប្រ៊ុយណេ ដែលជាប្រទេសដែលមានសេដ្ឋកិច្ចខ្លាំងជាងគេបំផុតក្នុងអាស៊ាន ត្រូវបានគេរំពឹងថានឹងមិនមានកំណើនកើនឡើងខ្លាំងនោះទេ។
សម្រាប់ប្រទេសសិង្ហបុរី សេដ្ឋកិច្ចត្រូវបានព្យាករណ៍ថានឹងកើនឡើង ១.០ ភាគរយនៅឆ្នាំនេះ និង ២.១ ភាគរយនៅឆ្នាំក្រោយ។ សេដ្ឋកិច្ចរបស់ប្រទេសប្រ៊ុយណេត្រូវបានព្យាករណ៍ថានឹងធ្លាក់ចុះ ០.៨ ភាគរយ មុនពេលស្ទុះងើបឡើងវិញ ៣.៥ ភាគរយនៅឆ្នាំក្រោយ។
ក្នុងចំណោមប្រទេសសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់(RCEP)កំណើនរបស់ប្រទេសចិនត្រូវបានគេព្យាករណ៍ថានឹងកើនឡើង ៥.០ ភាគរយនៅឆ្នាំនេះ និង ៤.២ ភាគរយនៅឆ្នាំក្រោយ។
ប៉ុន្តែកំណើនយឺតជាងនេះត្រូវបានគេព្យាករណ៍សម្រាប់សមាជិក RCEP ផ្សេងទៀត ដែលសុទ្ធតែជាប្រទេសមានសេដ្ឋកិច្ចជឿនលឿនដូចសិង្ហបុរីដែរ។
សេដ្ឋកិច្ចរបស់ប្រទេសជប៉ុនត្រូវបានគេរំពឹងថានឹងកើនឡើង ២.០ ភាគរយនៅឆ្នាំនេះ និង ១.០ ភាគរយនៅឆ្នាំក្រោយ។
កំណើនសេដ្ឋកិច្ចក្នុងប្រទេសកូរ៉េខាងត្បូងត្រូវបានព្យាករថានឹងមានអត្រា ១,៤ ភាគរយដែលនឹងកើនឡើងដល់ ២,២ ភាគរយនៅឆ្នាំក្រោយ។
កំណើនរបស់ប្រទេសអូស្ត្រាលីត្រូវបានព្យាករណ៍ថានឹងមានអត្រា ១,៨ ភាគរយដែលនឹងធ្លាក់ចុះមកនៅត្រឹម ១,២ ភាគរយនៅឆ្នាំក្រោយ។ សេដ្ឋកិច្ចរបស់ប្រទេសនូវែលសេឡង់ត្រូវបានព្យាករណ៍ថានឹងកើនឡើង ១.១ ភាគរយនៅឆ្នាំនេះ និង ១.០ ភាគរយនៅឆ្នាំក្រោយ។
សេដ្ឋកិច្ចសកលកំពុងធ្វើដំណើរប្រកបទៅដោយភាពមិនរលូន
សម្រាប់សេដ្ឋកិច្ចពិភពលោកទាំងមូល “កំណើននៅតែយឺត និងមិនស្មើគ្នា។ IMF បាននិយាយថា សេដ្ឋកិច្ចពិភពលោកកំពុងស្ថិតនៅក្នុងភាពមិនរលូន»។
IMFបាននិយាយថា “សេដ្ឋកិច្ចរបស់ប្រទេសកំពុងរីកចម្រើនជាច្រើនបានបង្ហាញពីភាពធន់ ដោយឡែកប្រទេសចិន ដែលប្រឈមមុខនឹងការកើនឡើងនៃវិបត្តិអចលនទ្រព្យ និងធ្វើឱ្យទំនុកចិត្តធ្លាក់ចុះ”។
“វិបត្តិអចលនទ្រព្យអាចធ្វើអោយស្ថានភាពក្នុងប្រទេសចិនកាន់តែមានភាពធ្ងន់ធ្ងរ ដែលជាហានិភ័យសម្រាប់សេដ្ឋកិច្ចពិភពលោក”។
ទស្សនវិស័យរយៈពេលមធ្យមគឺមានភាពមិនច្បាស់
លោក Pierre-Olivier Gourinchasទីប្រឹក្សាសេដ្ឋកិច្ចរបស់ IMF បាននិយាយថា សម្រាប់រយៈពេលមធ្យម ទស្សនវិស័យគឺ “មានភាពមិនច្បាស់” ។
លោកបន្តថា៖ «ទស្សនវិស័យកំណើនសកលមានភាពទន់ខ្សោយ ជាពិសេសសម្រាប់ប្រទេសកំពុងដែលកំពុងរីកចម្រើន និងប្រទេសដែលមានសេដ្ឋកិច្ចកំពុងអភិវឌ្ឍន៍។
“ការប៉ះពាល់គឺមានខ្លាំង៖ ការធ្លាក់ចុះនៃកម្រិតជីវភាពក្នុងប្រទេសមានសេដ្ឋកិច្ចជឿនលឿន ការកាត់បន្ថយទំហំសារពើពន្ធ ការកើនឡើងនៃភាពងាយរងគ្រោះនៃបំណុល ហានិភ័យ និងការថយចុះឱកាសដើម្បីយកឈ្នះលើជំងឺរាតត្បាត និងសង្រ្គាម។”
ប្រទេសចិន “ត្រូវតែឈប់ផ្តោតលើ” កំណើនដែលពឹងផ្អែកលើឥណទាន ដោយងាកទៅរកវិស័យអចលនទ្រព្យវិញ
លោក Gourinchaបាននិយាយថា ចំពោះវិបត្តិអចលនទ្រព្យរបស់ប្រទេសចិន “ការស្តារទំនុកចិត្តឡើងវិញ ទាមទារឱ្យមានការរៀបចំរចនាសម្ព័ន្ធឡើងវិញភ្លាមៗនូវអ្នកអភិវឌ្ឍន៍អចលនទ្រព្យដែលជួបបញ្ហា រក្សាស្ថិរភាពហិរញ្ញវត្ថុ និងការដោះស្រាយភាពតានតឹងនៅក្នុងហិរញ្ញវត្ថុសាធារណៈក្នុងស្រុក” ។
លោកបានរំលឹកថា “ប្រសិនបើតម្លៃអចលនទ្រព្យរបស់ប្រទេសចិនធ្លាក់ចុះយ៉ាងឆាប់រហ័សពេក តារាងតុល្យការរបស់ធនាគារ និងប្រជាជននឹងកាន់តែអាក្រក់ទៅៗ ដោយវិបត្តិហិរញ្ញវត្ថុធ្ងន់ធ្ងរអាចនឹងកើតមាន” ។
“ការគាំទ្រតម្លៃអចលនទ្រព្យដោយសិប្បនិម្មិតអាចការពារតារាងតុល្យការជាបណ្ដោះអាសន្ន ប៉ុន្តែវានឹងកាត់បន្ថយឱកាសវិនិយោគការសាងសង់ថ្មី និងប៉ះពាល់ដល់ប្រាក់ចំណូលរបស់រដ្ឋាភិបាលក្នុងតំបន់តាមរយៈការកាត់បន្ថយការលក់ដីធ្លី។AKP- Sao Da