ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោកបណ្ឌិត អូន ព័ន្ធមុនីរ័ត្ន បានជួបពិភាក្សាការងារជាមួយ លោក Winfried Vicklen អគ្គនាយកធនាគារអភិវឌ្ឍន៍អាស៊ី (ADB) ក្នុងដំណើរបំពេញទស្សនកិច្ចនៅកម្ពុជា ពីថ្ងៃទី៩ ដល់ថ្ងៃទី១០ ខែតុលា ឆ្នាំ២០២៣។
ក្នុងនាមរាជរដ្ឋាភិបាលកម្ពុជា លោកឧបនាយករដ្ឋមន្ត្រីបានស្វាគមន៍យ៉ាងកក់ក្តៅចំពោះលោក Wicklen និងសហការី ព្រមទាំងបានកោតសរសើរចំពោះការរួមចំណែកយ៉ាងសំខាន់របស់ធនាគារអភិវឌ្ឍន៍អាស៊ី ដែលបានផ្តល់នូវកិច្ចសហប្រតិបត្តិការដ៏ល្អក្នុងការគាំទ្រដល់ការអភិវឌ្ឍន៍សង្គមសេដ្ឋកិច្ចរបស់ប្រទេសកម្ពុជាពីឆ្នាំ១៩៩៣ ដល់បច្ចុប្បន្ន។
លោក Wicklen បានថ្លែងអំណរគុណចំពោះរាជរដ្ឋាភិបាលកម្ពុជាសម្រាប់កិច្ចសហប្រតិបត្តិការដ៏ល្អ និងជិតស្និទ្ធជាមួយ ADB ក្នុងរយៈពេល៣០ឆ្នាំកន្លងមក ហើយលោកបានត្រៀមខ្លួនក្នុងការពង្រឹង និងពង្រីកកិច្ចសហប្រតិបត្តិការដ៏ល្អនេះបន្ថែមទៀត នៅក្នុងដំណើរការអភិវឌ្ឍន៍របស់ប្រទេសកម្ពុជា។
លោកឧបនាយករដ្ឋមន្ត្រីបានគូសបញ្ជាក់ថា យុទ្ធសាស្ត្រភាពជាដៃគូសម្រាប់ការអភិវឌ្ឍន៍កម្ពុជា ២០២៤-២០២៨ ដែលទើបអនុម័តនាពេលថ្មីៗនេះ ស្របនឹងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា ដើម្បីចូលរួមចំណែកក្នុងការអភិវឌ្ឍន៍សេដ្ឋកិច្ចសង្គមកម្ពុជាឱ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ ក្រោមការដឹកនាំដ៏ឈ្លាសវៃរបស់ឯកឧត្តមបណ្ឌិត ហ៊ុន ម៉ាណែត នាយករដ្ឋមន្ត្រី។
លោកឧបនាយករដ្ឋមន្ត្រីបានថ្លែងអំណរគុណដល់ ADB ចំពោះការប្តេជ្ញាចិត្តរបស់ខ្លួនក្នុងការរួមចំណែកដល់កំណើនសេដ្ឋកិច្ចប្រកបដោយចីរភាពរបស់កម្ពុជា និងការលើកកម្ពស់ជីវភាពរស់នៅរបស់ប្រជាជនកម្ពុជា។
AKP