រដ្ឋាភិបាលអ៊ុយក្រែន ស្នើរដ្ឋាភិបាលកម្ពុជា ជួយផ្ដល់ការគាំទ្រលើផ្នែកបច្ចេកទេស និងហ្វឹកហ្វឺនមន្ត្រីលើជំនាញបោសសម្អាតមីន និងយុទ្ធភណ្ឌមិនទាន់ផ្ទុះ ដើម្បីផ្ដល់ដីសុវត្ថិភាពសម្រាប់ប្រជាពលរដ្ឋរស់នៅឡើងវិញក្នុងកំលុងប្រទេសកំពុងមានសង្គ្រាមជាមួយប្រទេសរុស្ស៊ី។
ការស្នើកម្ពុជា គាំទ្រលើបច្ចេកទេស និងហ្វឹកហ្វឺនការបោសសម្អាតមីន និងយុទ្ធភណ្ឌមិនទាន់ផ្ទុះ ធ្វើឡើងក្នុងជំនួបរវាងលោក ហេង រតនា ប្រតិភូរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) ជាមួយលោកស្រី Yuliia Svyrydenko ឧបនាយករដ្ឋមន្ត្រីទី១ និងជារដ្ឋមន្ត្រីក្រសួងសេដ្ឋកិច្ចប្រទេសអ៊ុយក្រែន តាមរយៈប្រព័ន្ធ Online កាលពីថ្ងៃពុធ។
កាលពីថ្ងៃពុធ ទំព័រហ្វេសប៊ុករបស់មជ្ឈមណ្ឌលសកម្មភាពកំចាត់មីនកម្ពុជា បានបញ្ជាក់ថា ក្នុងជំនួបរវាងលោក ហេង រតនា និងលោកស្រី Yuliia Svyrydenko ពិភាក្សាផ្តោតសំខាន់លើបញ្ហាវិស័យមីនមនុស្សធម៌ និងផលប៉ះពាល់ផ្ទៃដីកសិកម្ម និងហេដ្ឋារចនាសម្ពន្ធរូបវន្តនៅប្រទេសអ៊ុយក្រែន។
លោក ហេង រតនា បានឱ្យដឹងថា រដ្ឋាភិបាលអ៊ុយក្រែន បានស្នើមន្ត្រីជំនាញកម្ពុជាចូលជាសមាជិករបស់គណៈកម្មការក្នុងវិស័យពាក់ព័ន្ធមួយចំនួនរបស់អ៊ុយក្រែន ដើម្បីរៀបចំផែនការយុទ្ធសាស្ត្របោសសម្អាតគ្រាប់មីន
និងយុទ្ធភណ្ឌមិនទាន់ផ្ទុះឱ្យបានឆាប់រហ័ស។
លោកបន្ថែមថា អ៊ុយក្រែន ក៏បានស្នើកម្ពុជាបន្តផ្ដល់ការហ្វឹកហ្វឺនផ្នែកបច្ចេកទេសបន្ថែម ព្រោះបច្ចុប្បន្នអ៊ុយក្រែន
ទទួលជំនួយបច្ចេកទេសជាច្រើនពីបណ្ដាប្រទេសនានា ជាពិសេសជប៉ុន ដូចជាគ្រឿងចក្រកម្ទេចមីន ប៉ុន្តែអ៊ុយក្រែន
ពុំមានជំនាញប្រើប្រាស់គ្រឿងចក្រទាំងនោះបានឡើយ ដូច្នេះត្រូវការកម្ពុជាជួយពង្រីកការហ្វឹកហ្វឺនឱ្យបានលឿន។
អគ្គនាយក CMAC បញ្ជាក់ថា ចំពោះសំណើរបស់អ៊ុក្រែនខាងលើនេះ លោកបានឱ្យលោកស្រី Yuliia Svyrydenko ដាក់សំណើទៅកាន់រដ្ឋាភិបាលកម្ពុជាជាផ្លូវការ ដើម្បីសម្រេចតាមគោលនយោបាយថ្នាក់ជាតិរបស់កម្ពុជា។
លោក ហេង រតនា បន្ថែមថា ក្នុងជំនួបនេះ អ៊ុយក្រែន
ចង់ដឹងពីដំណើរការបោសសម្អាតមីន និងយុទ្ធភណ្ឌមិនទាន់ផ្ទុះនៅកម្ពុជា ដើម្បីយកទៅអនុវត្តនៅប្រទេសរបស់ខ្លួន ព្រោះគ្រាប់មីន និងយុទ្ធភណ្ឌមិនទាន់ផ្ទុះនៅអ៊ុយក្រែន
គឺមានទំហំធំធេង ដែលត្រូវដោះស្រាយ ហើយក៏ជាទុក្ខកង្វល់របស់រដ្ឋាភិបាលរបស់ខ្លួនផងដែរ។
លោកស្រី Yuliia Svyrydenko បានលើកឡើងថា បច្ចុប្បន្ន ប្រជាជនអ៊ុយក្រែន បានភៀសខ្លួនទៅជ្រកកោននៅប្រទេសទី៣ គឺមានចំនួនច្រើន ប៉ុន្តែនៅពេលសង្គ្រាមបញ្ចប់នៅថ្ងៃខាងមុខ នោះពួកគេនឹងត្រឡប់មករស់នៅអ៊ុយក្រែនវិញ ប៉ុន្តែពួកគេអាចមានគ្រោះថ្នាក់ដោយសារមិនទាន់បោសសម្អាតមីន និងយុទ្ធភណ្ឌមិនទាន់ផ្ទុះបានរួចរាល់ ជាពិសេសចម្ការមីននៅមានច្រើន។
លោកស្រីបានកោតសរសើរ និងថ្លែងអំណរគុណដល់អតីតលោកនាយករដ្ឋមន្ត្រី ហ៊ុន សែន ដែលបានអនុញ្ញាតឱ្យកងកម្លាំងរបស់អ៊ុយក្រែនបានរៀនសូត្របោសសម្អាតមីន និងយុទ្ធភណ្ឌមិនទាន់ផ្ទុះនៅកម្ពុជា។
រដ្ឋមន្ត្រីក្រសួងសេដ្ឋកិច្ចប្រទេសអ៊ុយក្រែន ក៏បានអរគុណដល់រដ្ឋាភិបាលកម្ពុជា ដែលបានបញ្ជូនកម្លាំងជំនាញ ដើម្បីហ្វឹកហ្វឺនជំនាញរំដោះមីន និងយុទ្ធភណ្ឌមិនទាន់ផ្ទុះ សម្រាប់កម្លាំងអ៊ុយក្រែនក្នុងប្រទេសប៊ូឡូញ និងស្នើសុំរដ្ឋាភិបាលកម្ពុជាបន្តជួយ និងពង្រីកនូវជំនួយបន្ថែម។
លោកស្រីបញ្ជាក់ថា ដោយសារសង្គ្រាម បណ្ដាលឱ្យគ្រាប់មីន និងយុទ្ធភណ្ឌមិនទាន់ផ្ទុះ បន្សល់នៅលើទឹកដីអ៊ុយក្រែនមានទំហំធំធេង ដែលកំពុងគំរាមកំហែងប្រជាពលរដ្ឋ និងជាទុក្ខកង្វល់របស់រដ្ឋាភិបាលអ៊ុយក្រែនដែលត្រូវដោះស្រាយឱ្យបានទាន់ពេលវេលា។
លោកស្រីថ្លែងថា សម្រាប់ការងារបោសសម្អាតមីននៅអ៊ុយក្រែន ក៏មានក្រុមហ៊ុន និងអង្គការមួយចំនួនចូលរួមជួយដែរ ប៉ុន្តែការងារទាំងនេះនៅមានល្បឿនយឺតនៅឡើយ ប៉ុន្តែបើតាមរបាយការណ៍របស់ប្រទេសនានា ជាពិសេសជប៉ុន បានប្រាប់អ៊ុយក្រែនថា ស៊ីម៉ាក មាន
បទពិសោធបង្កើនល្បឿនក្នុងការបោសសម្អាតមីន និងយុទ្ធភណ្ឌមិនទាន់ផ្ទុះនៅកម្ពុជា។
លោកស្រីបញ្ជាក់ថា បច្ចុប្បន្ន អ៊ុយក្រែន មានបំណងរំដោះផ្ទៃដីសម្រាប់ធ្វើកសិកម្ម ផ្ទៃដីសម្រាប់កសាងហេដ្ឋារចនាសម្ពន្ធមួយចំនួនដូចជា ផ្លូវ ថ្នល់ ស្ពាន សាលារៀន ដែលកំពុងរងផលប៉ះពាល់ខ្លាំងជាងគេ ប៉ុន្តែការប្រតិបត្តិការបោសសម្អាតមីននៅអ៊ុយក្រែន គឺមានល្បឿនយឺត។
កាលពីដើមឆ្នាំ២០២៣ រដ្ឋាភិបាលអ៊ុយក្រែន បានបញ្ជូនកម្លាំងជំនាញជាង១០នាក់ ដើម្បីទទួលបានការបណ្ដុះបណ្ដាលជំនាញប្រើប្រាស់ឧបករណ៍ទំនើបសម្រាប់បោសសម្អាតមីន និងយុទ្ធភណ្ឌមិនទាន់ផ្ទុះពីកម្ពុជាចាប់ពីថ្ងៃទី១៥ ដល់ថ្ងៃទី២១មករា។
កាលពីថ្ងៃទី៥ ដល់ថ្ងៃទី៩ ខែកក្កដា ឆ្នាំ២០២៣ មន្ត្រីជំនាញសកម្មភាពមីនប្រទេសអ៊ុយក្រែន ក៏បានចូលរួមវគ្គហ្វឹកហ្វឺនជំនាញបោសសម្អាតមីន និងយុទ្ធភណ្ឌមិនទាន់ផ្ទុះ ពីមជ្ឈមណ្ឌលសកម្មភាពកម្ចាត់មីនកម្ពុជា ដែលគាំទ្រដោយទីភ្នាក់ងារសហប្រតិបត្តិការអន្តរជាតិជប៉ុន (JICA) នៅប្រទេសប៊ូឡូញ រយៈពេលមួយសប្ដាហ៍ផងដែរ៕