ដោយភ្ជាប់ពីភាគនិរតីនៃរាជធានីភ្នំពេញទៅកាន់តំបន់ជាយក្រុងភាគខាងកើត ផ្លូវក្រវ៉ាត់ក្រុងទី៣ ដែលផ្តល់មូលនិធិដោយចិន មិនត្រឹមតែជួយបញ្ចៀសការកកស្ទះចរាចរណ៍ប៉ុណ្ណោះទេ ប៉ុន្តែថែមទាំងធ្វើអោយការដឹកជញ្ជូនទំនិញ និងភស្តុភារនៅក្នុងទីក្រុងមានភាពប្រសើរឡើងផងដែរ។
ផ្លូវក្រវ៉ាត់ក្រុងប្រវែង ៥៣គីឡូម៉ែត្រ រួមជាមួយនឹងស្ពានឆ្លងកាត់ទន្លេចំនួនពីរ និងស្ពានអាកាសចំនួនពីរ ត្រូវបានសាងសង់ដោយក្រុមហ៊ុន Shanghai Construction Group ក្នុងរយៈពេល ៥២ខែ ក្រោមកម្ចីសម្បទានពីធនាគារនាំចេញ-នាំចូលនៃប្រទេសចិន។
ផ្លូវដែលមានពីរគន្លង សម្រាប់ធ្វើចរាចរណ៍ក្នុងទិសដៅនីមួយៗ លាតសន្ធឹងពីរង្វង់មូលមហាវិថីឈ្នះ-ឈ្នះ ភាគនិរតីរាជធានីភ្នំពេញ ដល់ផ្លូវជាតិលេខ១ ក្នុងខេត្តកណ្តាលខាងកើតរាជធានី។
ប្រជាពលរដ្ឋក្នុងមូលដ្ឋានមានសេចក្តីសោមនស្សរីករាយដែលបានឃើញការស្ថាបនាផ្លូវក្រវ៉ាត់ក្រុងទី៣នេះរួចរាល់ ដោយលើកឡើងថា ផ្លូវនេះនឹងជួយសម្រួលដល់ការធ្វើដំណើរ និងការដឹកជញ្ជូនទំនិញរបស់ពួកគាត់ ជាពិសេសការដឹកជញ្ជូនកសិផលពីកសិដ្ឋានទៅកាន់ទីផ្សារ។
យាយ អាត អាយុ៦៨ឆ្នាំ ជាកសិករនៅខេត្តកណ្តាល បានប្រាប់សារព័ត៌មានស៊ីនហួរនៅថ្ងៃព្រហស្បតិ៍ថា “កាលពីមុន ពិបាកក្នុងការធ្វើដំណើរទៅកាន់ទីក្រុង ដោយសារការកកស្ទះចរាចរណ៍ និងមានរថយន្តកុងតឺន័រច្រើន”។
គាត់និយាយថា “ផ្លូវនេះបានជួយកាត់បន្ថយការកកស្ទះចរាចរណ៍ ហើយវានឹងផ្តល់ការជំរុញដល់សេដ្ឋកិច្ចរបស់យើង និងធ្វើឲ្យការដឹកជញ្ជូនទំនិញប្រសើរឡើង”។
អ្នកស្រី លឹម សូរិយា អាយុ ៤៦ ឆ្នាំ អ្នកលក់បន្លែនៅខេត្តកណ្តាលបាននិយាយថា ផ្លូវក្រវ៉ាត់ក្រុងនេះអាចឲ្យប្រជាពលរដ្ឋធ្វើដំណើរពីម្ខាងទីក្រុងទៅម្ខាងទៀតដោយមិនឆ្លងកាត់កណ្តាលក្រុង ដូច្នេះវានឹងកាត់បន្ថយការកកស្ទះចរាចរណ៍ និងចំណេញពេលវេលាធ្វើដំណើរ។
គាត់បានប្រាប់សារព័ត៌មានស៊ីនហួរ ថា “ខ្ញុំបានធ្វើដំណើរលើផ្លូវនេះ ហើយមានអារម្មណ៍សប្បាយរីករាយខ្លាំងណាស់” «ផ្លូវធំនេះល្អ ហើយវាធ្វើឲ្យការដឹកជញ្ជូនទំនិញងាយស្រួល និងលឿនជាងមុន»។
លោក សាំង សុខជា អាយុ៤១ឆ្នាំ រស់នៅតាមបណ្តោយផ្លូវក្រវ៉ាត់ក្រុងទី៣ បាននិយាយថា ផ្លូវនេះមិនត្រឹមតែជួយលើកស្ទួយជីវភាពរស់នៅរបស់អ្នកស្រុកប៉ុណ្ណោះទេ ថែមទាំងលើកកម្ពស់ចំណងមិត្តភាពរវាងកម្ពុជា និងចិនផងដែរ។
លោកបានប្រាប់ស៊ីនហួរថា៖ «ចិនគឺជាដៃគូដ៏ល្អបំផុតរបស់កម្ពុជា ដែលជួយយើងក្នុងការអភិវឌ្ឍស្ពាន ផ្លូវ និងហេដ្ឋារចនាសម្ព័ន្ធផ្សេងៗ។
សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានមានប្រសាសន៍ថា ផ្លូវក្រវ៉ាត់ក្រុងទី៣ គឺជាសក្ខីភាពមួយទៀត នៃកិច្ចសហប្រតិបត្តិការប្រកបដោយផ្លែផ្កា រវាងកម្ពុជា និងចិន ក្រោមក្របខណ្ឌនៃគំនិតផ្តួចផ្តើមខ្សែក្រវ៉ាត់ និងផ្លូវ (BRI) និងសហគមន៍ជោគវាសនារួមកម្ពុជា-ចិន។
លោកបានមានប្រសាសន៍នៅក្នុងសុន្ទរកថាក្នុងពិធីសម្ពោធផ្លូវក្រវ៉ាត់ក្រុងទីបីកាលពីថ្ងៃព្រហស្បតិ៍ថា “ផ្លូវនេះមានសារៈសំខាន់ខ្លាំងណាស់ក្នុងការដោះស្រាយកំណើនលំហូរចរាចរ និងការដឹកជញ្ជូនទំនិញនៅក្នុងរាជធានី” ។
ប្រមុខដឹកនាំកម្ពុជាបានបន្ថែមថា ផ្លូវនេះក៏បានតភ្ជាប់ផ្លូវសំខាន់ៗជាច្រើនរួមទាំងផ្លូវល្បឿនលឿនផងដែរ។
លោកបានមានប្រសាសន៍ថា “ផ្លូវនេះនឹងមិនត្រឹមតែកាត់បន្ថយការកកស្ទះចរាចរណ៍នៅកណ្តាលទីក្រុងប៉ុណ្ណោះទេ ប៉ុន្តែថែមទាំងរួមចំណែកដល់ការលើកកម្ពស់ពាណិជ្ជកម្ម ការវិនិយោគ ភស្តុភារ និងទេសចរណ៍ផងដែរ ដូច្នេះប្រជាជននឹងទទួលបានអត្ថប្រយោជន៍យ៉ាងច្រើនពីវា”។
រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល មានប្រសាសន៍ថា ផ្លូវនេះ គឺជាសរសៃឈាមសេដ្ឋកិច្ចដ៏មានសក្តានុពលសម្រាប់ប្រជាពលរដ្ឋក្នុងរាជធានីភ្នំពេញ និងខេត្តកណ្តាល។
លោកបន្តថា៖ «ផ្លូវក្រវ៉ាត់ក្រុងទី៣ នឹងជួយសម្រួលដល់ការដឹកជញ្ជូនទំនិញចូល និងចេញពីកំពង់ផែស្វយ័តភ្នំពេញ» ។ “វាបាននិងកំពុងប្រែក្លាយតំបន់នានានៅតាមបណ្តោយផ្លូវទៅជាតំបន់អភិវឌ្ឍន៍លំនៅដ្ឋាន មជ្ឈមណ្ឌលភស្តុភារកម្ម តំបន់សេដ្ឋកិច្ចពិសេស រោងចក្រ និងឃ្លាំង។”
លោក ចាន់ថុល បានថ្លែងអំណរគុណយ៉ាងជ្រាលជ្រៅចំពោះប្រទេសចិន ដែលបានផ្តល់ជំនួយយ៉ាងច្រើនដល់កម្ពុជា “ដោយគ្មានលក្ខណ្ឌ” ដោយលោកបញ្ជាក់ថា ជំនួយរបស់ចិនមានសារៈសំខាន់សម្រាប់ហេដ្ឋារចនាសម្ព័ន្ធ និងការអភិវឌ្ឍន៍សេដ្ឋកិច្ចសង្គមរបស់ព្រះរាជាណាចក្រកម្ពុជា។
Xinhua