លោក សុខ សូកេន រដ្ឋមន្ត្រីក្រសួងទេសចរណ៍ បានជួបពិភាក្សាការងារជាមួយលោក Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា ដើម្បីបង្កើនភាពជាដៃគូក្នុងវិស័យទេសចរណ៍ ក៏ដូចជាបញ្ហាទាក់ទងនឹងផលប្រយោជន៍ទៅវិញទៅមក។
ក្នុងជំនួបនោះ លោក សុខ សូកេន បានលើកឡើងពីគំនិតផ្តួចផ្តើមជាយុទ្ធសាស្រ្ត «BUILD plus 3Ds» ក្នុងគោលបំណងប្រែក្លាយកម្ពុជាទៅជាទិសដៅដ៏ស្វាហាប់ ការប្រកួតប្រជែង និរន្តរភាព និងរួមបញ្ចូលដោយផ្តោតលើការកសាងភាពជាដៃគូដ៏ល្អរវាងរដ្ឋាភិបាល វិស័យឯកជន និងប្រជាជន។
លោករដ្ឋមន្រ្តីបានស្នើសុំ ជំនួយពីសហរដ្ឋអាមេរិក ដើម្បីជួយផ្សព្វផ្សាយគោលដៅទេសចរណ៍ដ៏មានសក្តានុពលរបស់កម្ពុជាដល់ជនជាតិអាមេរិក និងលើកទឹកចិត្តអ្នកធ្វើដំណើរមកទស្សនាប្រទេសនេះ។
លោកបញ្ជាក់ថា ភ្ញៀវទេសចរមកពីបស្ចិមប្រទេសគឺស្ថិតក្នុងចំណោមទីផ្សារកំពូលទាំងដប់សម្រាប់ភ្ញៀវទេសចរមកកាន់កម្ពុជា។
មួយវិញទៀត ឯកអគ្គរដ្ឋទូតសហរដ្ឋអាមេរិក បានគូសបញ្ជាក់អំពីសារៈសំខាន់នៃវិស័យទេសចរណ៍ ដែលជាការរួមចំណែកដ៏សំខាន់សម្រាប់សេដ្ឋកិច្ចរបស់កម្ពុជា និងការអភិវឌ្ឍន៍ប្រកបដោយចីរភាព។ លោកបថា ទំនាក់ទំនងដ៏រឹងមាំរវាងប្រទេសទាំងពីរនឹងបើកច្រកផ្លូវបន្ថែមទៀតសម្រាប់អ្នកវិនិយោគមកពីសហរដ្ឋអាមេរិក។
ភាគីទាំងពីរក៏បានពិភាក្សាអំពីសក្តានុពលនៃអាកាស យានដ្ឋានអន្តរជាតិសៀមរាប-អង្គរថ្មី ដើម្បីទាក់ទាញភ្ញៀវទេសចរអន្តរជាតិ និងប្តេជ្ញាពង្រឹងកិច្ចសហប្រតិបត្តិការទេសចរណ៍ តាមរយៈការលើកកម្ពស់ការផ្លាស់ប្តូរវប្បធម៌ និងសេដ្ឋកិច្ច ពង្រឹងការតភ្ជាប់រវាងប្រជាជន និងប្រជាជន និងការបង្កើនផលប្រយោជន៍ និងការជឿទុកចិត្តគ្នាទៅវិញទៅមក។
ថ្លែងប្រាប់កាសែតខ្មែរថាមស៍ លោក Craig Dodge នាយកផ្នែកលក់ និងទីផ្សារនៃក្រុមសៀកនៃ ហ្វាពន្លឺសិល្ប: បានថ្លែងថា៖ «កង្វះការយល់ដឹងគឺជាឧបសគ្គដល់ការកើនឡើងភ្ញៀវទេសចរមកពីបរទេស ដោយសារអ្នកធ្វើដំណើរមិនដឹងថាមានអ្វីខ្លះនៅក្នុងប្រទេសកម្ពុជា។ ដូច្នេះយកល្អគួរតែជូនដំណឹងទៅគេអំពីកន្លែងទេសចរណ៍ល្អបំផុតក្នុងពិភពលោកដែលយើងមានដូចជាប្រាសាទអង្គរវត្ត ប្រាសាទកោះកេរ្តិ៍ និងឆ្នេរដ៏ស្រស់ស្អាត»។
លោកបន្តថា ដើម្បីធ្វើដូច្នេះ កម្ពុជាចាំបាច់ត្រូវជំរុញទីផ្សារនៃគោលដៅដែលមានសក្តានុពល ដើម្បីនាំមកនូវឥទ្ធិពលវិជ្ជមានដល់វិស័យទេសចរណ៍ និងទាក់ទាញភ្ញៀវទេសចរមកពីសហរដ្ឋអាមេរិក និងក្រៅប្រទេសជាទូទៅ។
លោកបានបន្ថែមថា ភ្នាក់ងារទេសចរណ៍ជាច្រើនបានខិតខំប្រឹងប្រែង និងចំណាយថវិកាយ៉ាងច្រើនទៅក្នុងយុទ្ធនាការទីផ្សារដ៏ទូលំទូលាយ ក្នុងគោលបំណងអប់រំ និងបំផុសគំនិតអ្នកធ្វើដំណើរ។
លោក Dodge បាននិយាយថា៖ «កិច្ចសហការនេះនឹងជួយអប់រំ និងបំផុសគំនិតប្រជាជនអាមេរិក និងជំរុញទេសចរណ៍»៕