រដ្ឋាបាលខេត្តព្រះសីហនុបានហាមនេសាទនិងចតនាវាគ្រប់ប្រភេទនៅលើគន្លងខ្សែបណ្តាញអគ្គិសនីដែលកប់ក្រោមបាតសមុទ្រ ដើម្បីចៀសវាងផលប៉ះពាល់ផ្សេងៗ។ ការហាមនេះត្រូវបានកំណត់ការបរិច្ឆេទជាអចិន្ត្រៃយ៍។
រដ្ឋបាលខេត្តព្រះសីហនុកាលពីថ្ងៃពុធបានប្រកាសពីការដាក់បំរាមនេះថា មូលហេតុនៃការហាមនេះ ដោយសារតែអគ្គិសនីកម្ពុជាបានកសាងខ្សែបណ្តាញអគ្គិសនីតង់ស្យុង២២គីឡូវ៉ុល និង៣៥គីឡូវ៉ុលតាមតំបន់ភូមិសាស្ត្រខេត្តព្រះសីហនុនិងខេត្តកោះកុង។
រដ្ឋបាលខេត្តព្រះសីហនុបន្តថា ខ្សែបណ្តាញអាកាសនិងខ្សែកប់ក្រោមបាតសមុទ្រឆ្លងកាត់កោះទទឹង កោះស្តេច កោះសាមិត កោះអំពិលតូច កោះអំពិលធំកោះស្មាច់ កោះស្រមោច កោះម្នាស់ កោះតាទាម និងកោះរ៉ុងដែលបានសម្ពោធដាក់ប្រើប្រាស់ជាផ្លូវការកាលពីថ្ងៃទី២១ ខែមិថុនា ឆ្នាំ២០២៣។
រដ្ឋបាលខេត្តព្រះសីហនុបានបញ្ជាក់ថា សាធារណជន ជាពិសេសម្ចាស់នាវាគ្រប់ប្រភេទ រួមមានទូក កាណូត កប៉ាល់ សាឡង់ ដែលធ្វើដំណើរឆ្លងកាត់តាមបណ្ដាកោះទាំងនេះហាមបោះយុថ្កានៅទីតាំងគន្លងខ្សែបណ្ដាញអគ្គិសនីកប់ក្រោមសមុទ្រ និងរក្សាគម្លាតប្រមាណ២០០ម៉ែត្រពីគន្លងខ្សែបណ្ដាញអគ្គិសនីកប់ក្រោមសមុទ្រ ដើម្បីបញ្ចៀសផលប៉ះពាល់លើខ្សែបណ្តាញអគ្គិសនីដែលអាចបង្កគ្រោះថ្នាក់ជាយថាហេតុ។
រដ្ឋបាលខេត្តបានណែនាំឱ្យពិនិត្យគំនូសប្លង់ហាមនេសាទនិងចតនាវាលើទីតាំងតាមគន្លងខ្សែបណ្តាញអគ្គិសនីកប់ក្រោមបាតសមុទ្រឱ្យបានច្បាស់លាស់។
លោក នួន អភិបាលក្រុងកោះរ៉ុង បាននិយាយថា ការហាមនេះមានរយៈពេលជាអចិន្ត្រៃយ៍ ពីព្រោះមានការរៀបចំគន្លងខ្សែបណ្ដាញអគ្គិសនីកប់ក្រោមសមុទ្រ ហើយវាក៏មិនមែនជាទីតាំងសម្រាប់នេសាទនោះទេ។
លោកបានបញ្ជាក់ថា សម្រាប់នៅកោះរ៉ុងមិនមានទូតច្រើនទេ ហើយប្រជាពលរដ្ឋកោះរ៉ុង គឺពួកគេបានយល់ដឹងពីបំរាមនេះរួចហើយ ប៉ុន្តែអាជ្ញាធរបានក្រើនរំលឹកបន្ថែមសម្រាប់អ្នកដំណើរនិងអ្នកនេសាទមកពីខាងស្ទឹងហាវ និងមកពីខាងខេត្តកោះកុង។
លោកបានលើកឡើងថា គន្លងខ្សែបណ្ដាញអគ្គិសនីដែលកប់ក្រោមបាតសមុទ្រ គឺមានប្រភពពីខាងខេត្តកោះកុងចាប់ពីតំបន់តារាសាគរ ពាមកាយ ហើយឆ្លងកាត់កោះម្នាស់ កោះតាទាមរហូតដល់កោះរ៉ុង ក្រុងកោះរ៉ុង ខេត្តព្រះសីហនុ។
លោកបន្តថា ការរៀបចំខ្សែបណ្ដាញអគ្គិសនីនេះ ដើម្បីចែកចាយសម្រាប់ប្រើប្រាស់ទូទាំងសង្កាត់កោះរ៉ុង និងមួយផ្នែកនៃសង្កាត់កោះរ៉ុងសន្លឹម។
លោកបន្ថែមថា៖ «យើងនៅមានការសិក្សាបន្ថែមទៀត ថាត្រូវពង្រីកអគ្គិសនីឱ្យទៅដល់កោះរ៉ុងសន្លឹម»៕