កាលពីថ្ងៃទី២៣ ខែតុលានៅទីក្រុងហាណូយនាយកដ្ឋានអន្តោប្រវេសន៍នៃក្រសួងនគរបាលវៀតណាម និងអគ្គនាយកដ្ឋានអន្តោប្រវេសន៍នៃក្រសួងមហាផ្ទៃកម្ពុជាបានរៀបចំកិច្ចប្រជុំពិភាក្សា និងផ្លាស់ប្តូរបទពិសោធន៍ស្តីពីការគ្រប់គ្រងជនអន្តោប្រវេសន៍។
ថ្លែងមតិក្នុងជំនួបនេះ លោកឧត្តមសេនីយ៍ត្រីPham Dang Khoa ប្រធាននាយកដ្ឋានអន្តោប្រវេសន៍បាននិយាយថា ក្រសួងទាំងពីរកំពុងសម្របសម្រួលយ៉ាងជិតស្និទ្ធដើម្បីធានាបាននូវសន្តិសុខជាតិ សណ្តាប់ធ្នាប់សង្គម និងប្រយុទ្ធប្រឆាំងនឹងឧក្រិដ្ឋកម្មឆ្លងដែន។
ភាគីទាំងពីរបានផ្លាស់ប្តូរព័ត៌មានជាប្រចាំ ដើម្បីទប់ស្កាត់ឧក្រិដ្ឋកម្ម ទាក់ទិននឹងការចេញ-ចូលដោយខុសច្បាប់។ ភាគីទាំងពីរក៏បានបង្កើតលក្ខខណ្ឌអំណោយផលសម្រាប់ប្រជាពលរដ្ឋនៃប្រទេសទាំងពីរក្នុងការឆ្លងកាត់ព្រំដែន និងជំរុញសកម្មភាពវិនិយោគ ពាណិជ្ជកម្ម និងទេសចរណ៍។
ក្នុងជំនួបនេះ តំណាងភាគីទាំងពីរបានពិភាក្សាអំពីរចនាសម្ព័ន្ធរៀបចំថ្មីរបស់នាយកដ្ឋានអន្តោប្រវេសន៍ គោលនយោបាយ និងបទប្បញ្ញត្តិថ្មីក្នុងការគ្រប់គ្រងអន្តោប្រវេសន៍ ការធ្វើដំណើរឆ្លងដែន និងការស្នាក់នៅរបស់ប្រជាពលរដ្ឋនៃប្រទេសទាំងពីរក្នុងទឹកដីនៃភាគីទាំងពីរ រួមទាំងស្ថានភាពនៃអន្តោប្រវេសន៍/ការធ្វើចំណាកស្រុកខុសច្បាប់ កិច្ចសហប្រតិបត្តិការទទួលប្រជាពលរដ្ឋមកវិញ និងការសម្របសម្រួលក្នុងការបណ្តុះបណ្តាលធនធានមនុស្ស។
ភាគីទាំងពីរបានឯកភាពបន្តអនុវត្តការងារសំខាន់ៗ រួមមានការពង្រឹងការត្រួតពិនិត្យ និងបើកការបង្ក្រាបលើគ្រឹះស្ថានដែលជួលកម្មករខុសច្បាប់។
កងកម្លាំងនគរបាលនៃប្រទេសទាំងពីរ ជាពិសេសអ្នកដែលធ្វើការនៅតាមតំបន់ព្រំដែន នឹងរឹតបន្តឹងកិច្ចសហប្រតិបត្តិការ និងបង្កើនការផ្លាស់ប្តូរព័ត៌មាន ដើម្បីទប់ស្កាត់ និងការដោះស្រាយការចេញ-ចូលដោយខុសច្បាប់។
ភាគីទាំងពីរក៏នឹងពង្រឹងសកម្មភាពទំនាក់ទំនង ដើម្បីជួយប្រជាជនឱ្យយល់កាន់តែច្បាស់អំពីគោលនយោបាយ និងបទប្បញ្ញត្តិរបស់ប្រទេសទាំងពីរ។
ក្រសួង ស្ថាប័ននានានៃប្រទេសកម្ពុជា និងវៀតណាមនឹងធ្វើការរួមគ្នាជំរុញការចរចាសម្រាប់ការចុះហត្ថលេខាលើកិច្ចព្រមព្រៀងស្តីពីច្រកទ្វារព្រំដែន និងបទប្បញ្ញត្តិស្តីពីការគ្រប់គ្រងច្រកព្រំដែនគោកវៀតណាម-កម្ពុជា ដើម្បីជំនួសកិច្ចព្រមព្រៀងឆ្នាំ ១៩៨៣។ កិច្ចព្រមព្រៀងថ្មីនេះត្រូវបានគេរំពឹងថានឹងបង្កើតមូលដ្ឋានច្បាប់សម្រាប់ការគ្រប់គ្រងជនអន្តោប្រវេសន៍ប្រកបដោយប្រសិទ្ធភាពជាងមុន។ VNA
Related Posts
- September 5, 2023
- January 10, 2023
- January 20, 2023
- December 19, 2022
