សម្តេចតេជោ ហ៊ុន សែន ប្រធានគណបក្សប្រជាជន និងជាអតីតនាយករដ្ឋមន្ត្រីកម្ពុជា បានផ្តល់អនុសាសន៍ថា ក្នុងករណីដែលរដ្ឋាភិបាលអ៊ីស្រាអែលថា ចាំបាច់ត្រូវតែជម្លៀសប្រជាពលរដ្ឋ និស្សិតកម្ពុជា ចេញ យើងកុំខ្លាច នៅក្នុងការចំណាយ ប្រាក់ជួលយន្តហោះពិសេសទៅដឹកនិស្សិតរបស់យើង ជាង៤០០នាក់ ចាកចេញ ពីប្រទេសអ៊ីស្រាអែល
សម្ដេចតេជោ ហ៊ុន សែន ប្រធានឧត្តមក្រុមប្រឹក្សាផ្ទាល់ព្រះមហាក្សត្របានលើកឡើងបែបនេះក្នុងឱកាសអញ្ជើញជាអធិបតីក្នុងពិធីបិទបញ្ចប់កញ្ចក់កាមេរ៉ា-ថតខ្សែភាពយន្តភាគរឿង ” កូនប្រុសក្រោមពន្លឺព្រះចន្ទពេញបូណ៌មី ” ដែលបានប្រព្រឹត្តិទៅកាលពីថ្ងៃច័ន្ទនៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ ក្នុងរាជធានីភ្នំពេញ។
ប៉ុន្តែសម្តេចតេជោជឿជាក់ថា អ៊ីស្រាអែលនឹងមិនមានសំណូមពរបែបនេះនោះទេ”
សម្តេចបានបន្ថែមថា «យើងកំពុងតាមដានសុវត្ថិភាពរបស់ពលរដ្ឋយើងនៅក្នុងប្រទេសអ៊ីស្រាអែលយ៉ាងយកចិត្តទុកដាក់។ យើងមិនត្រូវជម្លៀសប្រជាជនយើងទេ ប្រសិនបើរដ្ឋាភិបាលអ៊ីស្រាអែលមិនតម្រូវឱ្យយើងជម្លៀស។ ប្រសិនបើរត់ចោលអ៊ីស្រាអែលក្នុងគ្រាលំបាក ថ្ងៃក្រោយមិនបាច់សុំទៅរៀន ឬធ្វើការនៅទីនោះទេ។
សម្តេចបានអំពាវនាវ ដល់ប្រទេសអ៊ីស្រាអែល និងហាម៉ាស់ ប្រកាន់ភ្ជាប់នូវភាពអត់ធ្មត់ និងប្រកាន់យកនៅការចរចារគ្នា ដើម្បីឈានទៅបញ្ចប់ការឈប់បាញ់។
មានប្រជាជនកម្ពុជាប្រហែល៤៥០ នាក់ ភាគច្រើនជានិស្សិត កំពុងរស់នៅ និងសិក្សានៅប្រទេសអ៊ីស្រាអែល។
និស្សិតខ្មែរម្នាក់ត្រូវបានស្លាប់ក្នុងអំឡុងការប្រយុទ្ធគ្នារវាងអ៊ីស្រាអែល និងក្រុមហាម៉ាស់ ដែលបានផ្ទុះឡើងកាលពីថ្ងៃទី៧ ខែតុលា ឆ្នាំ២០២៣ បណ្តាលឲ្យមនុស្សរាប់រយនាក់ស្លាប់ និងរបួសទាំងសងខាង។
AKP