រដ្ឋាភិបាលសម្រេចតែងតាំងសមាសភាពគណៈកម្មាធិការជាតិសម្របសម្រួលកិច្ចការព័ត៌មាននិងសាធារណមតិ ដោយមានប្រធាន អនុប្រធាន រួមទាំងសមាជិកចំនួន១១រូប ដើម្បីការពារសមិទ្ធផល ស្នាដៃ និងកេរ្ដិ៍ឈ្មោះរបស់ព្រះរាជាណាចក្រកម្ពុជា។
តាមសេចក្ដីសម្រេចរបស់រដ្ឋាភិបាលចុះនៅថ្ងៃទី១២ ខែតុលា ឆ្នាំ២០២៣ បានតែងតាំងលោក ស្វាយ ស៊ីថា ទេសរដ្ឋមន្ត្រីទទួលបន្ទុកបេសកកម្មពិសេស ជាប្រធាន។ លោក នេត្រ ភក្ត្រា រដ្ឋមន្ត្រីក្រសួងព័ត៌មាន ជាអនុប្រធានទី១។ លោក ប៉ែន បូណា ប្រធានអង្គភាពអ្នកនាំពាក្យរដ្ឋាភិបាល ជាអនុប្រធានអចិន្ត្រៃយ៍។
ការសម្រេចតែងតាំងសមាសភាពពេលនេះ បន្ទាប់ពីរដ្ឋាភិបាលបានចេញអនុក្រឹត្យបង្កើតគណៈកម្មាធិការជាតិសម្របសម្រួលកិច្ចការព័ត៌មាននិងសាធារណមតិកាលពីថ្ងៃទី១ ខែកញ្ញា។
អនុក្រឹត្យបានចែងថា ពួកគេមានតួនាទីនិងភារកិច្ចពង្រឹងសាធារណមតិតាមរយៈការតាមដានក្ដាប់គ្រប់ស្ថានការណ៍ ឃោសនា ពន្យល់ និងការពាររូបភាពវិជ្ជមានរបស់កម្ពុជា។ ជាពិសេសការពារអធិបតេយ្យជាតិ ផ្សព្វផ្សាយសមិទ្ធផលរបស់រដ្ឋាភិបាល និងកសាងរូបភាពវិជ្ជមាននិងលើកកម្ពស់កិត្យានុភាពរបស់កម្ពុជាទាំងក្នុងស្រុកនិងលើឆាកអន្តរជាតិ។
បន្ថែមពីនេះ ពួកគេមានតួនាទីនិងភារកិច្ចជំរុញប្រសិទ្ធភាពការងារឆ្លើយតបព័ត៌មានក្លែងក្លាយតាមរយៈការរៀបចំយន្តការឆ្លើយតបឱ្យទាន់ពេលវេលាជាប្រព័ន្ធតួអង្គតែមួយ និងបង្កើនសមត្ថភាពយុទ្ធសាស្ត្របែបឌីជីថល។
លោក ប៉ែន បូណា ប្រធានអ្នកនាំពាក្យរដ្ឋាភិបាល ធ្លាប់ប្រាប់ខ្មែរថាមស៍ថា ការបង្កើតគណៈកម្មាធិការនេះមិនមែនជាការរំលោភសិទ្ធិសេរីភាពសារព័ត៌មានទេ ប៉ុន្តែដើម្បីប្រមូលព័ត៌មានឱ្យកាន់តែទូលំទូលាយដល់ប្រជាពលរដ្ឋ ច្បាស់លាស់និងរហ័សជាងមុន។
លោក ណុប វី នាយកប្រតិបត្តិសម្ព័ន្ធអ្នកសារព័ត៌មានកម្ពុជា ឬហៅកាត់ថា ខេមបូចា យល់ឃើញថា ប្រសិនបើគណៈកម្មាធិការខាងលើមានសកម្មភាពឬតួនាទីបន្ថែមពីលើប្រព័ន្ធផ្សព្វផ្សាយរបស់ជាតិក្នុងការជួយលើកកម្ពស់ ក៏ដូចជាការធានាការផ្សព្វផ្សាយព័ត៌មានជូនសាធារណជនកាន់តែល្អប្រសើរ នោះជារឿងដែលគួរទទួលសាទរចំពោះការបង្កើតគណៈកម្មាធិការនេះឡើង។
លោកបន្តថា៖ «ការផ្សព្វផ្សាយព័ត៌មានជូនសាធារណជនមានសារៈសំខាន់ខ្លាំងណាស់ ព្រោះវាជាការចាំបាច់ដើម្បីធានាដល់សិទ្ធិទទួលបានព័ត៌មានសម្រាប់ប្រជាពលរដ្ឋ ប៉ុន្តែការផ្ដល់ផលប្រយោជន៍ដល់សាធារណជនដោយគណៈកម្មាធិការនេះ គឺអាស្រ័យលើតួនាទី ភារកិច្ច លទ្ធភាព និងសមត្ថភាពរបស់ពួកគេ»។
លោកបាននិយាយថា៖ «ដូច្នេះមិនគួរមានការសម្របសម្រួលទេ។ វាលើកលែងតែករណីផ្ដល់មធ្យោបាយសម្របសម្រួលឱ្យការបញ្ចេញមតិកាន់តែផុសផុលឡើងជាងមុន»៕