អង្គការស្បៀងអាហារ និងកសិកម្មនៃអង្គការសហប្រជាជាតិ (FAO) បានសហការជាមួយសហភាពអឺរ៉ុប ដើម្បីអនុវត្តកម្មវិធីពង្រឹងសមត្ថភាពក្នុងគោលបំណងលើកកម្ពស់ការគ្រប់គ្រងជលផលនៅកម្ពុជា។ កម្មវិធីនេះត្រូវបានបង្កើតឡើងក្នុងគោលបំណងការពារ ស្តារធនធានត្រី និងជម្រកសំខាន់ៗដូចជា ផ្កាថ្ម និងស្មៅសមុទ្រ ដែលមានសារៈសំខាន់សម្រាប់ការបង្កកំណើត ការលូតលាស់ ការចិញ្ចឹម និងទីជម្រករបស់ត្រី។ គោលបំណងគឺធានានូវការប្រើប្រាស់ធនធានប្រកបដោយចីរភាព ទន្ទឹមនឹងការលើកកម្ពស់ជីវភាពរស់នៅរបស់សហគមន៍នេសាទតាមសមុទ្រ។
ការគ្រប់គ្រងជលផលប្រកបដោយប្រសិទ្ធភាពមានតួនាទីយ៉ាងសំខាន់ក្នុងការបង្កើនកំណើនជលផលសមុទ្រ។ វាធានាថាធនធានត្រូវបានប្រើប្រាស់សម្រាប់វិស័យសេដ្ឋកិច្ចប្រកបដោយប្រសិទ្ធភាព និងចីរភាព ដែលផ្តល់អត្ថប្រយោជន៍ទាំងដល់កំណើនត្រី និងសហគមន៍នេសាទ។ ដូច្នេះ អង្គការ FAO និងរដ្ឋបាលជលផល បានផ្តួចផ្តើមកម្មវិធីបណ្តុះបណ្តាលសម្រាប់មន្ត្រីផ្នែកជលផល និងអ្នកពាក់ព័ន្ធផ្សេងទៀត ដើម្បីលើកកម្ពស់ចំណេះដឹងរបស់ពួកគេអំពីការគ្រប់គ្រងជលផល ដោយផ្តោតលើការការពារធនធានត្រី និងជម្រក។
លោក បួយ រតនា អគ្គនាយករងដ្ឋានរដ្ឋបាលជលផលបានសង្កត់ធ្ងន់លើសារៈសំខាន់នៃការគ្រប់គ្រងបរិមាណត្រីតាមរយៈសកម្មភាពនេសាទដើម្បីធានាធនធានត្រីប្រកបដោយចីរភាព។ លោកកត់សម្គាល់ថា កិច្ចសហការរវាងភាគីពាក់ព័ន្ធមានសារៈសំខាន់ណាស់ក្នុងការរៀបចំ និងអនុវត្តដំណោះស្រាយ ដើម្បីកាត់បន្ថយសកម្មភាពដែលជះឥទ្ធិពលអវិជ្ជមានដល់ធនធានជលផល ទីជម្រក និងប្រាក់ចំណូល។ តាមរយៈការដាក់គោលដៅត្រឹមត្រូវរវាងភាគីពាក់ព័ន្ធ កិច្ចខិតខំប្រឹងប្រែងដើម្បីការពារ និងស្តារធនធានត្រីនឹងត្រូវបានពង្រឹង។
រដ្ឋបាលជលផលបានចាត់វិធានការយ៉ាងសកម្មក្នុងការដោះស្រាយបញ្ហាប្រឈមទាំងនេះ ដោយបង្កើតផែនការគ្រប់គ្រងជលផលសមុទ្រ។ ផែនការនេះ បច្ចុប្បន្នកំពុងរង់ចាំការអនុម័ត ហើយវានឹងផ្តល់នូវក្របខ័ណ្ឌសម្រាប់ការស្តារ និងការពារធនធានត្រី និងជម្រកសំខាន់ៗ។ ជាងនេះទៅទៀត ផែនការនេះអាចធានាថាក្រុមអ្នកប្រើប្រាស់ជាច្រើនទទួលបានអត្ថប្រយោជន៍ពីការនេសាទត្រីប្រកបដោយនិរន្តរភាព។ ផែនការនេះត្រូវបានបង្កើតឡើងតាមរយៈកិច្ចពិគ្រោះយោបល់ជាមួយអ្នកពាក់ព័ន្ធគ្រប់លំដាប់ថ្នាក់ រួមទាំងអាជ្ញាធរមូលដ្ឋាន និងសហគមន៍នេសាទ ដែលដើរតួយ៉ាងសំខាន់ក្នុងការធ្វើការសម្រេចចិត្ត។
ដើម្បីកសាងសមត្ថភាព និងបង្កើនការយល់ដឹងអំពីបច្ចេកទេសគ្រប់គ្រងជលផល អង្គការ FAO កំពុងបើកវគ្គបណ្តុះបណ្តាលនៅខេត្តកែប និងកំពត។ វគ្គបណ្តុះបណ្តាលនេះប្រមូលផ្តុំតំណាងចំនួន៦០ នាក់មកពីរាជធានីភ្នំពេញ និងខេត្តជាប់មាត់សមុទ្រ ដោយផ្តល់ឱ្យពួកគេនូវចំណេះដឹង និងជំនាញជាក់ស្តែងក្នុងការគ្រប់គ្រងធនធានជលផលសមុទ្រប្រកបដោយប្រសិទ្ធភាព។ វគ្គនេះមានការធ្វើសកម្មភាពជាក្រុម និងសម្តែង ដើម្បីឱ្យអ្នកចូលរួមអនុវត្តបច្ចេកទេសនិងអាចព្យាករណ៍ពីស្ថានភាពត្រី។
នៅពេលដែលវគ្គបណ្តុះបណ្តាលត្រូវបានបញ្ចប់ ផែនការគ្រប់គ្រងជលផលសមុទ្រនឹងឆ្លងកាត់ការអនុម័តចុងក្រោយ ហើយគ្រោងនឹងដាក់ឱ្យដំណើរការនៅដើមឆ្នាំក្រោយ។ គម្រោងនេះនឹងបង្ហាញពីការបោះជំហានទៅមុខយ៉ាងសំខាន់ក្នុងការគ្រប់គ្រងជលផលសមុទ្រប្រកបដោយចីរភាពនៅក្នុងប្រទេសកម្ពុជា ដោយបង្ហាញនូវសក្តានុពលសម្រាប់ការអភិរក្ស ការអនុលោមតាមច្បាប់ និងបទប្បញ្ញត្តិជលផលកាន់តែប្រសើរ និងបង្កើនឱកាសអភិវឌ្ឍន៍សម្រាប់សហគមន៍នេសាទសមុទ្រ។
ការអភិវឌ្ឍន៍ផែនការគ្រប់គ្រងជលផលសមុទ្របានធ្វើឡើងតាមរយៈការគាំទ្រផ្នែកហិរញ្ញវត្ថុពីសហភាពអឺរ៉ុប ក្រោមជំនួយបន្ថែមរបស់អង្គការ FAO សម្រាប់កម្មវិធីជំរុញកំណើនវិស័យជលផលប្រកបដោយចីរភាព (CAPFISH-Capture)។ វាក៏ផ្តោតលើការពង្រឹងអភិបាលកិច្ច និងគ្រប់គ្រងជលផល ដើម្បីទប់ស្កាត់ និងលុបបំបាត់ការនេសាទខុសច្បាប់។
គោលដៅរួមនៃ CAPFISH-Capture គឺដើម្បីរួមចំណែកដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការសម្រេចបាននូវការអភិវឌ្ឍន៍ធនធានជលផលទឹកសាប និងសមុទ្រប្រកបដោយចីរភាព ភាពធន់ និងបរិយាប័ន្នដែលអាចរួមចំណែកដល់សន្តិសុខស្បៀង និងការកាត់បន្ថយភាពក្រីក្រ។ តាមរយៈការធ្វើអោយប្រសើរឡើងនូវការអភិរក្ស ការគ្រប់គ្រង និងការអនុលោមតាមបទប្បញ្ញត្តិជលផល កម្មវិធីនេះមានគោលបំណងអភិវឌ្ឍធនធានជលផលក្រោយការប្រមូលផល និងលើកកម្ពស់ភាពធន់របស់សហគមន៍នេសាទនៅតំបន់ទន្លេសាប និងតំបន់ឆ្នេរ។
លោកបានបន្តថា “ការចូលរួមពីភាគីពាក់ព័ន្ធគឺមានសារៈសំខាន់សម្រាប់អនុវត្តដំណោះស្រាយនឹងពង្រឹងកិច្ចខិតខំប្រឹងប្រែងដើម្បីកាត់បន្ថយផលប៉ះពាល់អវិជ្ជមានលើធនធានជលផល ទីជម្រក និងប្រាក់ចំណូល។ តាមរយៈការធ្វើការរួមគ្នាជាមួយនឹងគោលដៅរួម យើងអាចបង្កើតបរិយាកាសអំណោយផល និងអាចព្យាករណ៍ប្រភពត្រីបាន” ។ FAO