លោកនាយករដ្ឋមន្ត្រី ហ៊ុន ម៉ាណែត បាននិយាយនៅក្នុងទីក្រុង Melbourne កាលពីថ្ងៃអាទិត្យថា ក្រុមហ៊ុនចិនមួយនឹងវិនិយោគក្នុងទំហំទឹកប្រាក់ចំនួន១ ពាន់លានដុល្លារក្នុងការផលិតសំបកកង់រថយន្ត។
ក្នុងពិធីសំណេះសំណាលជាមួយប្រជាជនកម្ពុជាដែលកំពុងរស់នៅប្រទេសអូស្ត្រាលី និងនូវែលសេឡង់ លោកនាយករដ្ឋមន្រ្តីបានលើកឡើងពីសមិទ្ធផលដែលរាជរដ្ឋាភិបាលកម្ពុជាសម្រេចបាន ។
លោកបានបន្តថា ចាប់តាំងពីរាជរដ្ឋាភិបាលកម្ពុជាថ្មីចូលកាន់តំណែងកាលពីប្រាំមួយខែមុន ក្រុមប្រឹក្សាអភិវឌ្ឍន៍កម្ពុជាបានសម្រេចចុះបញ្ជីគម្រោងវិនិយោគចំនួន១៧២ ដែលមានទុនវិនិយោគសរុបជិត៤ ពាន់លានដុល្លារទាំងពីអ្នកវិនិយោគក្នុងស្រុក និងក្រៅស្រុក ដែលនឹងបង្កើតឱកាសការងារចំនួន ១៩០.០០០ កន្លែងសម្រាប់ប្រជាពលរដ្ឋក្នុងប្រទេស។
លោកបានបន្ថែមថា នៅថ្ងៃស្អែក លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នឹងជួបជាមួយគណៈប្រតិភូចិន និងតំណាងក្រុមហ៊ុនចំនួន ១៥០ ហើយថា រោងចក្រផលិតសំបកកង់មួយបានបង្ហាញគោលបំណងរបស់ខ្លួនក្នុងការ វិនិយោគក្រោមទំហំទឹកប្រាក់ចំនួន១ ពាន់លានដុល្លារនៅក្នុងប្រទេសរបស់យើង។
លោកបានលើកឡើងទៀតថា ដោយសារការជឿទុកចិត្តមកលើរាជរដ្ឋាភិបាលកម្ពុជាក្រុមហ៊ុនដែលមានស្រាប់បានស្នើសុំពង្រីកប្រតិបត្តិការអាជីវកម្មរបស់ពួកគេទៅកាន់វិស័យសក្តានុពលជាច្រើនទៀតជាមួយនឹងទុនសរុបពី២០០ ទៅ៥០០ លានដុល្លារសម្រាប់ក្រុមហ៊ុននីមួយៗ ដែលនឹងបង្កើតឱកាសការងារកាន់តែច្រើនសម្រាប់ប្រជាជនរបស់យើង។
លោកបានបញ្ជាក់ផងដែរថា នៅថ្ងៃស្អែក (ថ្ងៃអង្គារ) លោកនឹងជួបជាមួយវិស័យឯកជនអូស្ត្រាលី ដើម្បីទាក់ទាញការវិនិយោគបន្ថែមទៀត តាមរយៈវេទិកាធុរកិច្ចកម្ពុជា-អូស្ត្រាលី ដែលមានក្រុមហ៊ុនជាង ២០០ មកពីប្រទេសទាំងពីរនឹងចូលរួម។ “វេទិកានេះនឹងអនុញ្ញាតឱ្យវិនិយោគិនភ្ជាប់ប្រតិបត្តិការអាជីវកម្មរបស់ពួកគេ”។
ដោយជម្រះមន្ទិលដែលថាកម្ពុជាទាក់ទាញតែការវិនិយោគពីប្រទេសចិន ឬប្រទេសដែលជ្រើសរើសមួយចំនួននោះ លោកបានមានប្រសាសន៍ថាវាមិនពិតទេ ដោយបន្ថែមថា៖ «ខ្ញុំបានទៅប្រទេសជាច្រើនដើម្បីទាក់ទាញការវិនិយោគ ហើយខ្ញុំស្វាគមន៍ការវិនិយោគពីអ្នករាល់គ្នា។ នេះមានន័យថាខ្ញុំមិនអាចទាក់ទាញក្រុមហ៊ុនទាំងអស់ដែលខ្ញុំបានជួបនោះទេ។ ខ្ញុំចាត់ទុកថាវាជាសមិទ្ធផលដ៏អស្ចារ្យ ប្រសិនបើមានក្រុមហ៊ុន១ ឬ២បានសម្រេចមកវិនិយោគក្នុងប្រទេសយើង»។
លោកបានបញ្ជាក់ថា គោលបំណងនៃការវិនិយោគទាំងនេះ គឺបង្កើតឱកាសការងារដែលនឹងលើកកម្ពស់ជីវភាពរស់នៅរបស់ប្រជាពលរដ្ឋយើង ហើយនេះគឺជាអាទិភាពរបស់រដ្ឋាភិបាលថ្មីនេះ។
លោកនាយករដ្ឋមន្ត្រីបានលើកឡើងពីការគ្រប់គ្រងសេដ្ឋកិច្ចជាតិថាជាឈាមក្នុងរាងកាយដែលដំណើរការគ្រប់សរសៃសម្រាប់សុខភាពមនុស្ស ដូច្នេះដើម្បីលើកកម្ពស់សេដ្ឋកិច្ចជាតិឱ្យកាន់តែប្រសើរឡើង យើងត្រូវបង្កើតការងារនៅគ្រប់ទីកន្លែង ជាពិសេសសម្រាប់ប្រជាជននៅថ្នាក់មូលដ្ឋាន។
ថ្នាក់ដឹកនាំដែលបានចូលរួមក្នុងកិច្ចប្រជុំនោះ រួមមាន លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា លោកសុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិលោក ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម និងលោក គិត ម៉េង ប្រធានសភាពាណិជ្ជកម្មកម្ពុជា រួមជាមួយនឹងមន្ត្រីជាន់ខ្ពស់រាជរដ្ឋាភិបាល ផ្សេងទៀត។