រដ្ឋមន្ត្រីក្រសួងរ៉ែនៃបណ្តាប្រទេសសមាជិកអាស៊ានបានឯកភាពគ្នាក្នុងការជំរុញតំបន់អាស៊ានឱ្យក្លាយជាគោលដៅវិនិយោគរ៉ែប្រកបដោយចីរភាព និងបន្តកិច្ចសហប្រតិបត្តិការកែលម្អការអភិវឌ្ឍរ៉ែជាមួយនឹងអភិបាលកិច្ច សេដ្ឋកិច្ច សង្គម និងបរិស្ថាន។
ការអនុម័តរួម ត្រូវបានធ្វើឡើងនៅក្នុងកិច្ចប្រជុំរដ្ឋមន្ត្រីរ៉ែអាស៊ានលើកទី៩និងកិច្ចប្រជុំពាក់ព័ន្ធក្រោមប្រធានបទ ការជំរុញអាស៊ានឱ្យក្លាយជាគោលដៅវិនិយោគរ៉ែប្រកបដោយចីរភាព ដែលត្រូវបានប្រារព្ធធ្វើឡើងនៅថ្ងៃទី២៣ ខែវិច្ឆិកា ក្រោមអធិបតីភាព លោក កែវ រតនៈ រដ្ឋមន្ត្រីក្រសួងរ៉ែ និងថាមពល។
កិច្ចប្រជុំនេះត្រូវបានបន្តដោយកិច្ចប្រជុំមន្ត្រីជាន់ខ្ពស់អាស៊ានលើកទី២៣ ស្តីពីរ៉ែ និងកិច្ចប្រជុំពិភាក្សាបូកបីលើកទី១៦ និងកិច្ចប្រជុំលើកទី៧ នៃក្រុមប្រឹក្សាសម្រាប់ពានរង្វាន់រ៉ែអាស៊ាន។
កិច្ចប្រជុំរដ្ឋមន្រ្តីរ៉ែអាស៊ានលើកទី៩ និងពិធីប្រគល់ពានរង្វាន់រ៉ែអាស៊ានលើកទី៣ក៏ត្រូវបានប្រារព្ធឡើងដំណាលគ្នាផងដែរ។
កិច្ចប្រជុំរដ្ឋមន្រ្តីរ៉ែអាស៊ានលើកទី៩ បានអនុម័តសេចក្តីប្រកាសស្តីពីការជំរុញអាស៊ានឱ្យក្លាយជាគោលដៅវិនិយោគរ៉ែប្រកបដោយចីរភាព ដែលបញ្ជាក់ពីការប្តេជ្ញាចិត្តរួមគ្នារបស់អាស៊ានក្នុងការអភិវឌ្ឍធនធានរ៉ែរបស់ខ្លួន និងរួមចំណែកក្នុងការធានាការផ្គត់ផ្គង់លោហៈ និងរ៉ែឱ្យបានគ្រប់គ្រាន់ និងមានស្ថិរភាព ដើម្បីបំពេញតម្រូវការរ៉ែដែលកំពុងកើនឡើងនៅទូទាំងតំបន់អាស៊ាន ខណៈលើកទឹកចិត្តឱ្យក្រុមហ៊ុនរ៉ែជំរុញការប្រកួតប្រជែងក្នុងតំបន់ និងបន្តចូលទៅកាន់ទីផ្សារពិភពលោក។
សេចក្តីថ្លែងការណ៍បានលើកឡើងពីឱកាសដែលទទួលបានពីនិន្នាការផ្លាស់ប្តូរនៃតម្រូវការរ៉ែសកល និងការរំពឹងទុកនៃការប្រើប្រាស់សារធាតុរ៉ែ ដែលត្រូវបានជំរុញដោយការវិវឌ្ឍនៅក្នុងពិភពលោកឆ្ពោះទៅរកបច្ចេកវិទ្យាកាបូនទាប និងតម្រូវការថាមពល រួមទាំងបដិវត្តឌីជីថល បន្ថែមពីលើតម្រូវការវត្ថុធាតុដើមផ្សេងៗសម្រាប់កំណើនសេដ្ឋកិច្ចទំនើប។
កិច្ចប្រជុំក៏បានផ្តល់អនុសាសន៍ដល់រដ្ឋមន្ត្រីរ៉ែអាស៊ាននិងក្រុមការងារ ក្នុងការអភិវឌ្ឍទស្សនវិស័យនៃការអភិវឌ្ឍកិច្ចសហប្រតិបត្តិការរ៉ែអាស៊ាន ដើម្បីកំណត់ពីការអភិវឌ្ឍន៍រីកចម្រើនរបស់អាស៊ានជាទិសដៅវិនិយោគក្នុងតំបន់ ដែលអាចរួមចំណែកដ៏សំខាន់ដល់ការធ្វើពិពិធកម្មខ្សែច្រវ៉ាក់ផ្គត់ផ្គង់សកល។
AKP-ជា វណ្ណៈ