រដ្ឋមន្ត្រីក្រសួងធនធានទឹក និងឧតុនិយម បានទទួលជួបគណៈប្រតិភូជាន់ខ្ពស់នៃធនាគារពិភពលោក ដើម្បីរៀនពីគ្នាទៅវិញទៅមកអំពីគម្រោងសន្តិសុខទឹក និងប្រព័ន្ធធារាសាស្ត្រ។
លោករដ្ឋមន្រ្តីបានជួបជាមួយលោកស្រី Maria Angelica Sotomayor ប្រធានទទួលបន្ទុកផ្នែកទឹកប្រចាំតំបន់អាស៊ីខាងកើត និងប៉ាស៊ីហ្វិកនៃធនាគារពិភពលោក និងក្រុមការងារនៅថ្ងៃទី១៩ខែមីនា ឆ្នាំ ២០២៤ នៅទីស្តីការក្រសួង។
លោកបានគូសបញ្ជាក់អំពីអាទិភារបស់រាជរដ្ឋាភិបាលក្នុងការជួយដល់កំណើនសេដ្ឋកិច្ចសង្គមប្រកបដោយចីរភាពរបស់កម្ពុជា ក៏ដូចជាវឌ្ឍនភាព និងបញ្ហាប្រឈមក្នុងវិស័យធនធានទឹក។
លោកបានស្នើឱ្យធនាគារពិភពលោកពិចារណាគាំទ្រដល់ការពង្រឹងគោលនយោបាយជាតិ និងការអភិវឌ្ឍសមត្ថភាពស្ថាប័នក្នុងវិស័យសន្តិសុខទឹក និងប្រព័ន្ធធារាសាស្ត្រ ទាំងថ្នាក់ជាតិ និងថ្នាក់ក្រោមជាតិ។
ភាគីទាំងពីរក៏បានពិភាក្សាលើការស្តារឡើងវិញនូវហេដ្ឋារចនាសម្ព័ន្ធធារាសាស្ត្រ ផែនការគ្រប់គ្រងទន្លេសាប និងទន្លេមេគង្គ និងគម្រោងសកម្មដែលគាំទ្រដោយធនាគារពិភពលោក។
ផ្អែកតាមលោកស្រី Maria Angelica Sotomayor គម្រោងសន្តិសុខទឹកនឹងត្រូវដាក់ជូនគណៈកម្មការនាយកធនាគារពិភពលោក ដើម្បីអនុម័តក្នុងខែមេសាខាងមុខនេះ។AKP