ក្រសួងអប់រំ យុវជន និងកីឡា បានណែនាំមន្ទីរអប់រំគ្រប់រាជធានីខេត្ត គណៈកម្មការអភិវឌ្ឍន៍កម្រងសាលារៀន និងគណៈគ្រប់គ្រងគ្រឹះស្ថានបឋមសិក្សារៀបចំការប្រឡងប្រណាំងអំណាននៅថ្នាក់កម្រិតបឋមសិក្សា ខណៈក្រសួងបានកំណត់ការពង្រឹងការបង្រៀននិងរៀនភាសាខ្មែរនៅកម្រិតបឋមសិក្សា។
សេចក្ដីណែនាំរបស់ក្រសួងអប់រំ យុវជន និងកីឡា កាលពីថ្ងៃចន្ទ បានឱ្យដឹងថា ការប្រឡងប្រណាំងនេះផ្ដោតសំខាន់លើសមត្ថភាពអាន សរសេរ ស្ដាប់ និងនិយាយ ដែលជាគន្លឹះលើកកម្ពស់អក្ខរកម្ម បណ្ដុះទម្លាប់អាន ជំរុញវប្បធម៌អាន និងលើកកម្ពស់សមត្ថភាពអានរបស់សិស្ស។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងក្នុងសេចក្ដីប្រកាសថា ការប្រឡងប្រណាំងអំណានត្រូវរៀបចំអនុវត្តតាមកម្រិតថ្នាក់រៀន សាលារៀន កម្រងសាលារៀន និងក្រុងស្រុក ខណ្ឌ។
លោកថា នៅកម្រិតថ្នាក់រៀន គ្រូបង្រៀនត្រូវដឹកនាំរៀបចំការប្រឡងប្រណាំងអំណាននៅកម្រិត ថ្នាក់រៀនប្រចាំសប្តាហ៍ ឬស្របតាមខ្លឹមសារមេរៀនអំណាន ហើយរៀបចំបញ្ជីឈ្មោះដែលទទួលជ័យលាភីក្នុងថ្នាក់ ដើម្បីចូលរួមប្រឡងប្រណាំងនៅកម្រិតសាលារៀន។
លោកបន្តថា សម្រាប់កម្រិតសាលារៀន គណៈគ្រប់គ្រងសាលាត្រូវដឹកនាំរៀបចំការប្រឡងប្រណាំងអំណាននៅកម្រិតសាលារៀនប្រចាំខែ ហើយផ្តល់រង្វាន់លើកទឹកចិត្តដល់ជ័យលាភីតាមលទ្ធភាពនិងធនធានដែលមាន និងអាចលើកសរសើរជាសាធារណៈតាមបណ្តាញសង្គមជាដើម។ បន្ទាប់មកគណៈគ្រប់គ្រងសាលាត្រូវពិនិត្យនិងអនុម័តលើបញ្ជីឈ្មោះសិស្សដែលទទួលជ័យលាភីក្នុងសាលារៀន ដើម្បីចូលរួមប្រឡងប្រណាំងកម្រិតកម្រងសាលារៀន។
លោកបន្ថែមថា ការប្រឡងប្រណាំងកម្រិតកម្រងសាលារៀន ប្រធានកម្រងសាលារៀនត្រូវដឹកនាំរៀបចំការប្រឡងប្រណាំងអំណានប្រចាំត្រីមាសឬឆមាស ហើយផ្តល់រង្វាន់លើកទឹកចិត្តដល់ជ័យលាភីទៅតាមលទ្ធភាព ហើយប្រធានកម្រងសាលារៀនពិនិត្យនិងអនុម័តលើបញ្ជីឈ្មោះសិស្សដែលទទួលជ័យលាភីក្នុងកម្រងសាលារៀន ដើម្បីចូលរួមប្រឡងប្រណាំងកម្រិតក្រុង ស្រុក ខណ្ឌ។
បន្ទាប់មកទៀតរដ្ឋបាលក្រុង ស្រុក ខណ្ឌ ត្រូវដឹកនាំរៀបចំការប្រឡងប្រណាំងប្រចាំឆមាសឬប្រចាំឆ្នាំ ហើយផ្តល់រង្វាន់លើកទឹកចិត្តដល់ជ័យលាភីទៅតាមលទ្ធភាព និងធនធានដែលមាន និងអាចលើកសរសើរជាសាធារណៈតាមរយៈបណ្តាញសង្គមជាដើម។
លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានបញ្ជាក់ថា ក្រសួងបានដាក់សាកល្បងកញ្ចប់អំណានថ្នាក់ដំបូងនៅតាមបណ្ដាខេត្តមួយចំនួនចាប់តាំងពីឆ្នាំ២០០៩ ដើម្បីលើកកម្ពស់អក្ខរកម្ម ក៏ដូចជាបណ្ដុះទម្លាប់អានរបស់សិស្ស ហើយមកក្រសួងបានដាក់អនុវត្តទូទាំប្រទេសបន្ទាប់ពីបានទទួលជោគជ័យលើការសាកល្បង។
លោកស្រីថា ក្រសួងអប់រំបានឈានមួយជំហានទៀតពាក់ព័ន្ធនឹងការប្រឡងប្រណាំងអំណាន ដើម្បីជំរុញការអានកម្រិតបឋមសិក្សាកាន់តែមានការផុសផុល។
លោកស្រីបាននិយាយថា៖ «ការរីកចម្រើនប្រព័ន្ធឌីជីថលជាជម្រើសប្រសើរជាងមុនសម្រាប់អ្នកអានស្វែងរកឯកសារ ឬក៏សិក្សាបន្ថែមដែលទាមទារសិស្សមានសមត្ថភាពវិភាគទិន្នន័យដែលពួកគេបានទទួលពីការអាន។ ដូច្នេះការប្រឡងប្រណាំងអំណានកម្រិតបឋម ជាមូលដ្ឋានគ្រឹះសម្រាប់ពួកគេ»។
លោកស្រីបន្ថែមថា៖ «តាមរយៈសេចក្ដីណែនាំខាងលើ ក្រសួងបានពង្រឹងគុណភាព សមត្ថភាពសិស្សកាន់តែប្រសើរឡើងបន្ថែមទៀតនៅកម្រិតសាលារៀនទូទាំងប្រទេស»។
លោក កាន់ ពុទ្ធី អនុប្រធាននាយកដ្ឋានបឋមសិក្សាធ្លាប់បានលើកឡើងពាក់ព័ន្ធនឹងការអានថា នាយកដ្ឋានបឋមសិក្សាកំពុងតែធ្វើកិច្ចការពាក់ព័ន្ធនឹងអំណានថ្នាក់ដំបូងនៅកម្ពុជា ដែលផ្ដោតសំខាន់លើមូលដ្ឋានគ្រឹះផ្នែកអំណានសម្រាប់កុមារ ជាពិសេសសម្រាប់កុមាររៀនថ្នាក់ទី១នៃកម្រិតបឋមសិក្សា៕