គណៈកម្មការរៀបចំពិព័រណ៌សៀវភៅក្នុងទិវាជាតិអំណានបានលើកឡើងថា ពិព័រណ៌សៀវភៅក្នុងទិវាអំណានដែលរៀបចំធ្វើនៅវិទ្យាស្ថានបច្ចេកវិទ្យាបានទាក់ទាញចំណាប់អារម្មណ៍យុវជនជាច្រើន។ វាជាសញ្ញាដ៏វិជ្ជមានមួយដែលបង្ហាញពីជោគជ័យចំពោះវិស័យអំណាន។
ទិវាជាតិអំណាន១១មីនាក្នុងឆ្នាំនេះប្រារព្ធធ្វើក្រោមប្រធានបទ «អំណានជាមូលដ្ឋានគ្រឹះទាំងអស់គ្នាក្នុងជីវិត» ដើម្បីបណ្ដុះទម្លាប់អាន ជំរុញវប្បធម៌អាន លើកកម្ពស់សមត្ថភាពអាន ស្មូត្រកំណាព្យ និងការតែងនិពន្ធ ដើម្បីរួមចំណែកការពារនិងពង្រឹងវប្បធម៌ អរិយធម៌ខ្មែរដល់សិស្ស និស្សិត មន្ត្រីរាជការ ប្រជាជនគ្រប់រូបនៅក្នុងប្រទេសកម្ពុជា ព្រមទាំងលើកកម្ពស់ និងរក្សាគុណតម្លៃកេរដំណែលរបស់មនុស្សជាតិ។
ក្រសួងអប់រំ យុវជន និងកីឡា បានសហការជាមួយភាគីពាក់ព័ន្ធនឹងរៀបចំពិព័រណ៍សៀវភៅនៅវិទ្យាស្ថានបច្ចេកវិទ្យារយៈពេលបីថ្ងៃដោយចាប់ផ្ដើមនៅថ្ងៃទី៩ ហើយបញ្ចប់ទៅវិញនៅថ្ងៃទី១១ ខែមីនា ដើម្បីចូលរួមអបអរសាទរការប្រារព្ធទិវាជាតិអំណានលើកទី៩ ដែលជាចំណែកមួយក្នុងការលើកស្ទួយដល់ការអាននិងការតាក់តែងនិពន្ធសៀវភៅនៅកម្ពុជា។
នៅក្នុងទិវាជាតិអំណានក៏មានការប្រកួតប្រជែងការអាន ស្មូត្រកំណាព្យ និងតែងនិពន្ធជ្រើសរើសជ័យលាភីថ្នាក់ជាតិ «ពានរង្វាន់សម្ដេចតេជោ ហ៊ុន សែន» ដែលបានប្រកាសជ័យលាភីពីម្សិលមិញ។
លោក ហុក សុទ្ធិ នាយកអង្គការស៊ីប៉ា និងជាគណៈកម្មការរៀបចំពិព័រណ៌សៀវភៅក្នុងទិវាជាតិអំណានបានថ្លែងថា ថ្ងៃដំបូងនៃពិព័រណ៌សៀវភៅនេះបានទាក់ទាញចំណាប់អារម្មណ៍ចូលរួមប្រមាណជាង ១៥ ០០០នាក់។
ដូច្នេះចំនួនអ្នកចូលរួមពិព័រណ៌សៀវភៅក្នុងរយៈពេលបីថ្ងៃកើនឡើងដល់ជាង ៦០ ០០០នាក់។
លោកថា យុវជនដែលចូលរួមពិព័រណ៌សៀវភៅ គឺពួកគេចាប់អារម្មណ៍លើប្រភេទសៀវភៅអភិវឌ្ឍផ្នត់គំនិត សៀវភៅប្រវត្តិសាស្ត្រ និងសៀវភៅទស្សនវិជ្ជាជាដើម។
លោកបន្ថែមថា៖ «តាមរយៈការចូលរួមរបស់យុវជនដ៏ច្រើនសម្រាប់ពិព័រណ៌សៀវភៅក្នុងទិវាជាតិអំណានបានបង្ហាញពីជោគជ័យនៃការប្រារព្ធទិវាជាតិអំណាននៅក្នុងប៉ុន្មានឆ្នាំចុងក្រោយនេះ។ តាមពិត ទិវាជាតិអំណានមានតែមួយថ្ងៃទេ គឺនៅថ្ងៃទី១១ ខែមីនា ហើយនៅក្នុងទិវានេះមានកម្មវិធីផ្សេងៗដែលក្រសួងអប់រំបានរៀបចំឡើង ដូចជាការប្រកួតប្រជែងការអាន ស្មូត្រកំណាព្យ និងតែងនិពន្ធជ្រើសរើសជ័យលាភីថ្នាក់ជាតិ ដែលមានទាំងកម្រិតកុមាររហូតដល់មនុស្សធំ ព្រមទាំងគ្រូបង្រៀនផងដែរ»។
លោកបញ្ជាក់ថា កម្មវិធីទាំងនេះ សំដៅដល់ការរៀនសូត្រ ការអាន ការស្មូត្រ ការតែងនិពន្ធជាដើម។ ចំណែកពិព័រណ៌សៀវភៅប្រមាណជាង១០០ស្ដង់ដែលដាក់តាំងបង្ហាញក្នុងព្រឹត្តិការណ៍ទិវាជាតិអំណាននេះត្រូវបានរៀបចំធ្វើឡើង ដើម្បីចូលរួមអបអរសាទរទិវាជាតិអំណាន។
នៅក្នុងពិធីប្រកាសជ័យលាភីការប្រកួតប្រជែងការអាន ស្មូត្រកំណាព្យ និងតែងនិពន្ធជ្រើសរើសជ័យលាភីថ្នាក់ជាតិ «ពានរង្វាន់សម្ដេចតេជោ ហ៊ុន សែន» ពីម្សិលមិញ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានថ្លែងថា ការប្រារព្ធធ្វើទិវាជាតិអំណានមានគោលដៅលើកកម្ពស់ការរៀន និងការលើកកម្ពស់អក្ខរកម្មភាសាខ្មែរនៅកម្ពុជា។
លោកថា ដើម្បីលើកកម្ពស់ការរៀននិងការលើកកម្ពស់អក្ខរកម្មភាសាខ្មែរ ក្រសួងអប់រំបានរៀបចំវិធានការជាប្រព័ន្ធមួយសម្រាប់លើកកម្ពស់ទាំងការអាន ក៏ដូចជាការសរសេរអក្ខរកម្មភាសាខ្មែរ ដូចជាវិធីសាស្ត្រថ្មីនៃការបង្រៀនសិស្ស ការបញ្ចូលវិធីសាស្ត្របង្រៀនភាសាខ្មែរក្នុងការបណ្ដុះបណ្ដាលគ្រូបង្រៀន ការជ្រើសរើសគ្រូបង្រៀនល្អ និងការបង្កើតទិវាជាតិអំណាន។
លោកបន្ថែមថានៅក្នុងទិវាជាតិអំណានមានកម្មវិធីជជែកវែកញែក កម្មវិធីបកស្រាយប្រធានបទទូទៅ និងកម្មវិធីប្រឡងប្រណាំងផ្នែកសរសេរកំណាព្យ ផ្នែកស្មូត្រ ហើយនិងកម្មវិធីបកស្រាយអក្សរសិល្ប៍៕