របាយការណ៍របស់ក្រសួងទេសចរណ៍បានបង្ហាញកាលពីថ្ងៃពុធថា ប្រទេសកម្ពុជាបានកត់ត្រាភ្ញៀវទេសចរអន្តរជាតិប្រមាណ ៣,០៣ លាននាក់ នៅក្នុងរយៈពេល៧ខែដំបូងនៃឆ្នាំ២០២៣ ដែលជាការកើនឡើងយ៉ាងខ្លាំងចំនួន៣០៨ ភាគរយ ពីចំនួន ៧៤៣,៤៥៩ ធៀបនឹងរយៈពេលដូចគ្នាកាលពីឆ្នាំមុន។
យោងតាមរបាយការណ៍បានឱ្យដឹងថា ប្រទេសថៃបានឈរនៅលើកំពូលតារាងក្នុងចំណោមភ្ញៀវទេសចរអន្តរជាតិដែលមកទស្សនាប្រទេសកម្ពុជា ក្នុងអំឡុងខែមករាដល់ខែកក្កដាឆ្នាំនេះ តាមពីក្រោយដោយប្រទេសវៀតណាម ចិន ឡាវ និងសហរដ្ឋអាមេរិក។
ក្រសួងបានឲ្យដឹងថា ចំនួនភ្ញៀវបរទេសមកកម្ពុជាត្រូវបានព្យាករថានឹងកើនដល់ ៧លាននាក់ ក្នុងឆ្នាំ ២០២៥ លើសកម្រិតមុនការរាតត្បាតជំងឺកូវីដ-១៩ ដែលមាន ៦,៦ លាននាក់ ក្នុងឆ្នាំ២០១៩។
ទេសចរណ៍គឺជាសសរស្តម្ភមួយក្នុងចំណោមសសរស្តម្ភទាំងបួនដែលជួយដល់សេដ្ឋកិច្ចរបស់ប្រទេសកម្ពុជា បន្ថែមពីលើការនាំចេញសម្លៀកបំពាក់ កសិកម្ម និងសំណង់ និងអចលនទ្រព្យ។
យោងតាមក្រសួងបានឱ្យដឹងថា ក្នុងឆ្នាំ២០២២ ភ្ញៀវទេសចរអន្តរជាតិជាង ២,២ លាននាក់បានមកទស្សនាប្រទេសកម្ពុជា កើនឡើង១,០៥៩ ភាគរយបើធៀបនឹងឆ្នាំ២០២១។
ប្រទេសកម្ពុជា មានភាពល្បីល្បាញចំពោះរមណីដ្ឋានបេតិកភណ្ឌពិភពលោកចំនួនបីគឺរមណីដ្ឋានបុរាណអង្គរក្នុងខេត្តសៀមរាប ប្រាសាទព្រះវិហារក្នុងខេត្តព្រះវិហារ និងរមណីយដ្ឋានបុរាណប្រាសាទសំបូរព្រៃគុកក្នុងខេត្តកំពង់ធំ។
ក្រៅពីនេះ ប្រទេសកម្ពុជាមានឆ្នេរសមុទ្រប្រវែង ៤៥០ គីឡូម៉ែត្រ ដែលលាតសន្ធឹងកាត់ខេត្តភាគនិរតីចំនួន ៤ គឺខេត្តព្រះសីហនុ ខេត្តកំពត ខេត្តកែប និងខេត្តកោះកុង៕ ជា វណ្ណៈ – AKP