ក្រុមហ៊ុន​ចំនួន​ពីរ​គឺ​ ​Am​ru ​Rice​ (​Cam​bo​d​i​a​) ​និង​ ​Golden​ ​Rice​ ​Cam​bo​d​i​a​ ​បាន​បន្ត​កិច្ចសន្យា​នៅ​ថ្ងៃ​ទី​២​៤​ ​ខែ​សីហា​ ​ដើម្បី​ទិញ​អង្ករ​សរីរាង្គ​ពី​សហគមន៍​កសិកម្ម​នៅ​ក្នុង​ខេត្ត​ព្រះវិហារ​។​

​កិច្ចសន្យា​បន្ត​ត្រូវ​បាន​ចុះហត្ថលេខា​នៅ​មន្ទីរ​កសិកម្ម​ ​រុក្ខា​ប្រមាញ់​ ​និង​នេសាទ​ខេត្ត​ព្រះវិហារ​ ​ក្រោម​វត្តមាន​លោក​ ​អ៊ុក​ ​គឹម​សាន​ ​អភិបាល​រង​ខេត្ត​។​

​ក្រោម​កិច្ចសន្យា​នេះ​ ​ក្រុមហ៊ុន​ ​Golden​ ​Rice​ ​Cam​bo​d​i​a​ ​នឹង​ទិញ​អង្ករ​សរីរាង្គ​ចំនួន​ ​១​,​២​០​០​តោន​ពី​សហគមន៍​កសិកម្ម​ចំនួន​៧​ ​ជាមួយនឹង​គ្រួសារ​ផលិត​ចំនួន​ ​១​,​០​០​០​ ​ហើយ​ក្រុមហ៊ុន​Am​ru ​Rice​ (​Cam​bo​d​i​a​) ​នឹង​ទិញ​អង្ករ​ប្រហែល​ ​១​,​០​០​០​តោន​ពី​សហគមន៍​កសិកម្ម​ចំនួន​ ​៤​ ​ជាមួយនឹង​គ្រួសារ​ផលិត​ចំនួន​ ​៥​០​០​។​

​ឧកញ៉ា​ ​សុង​ ​សារ៉ន​ ​អគ្គនាយក​ក្រុមហ៊ុន​ ​Am​ru ​Rice​ (ខេ​ម​បូ​ឌា) ​បាន​និយាយ​ថា​ ​ឆ្នាំ​២​០​២​៣​ ​គឺជា​ឆ្នាំ​ទី​៩​ហើយ​ ​ដែល​ក្រុមហ៊ុន​របស់​លោក​បាន​បន្ត​កិច្ចសន្យា​ទិញ​ជាមួយ​សហគមន៍​កសិកម្ម​ខេត្ត​ព្រះវិហារ​ ​ហើយ​ក្រុមហ៊ុន​របស់​លោក​បាន​ប្តេជ្ញា​ចិត្ត​ក្នុង​ការ​លើក​ក​ម្ពស់ ​និង​នាំចេញ​អង្ករ​សរីរាង្គ​ខេត្ត​ព្រះវិហារ​ទៅកាន់​ទី​ផ្សារ​ពិភពលោក​។​

​បើ​តាម​លោក​ ​ពឹង​ ​ទ្រី​ដា​ ​ប្រធានមន្ទីរ​កសិកម្ម​ខេត្ត​ព្រះវិហារ​ ​បាន​ឱ្យ​ដឹង​ថា​ ​សហជីព​សហករណ៍​កសិកម្ម​មានជ័យ​ ​ខេត្ត​ព្រះវិហារ​ ​គឺជា​សហជីព​ដំបូង​គេ​របស់​កម្ពុជា​ ​ដែល​បង្កើត​ឡើង​ក្នុង​ខែ​មេសា​ ​ឆ្នាំ​ ​២​០​១​៦​ ​រួម​ជាមួយ​សហគមន៍​កសិកម្ម​ចំនួន​ ​២​៥​ ​ដែល​មានគ្រួសារ​ផលិត​ ​ចំនួន​ ​៥​,​៤​០​៣​។​

​លោក​ ​គឹម​ ​សាន​ ​បាន​និយាយ​ថា​ ​រាជរដ្ឋាភិបាល​កំពុង​ស្វែងរក​ទី​ផ្សារ​អន្តរជាតិ​ថ្មីៗ​ ​ដើម្បី​នាំចេញ​កសិផល​របស់​កម្ពុជា​ ​ហើយ​វិ​ស​័​យ​កសិកម្ម​គឺជា​ឆ្អឹងខ្នង​នៃ​ការ​អភិវឌ្ឍន៍​សេដ្ឋកិច្ច​ជាតិ​។​

​លោក​បាន​ថ្លែង​អំណរគុណ​ចំពោះ​ភាគី​ពាក់ព័ន្ធ​ទាំងអស់​ចំពោះ​ការ​សម្របសម្រួល​ដ៏​ល្អ​ក្នុង​ការ​លើក​ក​ម្ពស់វិ​ស​័​យ​កសិកម្ម​របស់​ខេត្ត​របស់​លោក​ ​ក៏ដូចជា​ការ​លើក​ក​ម្ពស់​ជីវភាពរស់នៅ​របស់​សហគមន៍​កសិករ​ផង​ដែរ​។​ ​ខេត្ត​ព្រះវិហារ​ ​ល្បី​ខាង​អង្ករ​សរីរាង្គ​ ​និង​ដំឡូងមី​សរីរាង្គ​។​
​លឹម​ ​ណារី​ – ​A​K​P​