លោក គីម ឃាង អាយុ ២៥ ឆ្នាំ ជាអាជីវករបានសម្រេចចិត្តប្តូរទៅប្រើប្រាស់រថយន្តអគ្គិសនីចិន ដើម្បីសន្សំថ្លៃសាំង និងជួយរក្សាខ្យល់អាកាសអោយបរិសុទ្ធ។
និយាយទៅកាន់ Xinhua ខណៈពេលកំពុងទិញរថយន្តអគ្គិសនី Hongqi នៅភ្នំពេញកាលពីថ្ងៃច័ន្ទ លោកឃាងសង្ឃឹមថា រថយន្តនេះនឹងកាត់បន្ថយការចំណាយលើប្រេងឥន្ធនៈពាក់កណ្តាល និងរួមចំណែកការពារបរិស្ថាន។
គាត់បានប្រាប់ស៊ីនហួថា “ពីមុនខ្ញុំប្រើឡានចាក់សាំង ហើយការចំណាយរបស់ខ្ញុំលើថ្លៃសាំងគឺខ្ពស់ ពី៣០០ ទៅ៤០០ ដុល្លារក្នុងមួយខែ” ។
គាត់បានបន្តថាតម្លៃរថយន្តអគ្គិសនី គឺស្រដៀងនឹងរថយន្តសាំងដែរ។
គាត់បានបន្ថែមថា៖ «រថយន្ត Hongqi EV គឺជារថយន្តដែលខ្ញុំចូលចិត្តព្រោះវាជាម៉ាកយីហោលំដាប់ខ្ពស់នៅប្រទេសចិន ហើយវាមានភាពស្រស់ស្អាត គុណភាពខ្ពស់ និងតម្លៃប្រកួតប្រជែង»។
មឿង សុខម៉េង អ្នកគ្រប់គ្រងផ្នែកលក់នៅក្រុមហ៊ុន Mingyang Guoji Co., Ltd. ដែលជាភ្នាក់ងារផ្តាច់មុខរបស់យីហោ Hongqi នៅកម្ពុជាបាននិយាយថា ចាប់តាំងពីរដ្ឋាភិបាលចាប់ផ្តើមជំរុញការនាំចូលរថយន្តអគ្គិសនី មក អ្នកប្រើប្រាស់មានចំនួនកើនឡើងគួរឱ្យកត់សម្គាល់ដោយសារតែពួកគេដឹងពីគុណសម្បត្តិរបស់រថយន្តប្រភេទនេះដូចជាកាត់បន្ថយការចំណាយលើសាំង និងជួយការពារបរិស្ថាន។
នាងបានប្រាប់ Xinhua ថា “បច្ចុប្បន្ននេះ យើងបានលក់រថយន្តអគ្គិសនីជាច្រើន ទាំងខ្នាតតូច និងខ្នាតធំ ហើយរថយន្តអគ្គិសនី របស់យើងបានទទួលការគាំទ្រយ៉ាងច្រើនពីអ្នកប្រើប្រាស់”។
នាងបាននិយាយថា តម្លៃសាករថយន្ត Hongqi EV គឺត្រឹមតែ៩ ដុល្លារប៉ុណ្ណោះ ហើយអាចបើកបរបានចម្ងាយ៤៣១ គីឡូម៉ែត្រ។
នាងបានបន្តថា៖ «សម្រាប់ចម្ងាយនេះបើយើងប្រើសាំងឬរថយន្តកូនកាត់ វាត្រូវចំណាយអស់ប្រមាណ៣០ដុល្លារសម្រាប់សាំង ដូច្នេះការប្រើរថយន្តអគ្គិសនីផ្តល់អត្ថប្រយោជន៍ច្រើនដល់អ្នកប្រើប្រាស់។
ឧត្តម ពិសី អ្នកគ្រប់គ្រងនៅក្រុមហ៊ុន Car4you Co., Ltd. ដែលនាំចូលរថយន្ត Letin Mengo EVs ពីប្រទេសចិន បាននិយាយថា រថយន្តអគ្គិសនីមានគ្រឿងតិចជាងរថយន្តសាំង ឬម៉ាស៊ូត ដូច្នេះតម្លៃថែទាំ និងជួសជុលគឺទាបជាងរថយន្តប្រើចំហេះ។
អ្នកស្រីបានប្រាប់ស៊ីនហួថា៖ «ការប្រើរថយន្តអគ្គិសនីជួយសន្សំប្រាក់ ព្រោះវាងាយស្រួលក្នុងការសាកថ្ម និងមិនប៉ះពាល់ដល់បរិស្ថាន»។
អ្នកស្រីបន្តថា តម្លៃរថយន្តអគ្គិសនីគឺស្រដៀងគ្នានឹងរថយន្តសាំង ឬម៉ាស៊ូត ប៉ុន្តែដោយសាររដ្ឋាភិបាលបានលើកទឹកចិត្តប្រជាជនឲ្យប្រើរថយន្តអគ្គិសនី រដ្ឋបានបញ្ចុះពន្ធនាំចូលសម្រាប់រថយន្តប្រភេទនេះ។ “តម្លៃរថយន្តអគ្គិសនីនៅក្រុមហ៊ុនរបស់យើងមានចាប់ពីជាង ១០,០០០ ដុល្លារដល់ជាង ៤០,០០០ ដុល្លារ ហើយរថយន្តអគ្គិសនីរបស់យើងអាចរត់បានពីជាង ២០០ គីឡូម៉ែត្រទៅ ៥០០ គីឡូម៉ែត្រ (នៅពេលសាកថ្មម្តង) ដោយផ្អែកលើម៉ូដែលរថយន្ត”។
អ្នកស្រីបានបន្ថែមថា៖ «សម្រាប់រថយន្តអគ្គិសនី កាលណាយើងប្រើវាកាន់តែច្រើន យើងអាចសន្សំប្រាក់កាន់តែច្រើន ហើយជាពិសេសរថយន្តទាំងនោះគឺមិនប៉ះពាល់ដល់បរិស្ថាន។
រដ្ឋាភិបាលកម្ពុជាបាននិងកំពុងជំរុញឱ្យប្រជាជនប្រើប្រាស់រថយន្តអគ្គិសនី និងម៉ូតូអគ្គិសនី ព្រោះវាមិនប៉ះពាល់ដល់បរិស្ថាន និងជួយសន្សំប្រាក់។
យោងតាមក្រសួងសាធារណការ និងដឹកជញ្ជូន រថយន្តអគ្គិសនី ថ្មីប្រហែល ៨០០គ្រឿង ត្រូវបានចុះបញ្ជីគិតត្រឹមខែកុម្ភៈ ឆ្នាំ២០២៣ ដោយឡែកម៉ូតូអគ្គិសនីមិនមានទិន្នន័យនោះទេ។
ក្រសួងបាននិយាយថា កម្ពុជាបានប្តេជ្ញាចិត្តថានឹងប្រើរថយន្តអគ្គិសនីអោយបានចំនួន ៤០ ភាគរយ និងម៉ូតូអគ្គិសនីចំនួន ៧០ ភាគរយនៅឆ្នាំ២០៥០ ដើម្បីកាត់បន្ថយការបំភាយកាបូន។
ដើម្បីសម្រេចបាននូវគោលដៅនេះ រដ្ឋាភិបាលបានកាត់បន្ថយពន្ធនាំចូលលើយានយន្តអគ្គិសនីចាប់តាំងពីឆ្នាំ២០២១មកនៅត្រឹមប្រហែល ៥០ ភាគរយទាបជាងពន្ធលើរថយន្តម៉ាស៊ីនប្រើចំហេះ។ Xinhua