ប្រតិភូកីឡា ប្រធានក្រុម និងគ្រូបង្វឹកសរុបចំនួន ២,៦០០នាក់មកពីទូទាំងប្រទេសកម្ពុជា បាននឹងកំពុងចូលរួមការប្រកួតកីឡាសិស្សបឋមសិក្សាថ្នាក់ជាតិឆ្នាំ២០២៣។

ព្រឹត្តិការណ៍កីឡានេះបានបើកជាផ្លូវការហើយនៅល្ងាចថ្ងៃទី១៣ ខែសីហា នៅពហុកីឡដ្ឋានជាតិអូឡាំពិក រាជធានីភ្នំពេញ ក្រោមអធិបតីភាពឯកឧត្តមបណ្ឌិត ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ហើយនឹងបន្តរហូតដល់ថ្ងៃទី២១ ខែសីហា។

ក្នុងសុន្ទរកថាបើក ឯកឧត្តមរដ្ឋមន្ត្រីបានលើកឡើងពីគោលបំណងសំខាន់នៃការប្រកួតកីឡាសិស្សបឋមសិក្សាថ្នាក់ថ្នាក់ជាតិ ដើម្បីបំផុសសកម្មភាពអប់រំកាយ និងកីឡានៅគ្រឹះស្ថានអប់រំ និងការចូលរួមរបស់សិស្សានុសិស្សក្នុងវិស័យកីឡាដើម្បីសុខភាព និងការអភិវឌ្ឍបញ្ញា រហូតដល់ការបង្កើនមិត្តភាព សាមគ្គីភាព និងពង្រឹងកម្លាំងកាយ និងផ្លូវចិត្ត។

ឯកឧត្តមបណ្ឌិតបានបញ្ជាក់ជាថ្មីថា រាជរដ្ឋាភិបាលកម្ពុជា យកចិត្តទុកដាក់ជាពិសេសលើវិស័យអប់រំកាយ និងកីឡា ដោយបង្កើតគោលនយោបាយជាតិ ស្តីពីការអភិវឌ្ឍន៍កីឡា និងចូលរួមកំណែទម្រង់កីឡាគ្រប់ទម្រង់។

ឯកឧត្តមក៏បានរំលឹកពីភាពជោគជ័យរបស់កម្ពុជាក្នុងការធ្វើជាម្ចាស់ផ្ទះកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ នៅឆ្នាំនេះ ជាមួយនឹងកំណត់ត្រាថ្មីនៃមេដាយមាស ប្រាក់ និងសំរឹទ្ធចំនួន ២៨៤។

អត្តពលិកមកពី២៥រាជធានី-ខេត្ត នឹងចូលរួមប្រកួតកីឡា១០ប្រភេទ ដែលមានចំនួន៥១វិញ្ញាសា ដណ្ដើមយកមេដាយចំនួន៥៣១ ក្នុងការប្រកួតកីឡាសិស្សបឋមសិក្សាថ្នាក់ជាតិឆ្នាំ២០២៣ នេះបើយោងតាមរបាយការណ៍របស់លោក ហួត សេងទ្រី ប្រធាននាយកដ្ឋានរៀបចំផែនការ និងគ្រប់គ្រងព្រឹត្តិការណ៍កីឡារបស់ក្រសួងអប់រំ យុវជន និងកីឡា។

កីឡាបាល់ទាត់ កីឡាបាល់ទះ កីឡាបាល់បោះ អត្តពលកម្ម កីឡាវាយសី កីឡាវាយកូនឃ្លីលើតុ តេក្វាន់ដូរ WT តេក្វាន់ដូរ ITF ប៊ូល ប៉េតង់ និងគុណល្បុក្កតោ។ C. Nika – AKP