Lansio ap Cymraeg cyntaf y BBC
- Cyhoeddwyd
Mae'r BBC wedi lansio ei ap Cymraeg cyntaf erioed yn Eisteddfod Genedlaethol Cymru yn Llanelli ddydd Llun.
Yr ap yw'r cynnyrch diweddaraf gan wasanaeth newydd Cymraeg BBC Cymru Fyw - gwasanaeth ar-lein sy'n cynnig casgliad o'r straeon diweddaraf o Gymru.
Mae'r ap, y datblygiad newyddion cyntaf o'i fath yn y Gymraeg - yn ychwanegu at y gwasanaeth ar-lein gafodd ei lansio ym mis Mai .
Bydd ymwelwyr â'r Eisteddfod yn cael y cyfle i brofi'r ap drwy'r wythnos, ar ffôn enfawr.
Pennaeth Rhaglenni a Gwasanaethau Cymraeg BBC Cymru, Siân Gwynedd wnaeth lansio'r gwasanaeth yn swyddogol am 12pm ym mhabell BBC Radio Cymru ar Faes yr Eisteddfod.
Mae'r gwasanaeth yn cynnwys awgrymiadau am gynnwys ar-lein newydd am Gymru y tu hwnt i'r BBC, adran gylchgrawn gydag erthyglau nodwedd, darnau barn, blogiau ac orielau lluniau a'r gallu hefyd i wrando ar Radio Cymru yn fyw.
Dywedodd Siân Gwynedd: ''Pan lansiodd Cymru Fyw gwpwl o fisoedd yn ôl, roeddem ni'n gwybod ei fod yn cynnig gwasanaeth newydd ac unigryw i siaradwyr Cymraeg.
"Ond, roeddem ni hefyd yn gwybod bod rhaid i'r gwasanaeth fod yn ddeinamig ac yn hawdd i'w ddefnyddio, gan wneud y gorau o'r dechnoleg mewn byd lle mae gwybodaeth yn cael ei yrru gan ddyfeisiau symudol, felly rydym yn falch iawn o lansio'r ap yma heddiw.''
Mae ap BBC Cymru Fyw ar gael i'w lawrlwytho am ddim ar ddyfeisiau Apple ac Android.
Lawrlwytho i ddyfais Apple, dolen allanol
Lawrlwytho i ddyfais Android, dolen allanol
Mae gwefan BBC Cymru Fyw hefyd ar gael ar ffonau, tabledi a chyfrifiaduron.
Straeon perthnasol
- Cyhoeddwyd4 Awst 2014
- Cyhoeddwyd3 Awst 2014