ក្រសួងមុខងារសាធារណៈបានបើកកិច្ចប្រជុំពិភាក្សាទទួលយកធាតុចូលពីក្រសួងស្ថាប័ននានាសម្រាប់សេចក្ដីព្រាងវិធានការនិងផែនការសកម្មភាពដើម្បីអនុវត្តវិធានការគន្លឹះក្នុងកំណែទម្រង់រដ្ឋបាលសាធារណៈ រួមមានការកែលម្អប្រព័ន្ធជ្រើសរើសមន្ត្រី ការពង្រឹងសមត្ថភាពនិងសមិទ្ធកម្មស្ថាប័ន និងការដាក់ឱ្យអនុវត្តប្រព័ន្ធលើកទឹកចិត្តផ្អែកលើសមិទ្ធកម្ម។
កិច្ចប្រជុំនេះប្រារព្ធធ្វើនៅសាលាភូមិន្ទរដ្ឋបាលកាលពីថ្ងៃចន្ទ ក្រោមអធិបតីភាពរបស់លោក ហ៊ុន ម៉ានី រដ្ឋមន្ត្រីក្រសួងមុខងារសាធារណៈ ព្រមទាំងមានការអញ្ជើញចូលរួមពីក្រសួង ស្ថាប័ន និងគណៈអភិបាលរាជធានីខេត្តប្រមាណជាង១០០នាក់។
អង្គប្រជុំនោះបានពិភាក្សាគ្នាលើការកែលម្អសេចក្តីព្រាងវិធានការនិងផែនការសកម្មភាពដើម្បីអនុវត្តវិធានការគន្លឹះក្នុងកំណែទម្រង់រដ្ឋបាលសាធារណៈនិងការចូលរួមជាធាតុចូលគាំទ្រដល់ការអនុវត្តវិធានការគន្លឹះកែលម្អប្រព័ន្ធជ្រើសរើសមន្ត្រី ការពង្រឹងសមត្ថភាពនិងសមិទ្ធកម្មស្ថាប័ន និងការដាក់ឱ្យអនុវត្តប្រព័ន្ធលើកទឹកចិត្តផ្អែកលើសមិទ្ធកម្ម។
លោក ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានថ្លែងនៅក្នុងកិច្ចប្រជុំនោះថា រដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន ម៉ាណែត បានដាក់ការងារកែទម្រង់រដ្ឋបាលធារណៈជាកិច្ចការអាទិភាព ហើយក្រសួងមុខងារសាធារណៈបានដើរតួកាន់តែសំខាន់លើការងារនេះបន្ថែមលើកិច្ចការងារបច្ចេកទេសប្រចាំថ្ងៃដែលកំពុងអនុវត្ត។
លោកបាននិយាយថា៖ «ការងារកែទម្រង់រដ្ឋបាលសាធារណៈមិនមែនជារឿងថ្មីទេ ប៉ុន្តែទាមទារការធ្វើជាប្រចាំ កាន់តែសកម្ម កាន់តែលម្អិត មានប្រសិទ្ធភាព និងប្រសិទ្ធផល»។
លោកថា កិច្ចប្រជុំនេះបានអនុញ្ញាតដល់អ្នកពាក់ព័ន្ធចូលរួមពិភាក្សានិងផ្តល់ធាតុចូលយ៉ាងផុលផុសលើការរៀបចំវិធានការនិងផែនការសកម្មភាពនៃការកែទម្រង់រដ្ឋបាលសាធារណៈ។
លោកបន្ថែមថា ការចូលរួមធាតុចូលសំខាន់ៗ គឺមិនត្រឹមតែសម្រាប់ការរៀបចំវិធានការនិងផែនការសកម្មភាព ក្នុងកំណែទម្រង់រដ្ឋបាលសាធារណៈចំពោះមុខប៉ុណ្ណោះទេ តែវាជាការរៀបចំ កសាង និងតម្រង់ទិសរដ្ឋបាលសាធារណៈរបស់កម្ពុជាក្នុងរយៈពេលយូរអង្វែងនាពេលអនាគតផងដែរ។
លោកបានលើកឡើងថា កិច្ចការកែទម្រង់ច្បាស់ណាស់នឹងមានផលជះដល់ប្រតិបត្តិការណាមួយរបស់បុគ្គលនិងស្ថាប័ន តែអ្វីដែលជាគោលដៅសំខាន់ជាងគេបំផុត គឺផលប្រយោជន៍រួមសម្រាប់ជាតិនិងប្រជាជនដែលទាមទារឱ្យមានចក្ខុវិស័យវែងឆ្ងាយ មានឆន្ទៈនយោបាយ មានការចូលរួម និងមានការលះបង់ទាំងអស់គ្នា។
លោក យក់ ប៊ុនណា អ្នកនាំពាក្យក្រសួងមុខងារសាធារណៈ បានបញ្ជាក់បន្ថែមថា ក្រសួងមុខងារសាធារណៈ បានធ្វើសេចក្តីព្រាងវិធានការនិងផែនការសកម្មភាពរួចហើយ ប៉ុន្តែចាំបាច់ត្រូវការធាតុចូលកែលម្អពីក្រសួងស្ថាប័នពាក់ព័ន្ធដើម្បីកាន់តែមានភាពល្អប្រសើរ។
លោកថា ក្រសួងមុខងារសាធារណៈបានកំណត់ពេលវេលាសម្រាប់ក្រសួងស្ថាប័ននានាផ្ដល់មតិយោបល់កែលម្អបន្ថែមលើសេចក្តីព្រាងវិធានការនិងផែនការសកម្មភាពដើម្បីអនុវត្តវិធានការគន្លឹះក្នុងកំណែទម្រង់រដ្ឋបាលសាធារណៈ។
លោកបាននិយាយថា៖ «ក្នុងករណីក្រសួងស្ថាប័នមានធាតុចូលបន្ថែម យើងនឹងយកធាតុចូលនោះដើម្បីកែលម្អសេចក្ដីព្រាងរបស់យើង ហើយបន្ទាប់ពីប្រមូលធាតុចូលផុតពីថ្ងៃសុក្រ ទី១២ ខែមេសា គឺក្រសួងមុខងារសាធារណៈនឹងធ្វើរបាយការណ៍ផ្ញើជូនទៅកាន់ប្រមុខរដ្ឋាភិបាលដើម្បីពិនិត្យសម្រេច»៕