រដ្ឋាភិបាលបានអនុញ្ញាតក្រសួងបរិស្ថានប្រកាសប្រើប្រាស់យុទ្ធសាស្ត្រចក្រាវិស័យបរិស្ថានឆ្នាំ២០២៣-២០៥០ ដើម្បីធានាចីរភាពបរិស្ថាននិងសុក្រឹតកម្មបរិស្ថានកិច្ច ឆ្លើយតបនឹងការប្រែប្រួលអាកាសធាតុ និងលើកកម្ពស់សេដ្ឋកិច្ចបៃតង។
ការអនុញ្ញាតនេះត្រូវបានក្រសួងបរិស្ថានប្រកាសនៅលើទំព័រហ្វេសប៊ុកផ្លូវការរបស់ខ្លួនកាលពីថ្ងៃសុក្រ ក្រោយពីក្រសួងបានស្នើសុំគោលការណ៍ពីរដ្ឋាភិបាល។
ក្រសួងបរិស្ថានបានឱ្យដឹងថា យុទ្ធសាស្ត្រចក្រាវិស័យបរិស្ថានឈរលើអាទិភាពចម្បងបី គឺស្អាត បៃតង និងចីរភាព ដែលនឹងប្រកាសដាក់ប្រើប្រាស់ជាផ្លូវការដោយក្រសួងបរិស្ថាននៅថ្ងៃទី១៥ ខែវិច្ឆិកា ឆ្នាំ២០២៣។
ក្រសួងបរិស្ថានបានបន្តថា៖ «ការរៀបចំយុទ្ធសាស្រ្តចក្រាវិស័យបរិស្ថានក្នុងគោលបំណងតម្រង់ទិសនិងចង្អុលបង្ហាញការងារជាអាទិភាព ដើម្បីធានាចីរភាពបរិស្ថាននិងសុក្រឹតកម្មបរិស្ថានកិច្ចឆ្លើយតបនឹងការប្រែប្រួលអាកាសធាតុ និងលើកកម្ពស់សេដ្ឋកិច្ចបៃតង»។
ក្រសួងបន្ថែមថា កិច្ចការទាំងនេះសំដៅដល់ការសម្រេចគោលដៅយុទ្ធសាស្រ្តបញ្ចកោណ គឺជាប្រទេសអព្យាក្រឹតកាបូននិងមានគម្របព្រៃឈើ៦០ភាគរយនៅឆ្នាំ២០៥០។
លោក អ៊ាង សុផល្លែត រដ្ឋមន្ត្រីក្រសួងបរិស្ថានបានបញ្ជាក់ប្រាប់ខ្មែរថាមស៍ពីម្សិលមិញថា យុទ្ធសាស្រ្តចក្រាត្រូវបានវាយតម្លៃខ្ពស់ពីលោកនាយករដ្ឋមន្រ្តី ហ៊ុន ម៉ាណែត ដែលផ្តោតលើការយកចិត្តទុកដាក់ពីបញ្ហាបរិស្ថានកាន់តែមានប្រសិទ្ធភាព ដើម្បីជួយប្រជាជនមានជីវភាពប្រសើរនិងការអភិវឌ្ឍដោយចីរភាព។
លោកបាននិយាយថា៖ «យុទ្ធសាស្ត្រចក្រាវិស័យបរិស្ថាន គឺជាត្រីវិស័យនិងជាផែនទីចង្អុលផ្លូវសម្រាប់វិស័យបរិស្ថាន។ យុទ្ធសាស្ត្រនេះបង្កើតឡើងដើម្បីនាំនាវាបរិស្ថានឆ្ពោះទៅកាន់ទិសដៅដូចមានចែងក្នុងយុទ្ធសាស្ត្របញ្ចកោណដំណាក់កាលទី១»។
លោកបន្ថែមថា៖ «ក្រសួងបរិស្ថានមានសេចក្ដីរំពឹងថាជាមួយយុទ្ធសាស្ត្រចក្រាវិស័យ វានឹងទទួលជោគជ័យជាបន្តបន្ទាប់ដែលធ្វើឱ្យកម្ពុជាមានភាពស្អាត ភាពបៃតង ប្រកបដោយចីរភាព»។
បច្ចុប្បន្នក្រសួងបរិស្ថានកំពុងរៀបចំយុទ្ធនាការកាត់បន្ថយការប្រើប្រាស់ប្លាស្ទិកក្រោមប្រធានបទ «ថ្ងៃនេះ ខ្ញុំមិនប្រើថង់ប្លាស្ទិកទេ» នៅទូទាំងប្រទេស ដោយមានការចូលរួមពីសិស្សានុសិស្សចំនួនជាង២.៦លាននាក់។ យុទ្ធនាការនេះមិនត្រឹមតែមានការគាំទ្រនិងចូលរួមពីសាលារៀនប៉ុណ្ណោះទេ ប៉ុន្តែក៏មានការគាំទ្រយ៉ាងពេញទំហឹងពីដៃគូអភិវឌ្ឍន៍ ម្ចាស់រោងចក្រ និងកាកបាទក្រហមកម្ពុជាព្រមទាំងដៃអភិវឌ្ឍន៍ដែរ។
លោក អ៊ាង សុផល្លែត រដ្ឋមន្ត្រីក្រសួងបរិស្ថានកាលពីថ្ងៃទី១០ ខែតុលា បានប្រកាសផ្តល់កូនឈើជូនប្រជាពលរដ្ឋដែលស្ម័គ្រចិត្តយកទៅដាំថែរក្សាដោយខ្លួនឯងប្រមាណ ១.៣០លានដើមក្នុងមួយឆ្នាំ ដើម្បីបង្កើនគម្របព្រៃឈើរហូតដល់៦០ភាគរយនៅឆ្នាំ២០៥០។
ទន្ទឹមនឹងនេះក្រសួងបរិស្ថានបានដាក់ចេញនូវវិធានការចំនួន៤ សម្រាប់ការគ្រប់គ្រងធនធានធម្មជាតិ និងការអភិរក្សជីវៈចម្រុះ និងការអភិវឌ្ឍប្រកបដោយចីរភាព ដែលក្នុងនោះរួមមានទី១.គឺការអនុវត្តច្បាប់១០០ភាគរយដោយមិនអត់ឱនចំពោះឧក្រិដ្ឋកម្មធនធានធម្មជាតិ។
ទី២.គឺពង្រឹងសហការកាន់តែស្អិតរមួតជាមួយអាជ្ញាធរមូលដ្ឋានគ្រប់ថ្នាក់ ដើម្បីទប់ស្កាត់បទល្មើសធនធានធម្មជាតិ។
ទី៣.គឺសហការជាមួយអង្គភាពប្រឆាំងអំពើពុករលួយនិងបញ្ជាការដ្ឋានកងរាជអាវុធហត្ថលើផ្ទៃប្រទេស ដើម្បីពង្រឹងការអនុវត្តច្បាប់បន្ថែមទៀត និងទី៤.គឺការបង្កើតផែនការដាំដើមឈើឡើងវិញនិងការគ្រប់គ្រងព្រៃឈើដោយនិរន្តរភាព។
លោក ហេង គឹមហុង ប្រធានផ្នែកកម្មវិធីស្រាវជ្រាវនិងតស៊ូមតិនៃសមាគមបណ្តាញយុវជនកម្ពុជា បានកត់សម្គាល់ឃើញថា ការបង្កើនគម្របព្រៃឈើ៦០ភាគរយ គឺទិសដៅដែលរដ្ឋាភិបាលបានដាក់ចេញតាំងពីយុទ្ធសាស្ត្រចតុកោណអនុវត្តតាំងពីឆ្នាំ២០១៥មកម៉្លេះ ហើយពន្យារទិសដៅទៅដល់ឆ្នាំ២០៣០ និងបច្ចុប្បន្ននេះពន្យារទៅដល់ឆ្នាំ២០៥០ ខណៈដែលនិន្នាការគម្របព្រៃឈើហាក់បីដូចជាគ្មានការកើនឡើង។ ចំណែកបទល្មើសព្រៃឈើនៅតែបន្តកើតមានឡើង។
ដូច្នេះលោកយល់ថា ការដាក់ចេញយុទ្ធសាស្ត្រទាំងឡាយណាដែលមិនបានអនុវត្តការការពារពុំមានឆន្ទៈអនុវត្តពិតប្រាកដ វាគ្រាន់តែជាការបង្ហាញតែរូបភាពប៉ុណ្ណោះ ប៉ុន្តែមិនមានប្រសិទ្ធភាព។
លោកបន្តថា៖ «ប្រសិនបើគ្មានឆន្ទៈ គ្មានការជំរុញការអនុវត្តច្បាប់បានល្អប្រសើរ ហើយមន្ត្រីមូលដ្ឋាននៅតែបន្តបណ្ដោយឱ្យមានការបំផ្លិចបំផ្លាញ។ ដូច្នេះយុទ្ធសាស្ត្រទិសដៅបង្កើនគម្របព្រៃឈើ៦០ភាគរយ ខ្ញុំពិបាកនឹងជឿណាស់ ព្រោះក្នុងពីរទសវត្សរ៍ចុង គម្របព្រៃឈើបានធ្លាក់ចុះរហូតដល់១៤ភាគរយ»។
លោកបានលើកឡើងថា ជុំវិញនឹងការអនុវត្តប្រទេសកម្ពុជាអព្យាក្រឹតកាបូន លោកស្នើក្រសួងបរិស្ថានគួរតែប្រជុំពិភាក្សាជាមួយនឹងភាគីពាក់ព័ន្ធក្នុងការបន្ថយពន្ធនាំចូលរថយន្តថ្មីៗ និងលើកទឹកចិត្តពលរដ្ឋប្រើប្រាស់រថយន្តថ្មីៗ ក៏ដូចជារថយន្តដើរដោយថាមពលអគ្គិសនី ដើម្បីកាត់បន្ថយការប្រើប្រាស់រថយន្តជជុះៗនាំចូលពីក្រៅ ដ្បិតរថយន្តចាស់ៗទាំងនោះធ្វើឱ្យប៉ះពាល់ដល់បរិស្ថាន៕