ឯកឧត្តមបណ្ឌិត ហ៊ុន ម៉ាណែត នាយករដ្ឋមន្ត្រី បានថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការនូវកំណាត់ផ្លូវជាតិលេខ៥ ប្រវែង ២៤៦.១៥ គីឡូម៉ែត្រ ពីព្រែកក្តាម ក្នុង ខេត្តកណ្តាល ដល់ក្រុងបាត់ដំបង ដែលប្រារព្ធធ្វើនៅខេត្តកំពង់ឆ្នាំងថ្ងៃពុធ ថា ការអភិវឌ្ឍន៍ហេដ្ឋារចនាសម្ព័ន្ធរូបវន្តនៅតែជាអាទិភាពចម្បងរបស់រាជរដ្ឋាភិបាលនៃរដ្ឋសភានីតិកាលទី៧។
ឯកឧត្តមបណ្ឌិត នាយករដ្ឋមន្ត្រីបានថ្លែងថា រាជរដ្ឋាភិបាលនឹងកសាងហេដ្ឋារចនាសម្ព័ន្ធបន្ថែមទៀតឱ្យដូចជាសរសៃឈាមក្នុងខ្លួនមនុស្ស។
ឯកឧត្តមបណ្ឌិត នាយករដ្ឋមន្ត្រីក៏បានលើកទឹកចិត្តឱ្យមានការកែលម្អបន្ថែមទៀតនូវហេដ្ឋារចនាសម្ព័ន្ធរូបវន្តដែលមានស្រាប់ទាំងអស់ រួមទាំងផ្លូវរថភ្លើងពីរខ្សែប្រវែង ៦៥០ គីឡូម៉ែត្រដែលត្រូវបានសាងសង់ក្នុងសម័យអាណានិគមបារាំងចន្លោះឆ្នាំ១៩៣០ និង ១៩៤០ និងបានបើកដំណើរការឡើងវិញនៅក្នុងឆ្នាំ២០១៨ ដើម្បីសម្រួលដល់ការដឹកជញ្ជូនសាធារណៈបន្ថែមទៀត។
ឯកឧត្តមបណ្ឌិតបានគូសបញ្ជាក់ថា “ការសាងសង់ហេដ្ឋារចនាសម្ព័ន្ធថ្មីមិនមែនជាគម្រោងងាយស្រួលនោះទេ យើងត្រូវធ្វើកិច្ចការជាច្រើន រួមទាំងការសិក្សាលទ្ធភាព និងថវិកាបន្ថែមទៀត ប៉ុន្តែយើងនឹងបន្តផ្តល់អាទិភាព [ដល់គម្រោងសាងសង់ហេដ្ឋារចនាសម្ព័ន្ធ]”។
ឯកឧត្តមបណ្ឌិត ហ៊ុន ម៉ាណែត ក៏បានលើកឡើងអំពីគម្រោងសាងសង់ផ្លូវជាតិលេខ៥០C ពីខេត្តកំពង់ឆ្នាំង ដល់ខេត្តកំពង់ធំផងដែរ។
យោងតាមក្រសួងសេដ្ឋកិច្ច និងហិរញ្ញវត្ថុ សម្រាប់ឆ្នាំក្រោយ រាជរដ្ឋាភិបាលនឹងអនុវត្តគម្រោងហេដ្ឋារចនាសម្ព័ន្ធមួយចំនួន រួមមាន ការសាងសង់ផ្លូវជាតិលេខ៥០Cការពង្រីកផ្លូវជាតិលេខ៦ពីត្រពាំងធំ ទៅស្លក្រាម ក្នុងខេត្តសៀមរាប គម្រោងសាងសង់ (ដំណាក់កាលទី១) នៃផ្លូវក្រវ៉ាត់ក្រុងទី៣ ត្រើយខាងកើតទន្លេមេគង្គ រួមនឹងស្ពានចំនួនពីរ និងគម្រោងសាងសង់ផ្លូវជាតិលេខ៧០B តភ្ជាប់ពីផ្លូវជាតិលេខ៧ ទៅផ្លូវជាតិលេខ១១។