អូស្ត្រាលីបានសម្តែងការគាំទ្រចំពោះវេទិកាវិស័យរដ្ឋ-ឯកជននៅកម្ពុជា (G-PSF) ដែលជាវេទិកាសម្រាប់កិច្ចសន្ទនារវាងរដ្ឋាភិបាល និងវិស័យឯកជននៅកម្ពុជា។
យោងតាមសេចក្តីប្រកាសព័ត៌មានរបស់ស្ថានទូតអូស្ត្រាលីនៅទីក្រុងភ្នំពេញ អូស្ត្រាលីកំពុងគាំទ្រដល់ការអភិវឌ្ឍន៍រួមនៃវិស័យឯកជននៅក្នុងប្រទេសកម្ពុជា ដែលវិស័យឯកជនមានភាពរស់រវើគគឺមានសារៈសំខាន់សម្រាប់ការលើកកម្ពស់កំណើនសេដ្ឋកិច្ចប្រកបដោយបរិយាប័ន្ន និងកាត់បន្ថយភាពក្រីក្រ។
តាមរយៈភាពជាដៃគូសម្រាប់ការអភិវឌ្ឍន៍សេដ្ឋកិច្ចប្រកបដោយភាពធន់នៅកម្ពុជា (CAPRED) អូស្ត្រាលីកំពុងធ្វើការជាមួយសភាពាណិជ្ជកម្មកម្ពុជា ក្រុមប្រឹក្សាអភិវឌ្ឍន៍កម្ពុជា និងភាគីពាក់ព័ន្ធផ្សេងទៀត ដើម្បីពង្រឹងប្រសិទ្ធភាពនៃវេទិកាវិស័យរដ្ឋ-ឯកជននៅកម្ពុជា។
ប្រភពដដែលបាននិយាយថា ការពិភាក្សានាពេលថ្មីៗនេះរវាងប្រទេសអូស្ត្រាលី CAPRED និងសភាពាណិជ្ជកម្មកម្ពុជាបានផ្តោតលើមធ្យោបាយដើម្បីកែលម្អវេទិកាវិស័យរដ្ឋ-ឯកជននៅកម្ពុជាអោយប្រកបទៅដោយបរិយាប័ន្ន និងទទួលបានលទ្ធផលគាប់ចិត្ត ដោយបានចង្អុលបង្ហាញថា ជាពិសេស ផ្តល់ការគាំទ្រដល់ក្រុមការងារបច្ចេកទេសទាំង ១៤ នៅថ្នាក់ជាតិ និងគាំទ្រកិច្ចសន្ទនាសាធារណៈ និងឯកជននៅថ្នាក់ខេត្ត។
ស្ថានទូតបានបន្ថែមទៀតថា តាមរយៈការសម្របសម្រួលធាតុចូលពីវិស័យឯកជនរបស់កម្ពុជា វេទិកាវិស័យរដ្ឋ-ឯកជននៅកម្ពុជាអាចរួមចំណែកផ្តល់បរិយាកាសអំណោយផលសម្រាប់ធុរកិច្ចនៅកម្ពុជា។ ឥទ្ធិពលនៃការងារនេះអាចជំរុញកំណើនសេដ្ឋកិច្ច បង្កើនឱកាស បង្កើតការងារ និងកាត់បន្ថយភាពក្រីក្រ។ C. Nika – AKP