រដ្ឋាភិបាលបានប្រកាសថា ការជ្រើសរើសមន្ត្រីរាជការ ចូលក្របខណ្ឌរដ្ឋត្រូវធ្វើតាមយន្តការប្រឡងថ្នាក់ជាតិ ដែលនេះជាកំណែទម្រង់ថ្មីក្នុងអាណត្តិដឹកនាំរដ្ឋាភិបាលដោយលោក ហ៊ុន ម៉ាណែត។
ក្នុងខណៈរដ្ឋាភិបាលប្រកាសធ្វើកំណែទម្រង់ថ្មីនេះ លោក ហ៊ុន ម៉ានី រដ្ឋមន្ត្រីក្រសួងមុខងារសាធារណៈបញ្ជាក់ជំហរគាំទ្រយ៉ាងមុះមុតលើការកែទម្រង់វិស័យមុខងារសារណៈតាមយន្តការប្រឡងជ្រើសរើសមន្ត្រីរាជការថ្នាក់ជាតិ ដែលជាគោលការណ៍នយោបាយថ្មីរបស់រដ្ឋាភិបាល។
លោកបានបង្ហាញឆន្ទៈនៅលើទំព័រហ្វេសប៊ុកផ្លូវការរបស់លោកកាលពីថ្ងៃសៅរ៍ថា ក្រសួងមុខងារសាធារណៈនឹងពន្លឿនយន្តការប្រឡងមន្ត្រីរាជការថ្នាក់ជាតិឱ្យសម្រេចយ៉ាងឆាប់រហ័ស។
លោកនិយាយថា៖ «ខ្ញុំពិតជាមានសេចក្តីរីករាយនិងមានកិត្តិយសដោយបានក្លាយជាផ្នែកមួយក្នុងនាមជាសេនាធិការរាជរដ្ឋាភិបាល ដើម្បីចូលរួមក្នុងកិច្ចការកំណែទម្រង់វិស័យមុខងារសាធារណៈ»។
លោក យក់ ប៊ុនណា អ្នកនាំពាក្យក្រសួងមុខងារសាធារណៈ បានប្រាប់ខ្មែរថាមស៍ថា រដ្ឋាភិបាលបានបញ្ជាក់រួមមកហើយ ការធ្វើកំណែទម្រង់ការប្រឡងចូលក្របខណ្ឌរដ្ឋត្រូវឈរលើគោលការណ៍ “អ្នកចេះ គឺជាប់” ដើម្បីធានាសង្គតភាព ភាពត្រឹមត្រូវ តម្លាភាព និងយុត្តិធម៌។
លោកបញ្ជាក់ថា ការប្រឡងជ្រើសរើសមន្ត្រីរាជការចូលក្របខ័ណ្ឌរដ្ឋត្រូវរៀបចំធ្វើដោយមានស្ថាប័នជាតិ ដើម្បីគ្រប់គ្រងការប្រឡងនោះ ហើយរដ្ឋាភិបាលនឹងកំណត់នីតិវិធីប្រឡងយ៉ាងឆាប់នាពេលខាងមុខ។
លោកបន្ថែមថា ការប្រឡងចូលក្របខណ្ឌរដ្ឋកន្លងមក គឺជាការប្រឡងជ្រើសរើសក្រោមនីតិវិធីនិងយន្តការដាច់ដោយឡែកពីគ្នារបស់ក្រសួងស្ថាប័ននីមួយៗ ប៉ុន្តែចាប់ពីពេលនេះតទៅ រដ្ឋាភិបាលនឹងពិនិត្យកែលម្អយន្តការដែលមានស្រាប់របស់ក្រសួងស្ថាប័ននីមួយៗឱ្យកាន់តែល្អប្រសើរឡើងថែមទៀត។
លោកបន្តថា តាមគោលគំនិតរបស់រដ្ឋាភិបាល ការរៀបចំយន្តការប្រឡងចូលក្របខណ្ឌរដ្ឋ គឺមានយន្តការស្រដៀងនឹងយន្តការប្រឡងសញ្ញាបត្រមធ្យមសិក្សាទុតិយភូមិរបស់ក្រសួងអប់រំ យុវជន និងកីឡា ប៉ុន្តែត្រូវមានគណកម្មការជាតិរួមមួយ ដើម្បីគ្រប់គ្រងការប្រឡងជ្រើសរើសមន្ត្រីរាជការថ្នាក់ជាតិ។
លោកនិយាយថា៖ «ដើម្បីធ្វើកំណែទម្រង់នេះ រដ្ឋាភិបាលបានផ្អាកការប្រឡងជ្រើសរើសមន្ត្រីមន្ត្ររាជការចូលក្របខណ្ឌរដ្ឋសម្រាប់ឆ្នាំ២០២៣ ដែលមិនទាន់បានប្រឡងចប់សព្វគ្រប់។ យើងរង់ចាំនីតិវិធីថ្មី ដែលនឹងចាប់ផ្ដើមអនុវត្តក្នុងឆ្នាំ២០២៤»។
លោកបានបញ្ជាក់ថា៖ «សម្រាប់ឆ្នាំ២០២៣ រដ្ឋាភិបាលមានផែនការប្រឡងជ្រើសរើសមន្ត្រីរាជការចូលក្របខណ្ឌរដ្ឋប្រមាណជិត ៤ ០០០នាក់ ដែលក្នុងនោះក្រសួងអប់រំត្រូវការប្រមាណ ៣ ០០០នាក់ ព្រោះក្រសួងអប់រំ ជាក្រសួងអាទិភាពដែលត្រូវការធនធានមនុស្សច្រើន។ ចំណែកនៅសល់ជិត ១ ០០០នាក់ទៀត គឺយើងបែងចែកទៅតាមក្រសួងស្ថាប័នផ្សេងៗ ដើម្បីជំនួសមន្ត្រីដែលបាត់ក្របខណ្ឌដោយសារការចូលនិវត្តន៍និងការទទួលមរណភាពជាដើម»។
លោកបានបន្ថែមថា សម្រាប់ឆ្នាំ២០២៤ខាងមុខ គឺស្ថិតក្នុងដំណាក់ការរៀបចំផែនការក្របខណ្ឌជាថ្មី។ ដូច្នេះក្រសួងមុខងារសាធារណៈនឹងធ្វើកិច្ចការងារនេះជាមួយក្រសួងស្ថាប័នពាក់ព័ន្ធ ហើយធ្វើរបាយការណ៍ដាក់ជូននាយករដ្ឋមន្ត្រី ហ៊ុន ម៉ាណែត ដើម្បីសម្រេច។
នៅក្នុងពិធីជួបសំណេះសំណាលជាមួយកម្មករប្រមាណជិតពីរពាន់នាក់នៅខេត្តកំពង់ស្ពឺ កាលពីថ្ងៃសៅរ៍ លោកនាយករដ្ឋមន្ត្រី ហ៊ុន ម៉ាណែត បានប្រកាសធ្វើកំណែទម្រង់ការប្រឡងចូលក្របខណ្ឌរដ្ឋដោយឈរលើគោលការណ៍ “អ្នកចេះ គឺជាប់”។
លោកបញ្ជាក់ថា ចាប់ផ្ដើមអនុវត្តដំបូងលើគោលការណ៍នៃគោលនយោបាយកំណែទម្រង់របស់រដ្ឋាភិបាលអាណត្តិថ្មី គឺកំណែទម្រង់ការប្រឡងជ្រើសរើសមន្ត្រីរាជការចូលក្របខណ្ឌមុខងារសាធារណៈ។ កំណែទម្រង់នេះនឹងរៀបចំយន្តការថ្នាក់ជាតិមួយដោយរៀបចំឱ្យមានការប្រឡងយន្តការថ្នាក់កណ្ដាល ដែលសហការជាមួយក្រសួងជំនាញ ដើម្បីធានាសង្គតភាព ភាពត្រឹមត្រូវ តម្លាភាព និងយុត្តិធម៌។
លោកបានអភ័យទោសចំពោះបេក្ខជនប្រមាណ ៩០០នាក់ ដែលបានដាក់ពាក្យប្រឡងចូលក្របខណ្ឌក្រសួងកសិករ រុក្ខាប្រមាញ់ និងនេសាទ ដែលត្រូវបានផ្អាកជាបណ្ដោះអាសន្ន។
លោកបានលើកឡើងថា៖ «យើងនឹងខិតខំពន្លឿននីតិវិធីនេះដោយរៀបចំឱ្យបានល្អ។ យើងលែងមានក្រសួងនេះរៀបចំបែបនេះ ក្រសួងនោះរៀបចំបែបនោះទៀតទេ គឺមន្ត្រីក្របខណ្ឌទាំងអស់ត្រូវប្រឡងតាមយន្តការថ្នាក់ជាតិ ដើម្បីយុត្តិធម៌និងតម្លាភាព»។
លោក ហេង គឹមហុង ប្រធានផ្នែកកម្មវិធីស្រាវជ្រាវនិងតស៊ូមតិនៃសមាគមបណ្តាញយុវជនកម្ពុជា បានលើកឡើងថា ការប្រឡងជ្រើសរើសមន្ត្រីរាជការចូលបម្រើការងារក្នុងក្របខណ្ឌរដ្ឋ គឺគួរតែធ្វើកំណែទម្រង់ ពីព្រោះវាជាចំណុចសំខាន់ក្នុងការជ្រើសរើសធនធានមនុស្សសម្រាប់ការជំរុញឱ្យមានការអភិវឌ្ឍក្នុងប្រព័ន្ធមន្ត្រីរាជការសាធារណៈ។
លោកបន្តថា ដើម្បីបម្រើសេវាឱ្យបានល្អប្រសើរ គឺត្រូវការអ្នកមានសមត្ថភាពពិតប្រាកដ រួមទាំងចំណេះដឹងនិងទស្សនវិស័យបម្រើផលប្រយោជន៍សង្គម។
លោកយល់ឃើញថា៖ «បញ្ហានេះមិនមែនទើបតែមានការលើកឡើងនៅក្នុងអាណត្តិរបស់លោក ហ៊ុន ម៉ាណែត ប៉ុណ្ណេះទេ។ បញ្ហានេះត្រូវបានលើកឡើងតាំងពីអាណត្តិដឹកនាំដោយលោក ហ៊ុន សែន មកម្ល៉េះ ប៉ុន្តែយើងសង្ឃឹមថា ការលើកឡើងរបស់លោកនាយករដ្ឋមន្ត្រីថ្មីនឹងជំរុញឱ្យមានការអនុវត្តក្នុងក្របខណ្ឌទូទាំងប្រទេស ហើយនៅពេលអនាគតប្រទេសយើងនឹងទទួលបានមន្ត្រីរាជការសាធារណៈដែលមានសមត្ថភាពពិតប្រាកដ»៕