យោងតាមព្រឹត្តិបត្រស្ថិតិបំណុលសាធារណៈកម្ពុជាដែលចេញផ្សាយដោយក្រសួងសេដ្ឋកិច្ច និងហិរញ្ញវត្ថុកាលពីសប្តាហ៍មុនបំណុលសាធារណៈកម្ពុជាមានចំនួន ១១,២៤ពាន់លានដុល្លារនៅឆ្នាំ២០២៣ ហើយហានិភ័យគឺនៅមានកម្រិតទាប។
យោងតាមប្រភពដដែល សមាសភាពបំណុលសាធារណៈទាំងនេះរួមមាន ៤៦ភាគរយជាដុល្លារអាមេរិក ១៩ភាគរយជាអេសដេអ៊ែ (SDR) ១១ ភាគរយ ជាយ័នចិន ១១ ភាគរយជាយេនជប៉ុន ៧ភាគរយជាអឺរ៉ូ និង៦ភាគរយជារូបិយប័ណ្ណជាតិ និងរូបិយប័ណ្ណផ្សេងៗ។
ក្នុងចំណោមនោះ ៩៩,៥ ភាគរយ ឬស្មើនឹង១១,១៩ ពាន់លានដុល្លារ គឺជាបំណុលសាធារណៈក្រៅប្រទេស ហើយនៅសល់ជាបំណុលសាធារណៈក្នុងប្រទេស។
ទន្ទឹមនឹងនេះ៦៤ភាគរយនៃបំណុលសាធារណៈគឺជាការខ្ចីពីដៃគូក្របខ័ណ្ឌទ្វេភាគី ខណៈដែល៣៦ភាគរយបានមកពីដៃគូក្របខ័ណ្ឌពហុភាគី។ បំណុលសាធារណៈក្នុងប្រទេសមានចំនួន ០,៥ ភាគរយ។
នៅឆ្នាំ២០២៣ រដ្ឋាភិបាលកម្ពុជាបានចុះកិច្ចព្រមព្រៀងឥណទានសម្បទានថ្មីជាមួយដៃគូអភិវឌ្ឍនានាសរុបចំនួន ១,៨១ ពាន់លានដុល្លារ សមមូលនឹង១.៣៣៩,២២ លាន SDR ដែលស្មើនឹង៧៩ ភាគរយនៃពិតានដែលច្បាប់អនុញ្ញាត។
សរុបមក ឥណទានទាំងនេះសុទ្ធសឹងជាឥណទានមានកម្រិតសម្បទានខ្ពស់ដោយមានធាតុអំណោយជាមធ្យមប្រមាណ៤៥ ភាគរយ” ។
“គោលបំណងនៃការចុះកិច្ចព្រមព្រៀងឥណទានទាំងនេះគឺសម្រាប់បំពេញតម្រូវការហិរញ្ញប្បទានក្នុងវិស័យអាទិភាពរបស់រាជរដ្ឋាភិបាលដែលគាំទ្រដល់កំណើនសេដ្ឋកិច្ចរយៈពេលវែង និងផលិតភាពសេដ្ឋកិច្ចរបស់ប្រទេស”។
លោកនាយករដ្ឋមន្ត្រី ហ៊ុន ម៉ាណែត បាននិយាយកាលពីពេលថ្មីៗនេះថា កំណែទម្រង់ការគ្រប់គ្រងហិរញ្ញវត្ថុសាធារណៈបានជួយប្រទេសក្នុងការកាត់បន្ថយការខ្ចីប្រាក់ពីបរទេស។
លោកបានមានប្រសាសន៍ក្នុងពិធីបិទសន្និបាតបូកសរុបការងារប្រចាំឆ្នាំ២០២៣ ស្តីពីកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈដំណាក់កាលទី ៤ ដែលបានធ្វើឡើងកាលពីថ្ងៃទី ១៤ ខែកុម្ភៈថា “ការគ្រប់គ្រងហិរញ្ញវត្ថុសាធារណៈបានពង្រឹងភាពជាម្ចាស់ និងតួនាទីរបស់រដ្ឋាភិបាលកម្ពុជាក្នុងការទទួលខុសត្រូវចំពោះជោគវាសនារបស់ប្រទេសជាតិ និងកាត់បន្ថយការខ្ចីប្រាក់ពីបរទេស”។
លោកបានបន្តថា នេះបានឆ្លុះបញ្ចាំងអោយឃើញពីប្រព័ន្ធហិរញ្ញវត្ថុសាធារណៈរបស់កម្ពុជាកំពុងដើរតាមស្តង់ដារអន្តរជាតិ និងឧត្តមភាព។
លោកបានបន្តថា “កម្ពុជាមិនបានបាត់បង់អធិបតេយ្យភាពរបស់ខ្លួនដោយសារតែការខ្ចីប្រាក់ពីបរទេសទេ ខណៈដែលកម្ចីទាំងនោះត្រូវបានប្រើប្រាស់ប្រកបដោយការទទួលខុសត្រូវក្នុងការវិនិយោគលើហេដ្ឋារចនាសម្ព័ន្ធ”។
នៅក្នុងឆ្នាំ២០២៣រដ្ឋាភិបាលបានបោះផ្សាយលក់មូលបត្ររដ្ឋសរុបចំនួន២៣៨ ពាន់លានរៀល ស្មើនឹង៥៨,២៦ លានដុល្លារអាមេរិក។
នៅក្នុងឆ្នាំ២០២៤រាជរដ្ឋាភិបាលគ្រោងបោះផ្សាយមូលបត្ររដ្ឋចំនួន ៤៤០ ប៊ីលានរៀល ដែលស្មើនឹងប្រមាណ ១០៨លានដុល្លារដែលនឹងត្រូវបានប្រើដើម្បីផ្តល់ប្រាក់ចំណូលផ្ទាល់ និងធានាប្រសិទ្ធភាពនៃការវិនិយោគ និងនិរន្តរភាពនៃការគ្រប់គ្រងបំណុល នេះបើយោងតាមច្បាប់ថវិការបស់ក្រសួងសម្រាប់ឆ្នាំ២០២៤ ។
យោងតាមព្រឹត្តិបត្រនេះ រដ្ឋាភិបាលបានទូទាត់សេវាបំណុលសរុបចំនួន ៥១៩ លានដុល្លារសម្រាប់បំណុលសាធារណៈទាំងក្រៅប្រទេស និងក្នុងប្រទេស។
ក្រសួងបានឲ្យដឹងទៀតថា ស្ថានភាពបំណុលសាធារណៈកម្ពុជានៅតែបន្តមាន «ចីរភាព និងមានហានិភ័យកម្រិតទាប»។