រដ្ឋាភិបាលកម្ពុជាបានអនុញ្ញាឱ្យក្រសួង និងស្ថាប័នពាក់ព័ន្ធរៀបចំធ្វើលិខិតឆ្លងដែននៅលើទឹកដីប្រទេសកូរ៉េខាងត្បូង ដើម្បីកាត់បន្ថយលើការចំណាយ និងពេលវេលាដល់ពលករខ្មែរ ដែលកំពុងបម្រើការងារគ្រប់វិស័យនៅក្នុងប្រទេសកូរ៉េ។
លោកនាយករដ្ឋមន្ត្រី ហ៊ុន ម៉ាណែត បានលើកឡើងក្នុងជំនួបសំណេះសំណាលជាមួយកម្មករនិយោជិតប្រមាណជិត២ម៉ឺននាក់ នៅស្រុកសំរោងទង ខេត្តកំពង់ស្ពឺ កាលពីថ្ងៃសៅរ៍ថា ទោះបីប្រជាពលរដ្ឋខ្មែររស់នៅប្រទេសណាក៏ដោយ ក៏រដ្ឋាភិបាលមានកាតព្វកិច្ចគាំពារ និងផ្ដល់សេវាជូនដូចទៅនឹងប្រជាពលរដ្ឋក្នុងប្រទេសដែរ។
លោកបន្ថែមថា កាតព្វកិច្ចគាំពារ និងផ្ដល់សេវានេះ មិនត្រឹមតែផ្ដល់ក្នុងប្រទេសប៉ុណ្ណោះទេ ប្រជាពលករខ្មែរនៅក្រៅប្រទេស ក៏រដ្ឋាភិបាលមានកាតព្វកិច្ចជួយសម្របសម្រួល និងផ្ដល់ការគាំពារ ជាពិសេសផ្ដល់សេវាសាធារណៈផ្សេងៗតាមដែលអាចធ្វើទៅបាន។
លោក ហ៊ុន ម៉ាណែត ធ្លាប់ដឹងអំពីបញ្ហាប្រឈមរបស់ពលករនៅកូរ៉េខាងត្បូង គឺការពន្យារសុពលភាពលិខិតឆ្លងដែន ដែលមានការលំបាកដោយសារមានលក្ខខណ្ឌមួយចំនួនពាក់ព័ន្ធផ្លូវច្បាប់ ក៏ដូចជាការគិតគូរពីសន្តិសុខជាតិ គិតគូរពីការក្លែងបន្លំជាដើម។
លោកនាយករដ្ឋមន្ត្រី ហ៊ុន ម៉ាណែត ក៏បានជំរុញដល់ក្រសួងការបរទេស និងសហប្រតិបត្តិការអន្តរជាតិ អគ្គនាយកអត្តសញ្ញាណកម្ម នៃក្រសួងមហាផ្ទៃ ក្រសួងសេដ្ឋកិច្ចនិងហិរញ្ញវត្ថុ និងក្រសួងយុត្តិធម៌ ដើម្បីសម្របសម្រួលធ្វើលិខិតឆ្លងដែនសម្រាប់ពលករខ្មែរដែលកំពុងបម្រើការងារនៅកូរ៉េខាងត្បូង។
លោកបញ្ជាក់ថា៖ «ខ្ញុំបានសម្រេចអនុញ្ញាតឱ្យរៀបចំធ្វើ Passport នៅក្រៅប្រទេសតែម្ដង ចាប់ផ្ដើមពីកូរ៉េខាងត្បូងមុនគេ ដោយនៅទីនោះមានការលំបាកក្នុងការធ្វើដំណើរមកធ្វើនៅប្រទេសយើងឆ្ងាយ»។
លោកបន្ថែមថា ដើម្បីដោះស្រាយពីទុក្ខលំបាកលើបញ្ហាសន្តិសុខ និងសុវត្ថិភាពកម្មករ សម្រេចឱ្យបង្កើតការិយាល័យអនុពន្ធមួយ ដើម្បីឱ្យមន្ត្រីកម្ពុជាភ្ជាប់បណ្ដាញ ទិន្នន័យ និងធ្វើការជាមួយស្ថាប័ននៅក្នុងប្រទេស ដូចជាការបំពេញបែបបទ និងការធ្វើលិខិតថ្កោលទោសជាដើម។
លោក ហ៊ុន ម៉ាណែត ក៏បានណែនាំក្រសួងការបរទេស និងសហប្រតិបត្តិការអន្តរជាតិ ដើម្បីបង្កើតកុងស៊ុលកម្ពុជានៅភាគខាងត្បូងប្រទេសថៃ ដើម្បីពង្រីកការផ្តល់សេវានានាជូនពលករខ្មែរដែលកំពុងធ្វើការនៅទីនោះ។
លោកនាយករដ្ឋមន្ត្រី ក៏បានណែនាំមន្ត្រីស្ថានទូតកម្ពុជា កុងស៊ុល និងកម្លាំងនគរបាលពាក់ព័ន្ធ ត្រូវសម្រួលបែបបទនៃការធ្វើលិខិតឆ្លងដែនជូនពលករឱ្យបានល្អប្រសើរ ឆាប់រហ័ស និងជៀងវាងការយកថវិកាក្រៅប្រព័ន្ធ។
លោក យ៉ង គិមអេង នាយកប្រតិបត្តិនៃមជ្ឈមណ្ឌលប្រជាពលរដ្ឋដើម្បីសន្តិភាព និងការអភិវឌ្ឍន៍ បានឱ្យដឹងថា ការរៀបចំឱ្យមានកន្លែងធ្វើលិខិតឆ្លងដែននៅលើទឹកដីប្រទេសកូរ៉េខាងត្បូង គឺជារឿងល្អសម្រាប់ប្រជាពលរដ្ឋខ្មែរ ដែលកំពុងបម្រើការងារ និងរស់នៅប្រទេសកូរ៉េ។
លោកបន្ថែមថា ការធ្វើលិខិតឆ្លងដែនក្នុងប្រទេសកូរ៉េដោយផ្ទាល់បែបនេះ បានរួមចំណែកកាត់បន្ថយលើការចំណាយថវិកា ពេលវេលា និងចំណេញច្រើនសម្រាប់ការរួមចំណែកអភិវឌ្ឍសង្គមជាតិ និងពលករខ្មែរ ជាពិសេសចៀសវាងការចោទប្រកាន់ករណីប្រព្រឹត្ដអំពើពុករលួយ ឬមានភាពយឺតយ៉ាវជាដើម។
លោក យ៉ង គិមអេង បញ្ជាក់ថា៖ «ខ្ញុំយល់ថា ការធ្វើលិខិតឆ្លងដែន លិខិតស្នាម លិខិតថ្កោលទោស គឺប្រសើរណាស់ [,,,] ជាពិសេសកិច្ចការរដ្ឋបាលកាន់តែមានប្រសិទ្ធភាព។
ខ្ញុំសង្ឃឹមថា ដំណើរការនេះនឹងកើតមានឡើងពិតប្រាកដ»។
អគ្គរាជទូតកម្ពុជាប្រចាំប្រទេសកូរ៉េខាងត្បូង លោកស្រី ជ្រឹង បទុមរង្សី បានឱ្យដឹងកាលពីម្សិលមិញថា ក្នុងនាមជាមន្ត្រីការទូត និងបុគ្គលិកទាំងអស់ ព្រមទាំងពលករ និងប្រជាពលរដ្ឋខ្មែរ ដែលកំពុងធ្វើការ និងរស់នៅក្នុងកូរ៉េ គឺពិតជាអរគុណដល់រដ្ឋាភិបាលកម្ពុជា ដែលអនុញ្ញាតឱ្យមានការរៀបចំធ្វើលិខិតឆ្លងដែននៅក្រៅប្រទេស។
លោកស្រីបន្ថែមថា ការអនុញ្ញាតឱ្យមានកន្លែងធ្វើលិខិតឆ្លងដែននៅកូរ៉េខាងត្បូង គឺជាដំណឹងដ៏សែនរីករាយសម្រាប់ពលករ និងប្រជាពលរដ្ឋខ្មែរ ដែលកំពុងធ្វើការ និងរស់នៅក្រៅប្រទេស។
លោកស្រីបញ្ជាក់ថា៖ «នេះ គឺជាការសម្រេចចិត្តប្រកបដោយគតិបណ្ឌិត និងប្រកបដោយចក្ខុវិស័យវែង
ឆ្ងាយរបស់សម្ដេចធិបតីនាយករដ្ឋមន្ត្រី ក្នុងគោលដៅបង្ខិតសេវាសាធារណៈឱ្យដល់ដៃប្រជាពលរដ្ឋ ដើម្បីបម្រើផលប្រយោជន៍ជូនប្រជាពលរដ្ឋខ្មែរទាំងក្នុង និង
ក្រៅប្រទេស»។
ក្នុងសេចក្ដីប្រកាសព័ត៌មានរបស់ក្រុមអ្នកនាំពាក្យនៃខុទ្ទកាល័យនាយករដ្ឋមន្ត្រីកម្ពុជា កាលពីថ្ងៃសុក្រ បានឱ្យដឹងថា លោក ហ៊ុន ម៉ាណែត បានជួបពិភាក្សាការងារជាមួយលោក គីម ជីន លូ (Kim Jin Pyo) ប្រធានរដ្ឋសភាកូរ៉េខាងត្បូង ដើម្បីលើកកម្ពស់ទំនាក់ទំនងប្រទេសទាំងពីរឱ្យក្លាយជាដៃគូយុទ្ធសាស្ត្រគ្រប់ជ្រុងជ្រោយ។
ក្នុងជំនួបនេះ លោក ហ៊ុន ម៉ាណែត បានស្នើភាគីកូរ៉េផ្តល់ការគាំពារ និងពិចារណាបង្កើនកូតាដល់ពលករកម្ពុជានៅប្រទេសកូរ៉េបន្ថែមទៀត ដើម្បីកំណើនសេដ្ឋកិច្ច និងការអភិវឌ្ឍ៕