ផ្សារមូលបត្រកម្ពុជា (CSX) បានឱ្យដឹងថា តំបន់សេដ្ឋកិច្ចពិសេស Royal Group Phnom Penh (RGPPSEZ) បានកត់ត្រាប្រាក់ចំណូលសរុបជិត ៦៤ លានដុល្លារក្នុងឆ្នាំ២០២៣ កើនឡើង១៣៧ ភាគរយបើធៀបនឹងឆ្នាំ២០២២។
ក្រុមហ៊ុនបានចុះបញ្ជីជាមួយCSXក្រោមឈ្មោះ PPSP រកចំណូលសរុបចំនួន ២៥៤,៦៩ ពាន់លានរៀលសម្រាប់ឆ្នាំ២០២៣ ឬជិត៦៣ លានដុល្លារ ដោយបានកើនឡើង ១៤៧,៣ ពាន់លានរៀល បើធៀបនឹងចំណូលឆ្នាំ ២០២២ ឬជាង ៣៦,៥ លានដុល្លារ។
ប្រធានក្រុមហ៊ុន PPSEZ លោក គិត ម៉េង បានលើកឡើងនៅក្នុងរបាយការណ៍ហិរញ្ញវត្ថុរបស់ក្រុមហ៊ុនថា លទ្ធផលការងារឆ្នាំ២០២៣ របស់ក្រុមហ៊ុនមានភាពរឹងមាំ បើទោះបីជាមានផលប៉ះពាល់លើការវិនិយោគ និងពាណិជ្ជកម្មសកល រួមទាំងសង្រ្គាមអ៊ុយក្រែន និងរុស្ស៊ីដែលកំពុងបន្ត ដែលបានបង្កើតបញ្ហាប្រឈមសម្រាប់អាជីវកម្មមួយចំនួន និងភាពមិនប្រាកដប្រជានៅក្នុងពិភពលោក។
លោកបានបន្តថា “ជាសំណាងល្អ ក្រុមហ៊ុនមិនរងផលប៉ះពាល់ទេ ដោយសារក្រុមហ៊ុននៅតែអាចទាក់ទាញប្រតិបត្តិករដែលមានសក្តានុពលថ្មីៗជាច្រើន ហើយក៏ដោយសារវិនិយោគិនដែលមានស្រាប់របស់យើងម្នាក់ដែលបានសម្រេចចិត្តពង្រីកប្រតិបត្តិការទៅជាទ្រង់ទ្រាយធំជាងមុននៅកម្ពុជា”។
លោកក៏បានកត់សម្គាល់ផងដែរថាតំបន់សេដ្ឋកិច្ចពិសេសកំពុងបន្តកែលម្អហេដ្ឋារចនាសម្ព័ន្ធរបស់ខ្លួន ដើម្បីលើកកម្ពស់បរិយាកាសវិនិយោគ ដូចជាការកែលម្អថ្មីៗចំពោះប្រព័ន្ធលូ និងប្រព័ន្ធគ្រប់គ្រងទឹកជំនន់។
លោកបានបញ្ជាក់ថា “ការជួសជុលកំពុងបន្ត ហើយយើងមានបំណងកែលម្អ និងផ្តល់នូវការតភ្ជាប់ទៅកាន់ទីតាំងផ្សេងៗ ដើម្បីភាពងាយស្រួល និងអត្ថប្រយោជន៍នៃប្រតិបត្តិការទាំងអស់ដោយមិនមានការរំខាន” ។
របាយការណ៍ក៏បានបញ្ជាក់ផងដែរថា បច្ចុប្បន្នតំបន់សេដ្ឋកិច្ចពិសេសមានក្រុមហ៊ុនចំនួន ៩២ មកពីប្រទេសជប៉ុន សិង្ហបុរី ម៉ាឡេស៊ី តៃវ៉ាន់ កូរ៉េ ហ្វីលីពីន ចិន វៀតណាម តួកគី សហរដ្ឋអាមេរិក កម្ពុជា និងថៃ។
ក្រុមហ៊ុនដែលកំពុងប្រតិបត្តិការនៅក្នុងតំបន់សេដ្ឋកិច្ចពិសេសមានចាប់ពីឧស្សាហកម្មធុនស្រាល មធ្យម និងពឹងផ្អែកលើកម្លាំងពលកម្ម រួមទាំងការផលិតផលិតផលមេកានិច និងអគ្គិសនី សម្លៀកបំពាក់ និងស្បែកជើង ការកែច្នៃម្ហូបអាហារ និងកែច្នៃដែលទាក់ទងនឹងកសិកម្ម រថយន្ត គ្រឿងបន្លាស់រថយន្ត និងការផ្គុំគ្រឿងបន្លាស់ នឹងភស្តុភារ។
ឯកសារចុះបញ្ជីនៅខែមេសា ក៏បានសង្ខេបប្រាក់ចំណេញរបស់ក្រុមហ៊ុនបន្ទាប់ពីពន្ធ ឬប្រាក់ចំណូលសុទ្ធសម្រាប់ឆ្នាំ២០២៣ ឡើងដល់ ៣២,៣ ពាន់លានរៀល ឬប្រហែល ៧,៩ លានដុល្លារ។
បើប្រៀបធៀបទៅនឹង ៨,៥ ពាន់លានរៀល ឬប្រហែល ២,១ លានដុល្លារក្នុងឆ្នាំ ២០២២ សម្រាប់ឆ្នាំ ២០២៣ គឺមានការកើនឡើងយ៉ាងខ្លាំងប្រហែល ២៧៦ ភាគរយ។
ទ្រព្យសកម្មសរុបការកើនឡើង ៥ ភាគរយនៅឆ្នាំ២០២៣ ដែលឈានដល់ ៤៦៦,៩ ពាន់លានរៀល ឬជិត ១១៥,៦ លានដុល្លារ និងកើនឡើងពី ៤៤៤,៤ ពាន់លានរៀលកាលពីឆ្នាំមុន។
ទ្រព្យសកម្មរយៈពេលវែងឈានដល់ ១៧៩,២ ពាន់លានរៀល ហើយទ្រព្យសកម្មចរន្តឈានដល់ ២៨៧,៧ ពាន់លានរៀល។
ដោយឡែក ភាគហ៊ុនសរុបរបស់ក្រុមហ៊ុនមានចំនួន ២៥៣,៧ ពាន់លានរៀល ឬប្រហែល ៦២,៨ លានដុល្លារ កើនឡើងពី ២២៧,២ ពាន់លានរៀលក្នុងឆ្នាំ២០២២ និងកើនឡើងប្រហែល ១១,៧ ភាគរយកាលពីឆ្នាំមុន។
កំណើនរបស់តំបន់សេដ្ឋកិច្ចពិសេសនៅតែមានការកើនឡើង បើទោះបីជាសេដ្ឋកិច្ចពិភពលោកកំពុងស្ថិតនៅក្នុងស្ថានភាពមិនល្អ ដែលនេះគឺជាដំណឹងល្អសម្រាប់ក្រុមហ៊ុនអាជីវកម្មក្នុងស្រុក គឺក្រុមហ៊ុន Royal Group ដែលបានទិញភាគហ៊ុនភាគច្រើនជាផ្លូវការនៅក្នុងតំបន់ PPSP កាលពីខែមករា ឆ្នាំ២០២២។
ក្រុមហ៊ុន Royal Group តំណាងដោយក្រុមហ៊ុនបុត្រសម្ព័ន្ធរបស់ខ្លួន Inter Logistics (Cambodia) Co., Ltd. បានទិញភាគហ៊ុនភាគច្រើននៅ PPSP នៅដើមឆ្នាំ២០២២ ដែលនៅពេលនោះ Royal Group បានក្លាយជាម្ចាស់ភាគហ៊ុនគ្រប់គ្រងរបស់ក្រុមហ៊ុន។
បន្ទាប់មក លោក គិត ម៉េង ប្រធានក្រុមហ៊ុន Royal Group ត្រូវបានតែងតាំងជាប្រធានក្រុមប្រឹក្សាភិបាល PPSP។ ទន្ទឹមនឹងនេះ ក្រុមប្រឹក្សាភិបាល PPSP បានប្តូរឈ្មោះក្រុមហ៊ុនទៅជា ‘Royal Group PPSP’ (RGPPSP) ដើម្បីឆ្លុះបញ្ចាំងពីរចនាសម្ព័ន្ធកម្មសិទ្ធិថ្មីរបស់ខ្លួន។
ក្រុមហ៊ុន Royal Group ក៏កាន់កាប់ទាំងស្រុងនូវក្រុមហ៊ុន Royal Group ប៉ោយប៉ែត SEZ Co., Ltd. និងក្រុមហ៊ុន Royal Group កណ្តាល SEZ ដែលជាក្រុមហ៊ុនបុត្រសម្ព័ន្ធពីរ ដែលអភិវឌ្ឍ និងប្រតិបត្តិការតំបន់ឧស្សាហកម្មនៅក្នុងខេត្តរៀងៗខ្លួន។