រដ្ឋាភិបាលតាមរយៈក្រសួងយុត្តិធម៌ បង្កើតក្រុមការងារវាយតម្លៃហានិភ័យសម្អាតប្រាក់និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ ដើម្បីកំណត់អត្តសញ្ញាណនៃការគំរាមកំហែង និងធានាគ្មានភាពងាយរងគ្រោះពីការសម្អាតប្រាក់ និងរីកសាយអាវុធមហាប្រល័យ។
ក្នុងសេចក្ដីសម្រេចស្ដីពីការបង្កើតក្រុមការងាររបស់ក្រសួងយុត្តិធម៌វាយតម្លៃហានិភ័យសម្អាតប្រាក់និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ ដែលផ្សព្វផ្សាយកាលពីម្សិលមិញថា ក្រុមការងារខាងលើនេះ គឺមានប្រធាន អនុប្រធាន និងសមាជិកសរុបចំនួន៥១នាក់។
ក្នុងនោះ លោក កេង សុម៉ារិទ្ធ រដ្ឋលេខាធិការក្រសួងយុត្តិធម៌ ត្រូវបានតែងតាំងជាប្រធាន និងលោក សុង ឆវ័ន្ត អនុរដ្ឋលេខាធិការក្រសួងយុត្តិធម៌ លោក ប៉ែន ពេជ្រសាលី ប្រតិភូរដ្ឋាភិបាល និងជាអគ្គនាយកកិច្ចការអយ្យការ និងព្រហ្មទណ្ឌ និងលោក ឃ្លោក ដារ៉ា ប្រតិភូរដ្ឋាភិបាល និងជាអគ្គនាយកកិច្ចការអន្តរជាតិ និងអភិវឌ្ឍវិស័យយុត្តិធម៌ តែងតាំងជាអនុប្រធាន។
លោក កើត រិទ្ធ រដ្ឋមន្ត្រីក្រសួងយុត្តិធម៌ បានឱ្យដឹងថា ក្រុមការងារខាងលើនេះ មានភារកិច្ចកំណត់អត្តសញ្ញាណនៃការគំរាមកំហែង និងភាពងាយរងគ្រោះពីការសម្អាតប្រាក់និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ។
លោកបន្ថែមថា ក្រុមការងារក៏មានតួនាទីវិភាគប្រភេទ ប្រភព និងផលវិបាកហានិភ័យសម្អាតប្រាក់និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យផងដែរ ជាពិសេសវាយតម្លៃ និងកំណត់អាទិភាពហានិភ័យសម្អាតប្រាក់និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ។
លោកបន្តថា ក្រុមការងារមានភារកិច្ចដាក់ចេញយុទ្ធសាស្ត្រ និងវិធានការទប់ស្កាត់ក្នុងការកាត់បន្ថយហានិភ័យសម្អាតប្រាក់និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធប្រល័យ។
លោក កើត រិទ្ធ បញ្ជាក់ថា៖ «ក្រុមកាងារមានតួនាទីរៀបចំរបាយការណ៍ស្ដីពី លទ្ធផលនៃការវាយតម្លៃហានិភ័យសម្អាតប្រាក់និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យជូនអនុគណៈកម្មាធិការវាយតម្លៃហានិភ័យថ្នាក់ជាតិស្ដីពី ការសម្អាតប្រាក់និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ ដើម្បីបូកសរុបផងដែរ»។
រដ្ឋមន្ត្រីបន្ថែមថា ដោយឡែក អនុប្រធាន និងសមាជិកទាំងអស់នៃក្រុមការងារខាងលើនេះ ត្រូវចូលរួមកិច្ចប្រជុំ និងបំពេញការងារតាមការចាត់តាំងរបស់លោក កេង សុម៉ារិទ្ធ ដែលបានតែងតាំងជាប្រធានក្រុមការងារ។
លោក យ៉ង់ គិមអេង នាយកប្រតិបត្តិនៃមជ្ឈមណ្ឌលប្រជាពលរដ្ឋដើម្បីសន្តិភាព និងការអភិវឌ្ឍ ធ្លាប់ឱ្យដឹងថា ការបង្កើតឱ្យមានក្រុមវាយតម្លៃកិច្ចការខាងលើនេះ គឺជារឿងល្អមួយសម្រាប់កម្ពុជា ដើម្បីក្លាយជាប្រទេសដែលមិនស្ថិតក្នុងបញ្ជីរបស់ FATF។
លោកបញ្ជាក់ថា កម្ពុជាត្រូវតែប្ដេជ្ញាចិត្តខ្ពស់ និងយូរអង្វែង ដើម្បីធានាមិនមានហានិភ័យពាក់ព័ន្ធនឹងសម្អាតប្រាក់និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ កើតឡើងទាំងបច្ចុប្បន្ន និងអនាគត៕