ក្រសួងសាធារណការនិងដឹកជញ្ជូនបានដាក់ចេញវិធានការបន្ទាន់ ដើម្បីទប់ស្កាត់និងបង្ការគ្រោះថ្នាក់ចរាចរណ៍តាមផ្លូវដែក បន្ទាប់ពីមានករណីគ្រោះថ្នាក់ចរាចរណ៍កើតឡើងជាញឹកញាប់នៅតាមផ្លូវរថភ្លើងទាំងពីរខ្សែរបស់កម្ពុជា។
ក្រសួងសហការជាមួយក្រុមហ៊ុនធ្វើអាជីវកម្មលើផ្លូវដែកនៅកម្ពុជាបានធ្វើសន្និសីទរួមគ្នាកាលពីថ្ងៃទីសុក្រ ដើម្បីបង្ហាញវិធានការពង្រឹងសុវត្ថិភាពតាមផ្លូវរថភ្លើង។
លោក ប៉េង ពោធិ៍នា រដ្ឋមន្ត្រីក្រសួងសាធារណការនិងដឹកជញ្ជូនបានលើកឡើងថា ចាប់ពីរាជធានីដល់ជនបទមានផ្លូវឆ្លងកាត់ផ្លូវដែក ដែលនាំឱ្យមានការប្រឈមគ្រោះថ្នាក់ចរាចរណ៍ដោយសារតែពលរដ្ឋធ្វើដំណើរឆ្លងកាត់ផ្លូវដែកដោយមិនមានការប្រុងប្រយ័ត្ន ខណៈច្បាប់ចរាចរណ៍ផ្លូវដែកកំពុងតែពន្លឿន។
លោកថា ការកង្វះយន្តការផ្សព្វផ្សាយឱ្យប្រជាពលរដ្ឋយល់ច្បាស់ពីការធ្វើដំណើរទាំងផ្លូវប្រសព្វនិងផ្លូវឆ្លងកាត់ផ្លូវរថភ្លើង ដូចជាការដាំដើមឈើបាំងស្លាកសញ្ញាចរាចរណ៍ គឺសុទ្ធសឹងជាកត្តាដែលធ្វើឱ្យមានគ្រោះថ្នាក់ចរាចរណ៍កើតឡើង។
លោកបានសម្ដែងការសោកស្ដាយចំពោះឧបទ្ទវហេតុគ្រោះថ្នាក់ចរាចរណ៍កើតឡើងរវាងរថភ្លើងនិងរថយន្តក្រុងនៅចំណុចផ្លូវទៅច្រកល្អៀងស្ថិតក្នុងភូមិបំណក់ ឃុំឈើតុំ ស្រុកក្រគរ ខេត្តពោធិ៍សាត់ កាលពីថ្ងៃទី២៩ ខែមីនា ឆ្នាំ២០២៤។ ឧបទ្ទវហេតុនេះបានធ្វើឱ្យមនុស្សរងរបួសចំនួន១៨នាក់ក្នុងចំណោមអ្នកធ្វើដំណើរ៤៥នាក់។
លោកបានបន្ថែមថា ក្រោយកើតហេតុ លោកនាយករដ្ឋមន្ត្រី ហ៊ុន ម៉ាណែត បានដាក់បទបញ្ជាដល់ក្រសួងសាធារណការនិងដឹកជញ្ជូន រួមជាមួយក្រុមហ៊ុនគ្រប់គ្រងផ្លូវដែកទាំងពីរខ្សែរិះរកវិធានការបន្ទាន់ ដើម្បីពង្រឹងសុវត្ថិភាពចរាចរណ៍ផ្លូវដែក ជាពិសេសនៅចំណុចផ្លូវប្រសប់ និងផ្លូវឆ្លងកាត់ផ្លូវដែក។
លោកបញ្ជាក់ថា ផ្លូវដែកទាំងពីរខ្សែនោះ រួមមានផ្លូវដែកភ្នំពេញ-ព្រះសីហនុ និងភ្នំពេញ-ប៉ោយប៉ែត ដែលមានផ្លូវឆ្លងកាត់៩៧៥កន្លែង។ នៅក្នុងនោះផ្លូវឆ្លងកាត់៥២៥កន្លែងជាផ្លូវសាធារណៈ ហើយផ្លូវឆ្លងកាត់៤៥០កន្លែងជាផ្លូវឯកជន។
លោក ប៉េង ពោធិ៍នា បានលើកឡើងថា ក្រសួងនិងក្រុមហ៊ុនដែលកំពុងធ្វើអាជីវកម្មផ្លូវដែកបានដាក់ចេញវិធានការបន្ទាន់ចំនួនបី ដើម្បីពង្រឹងសុវត្ថិភាពចរាចរណ៍តាមផ្លូវរថភ្លើងនេះ។ ទី១គឺបង្កើនការបំពាក់ហេដ្ឋារចនាសម្ព័ន្ធការពារសុវត្ថិភាពតាមផ្លូវដែក ទី២គឺបំពាក់ស្លាកសញ្ញាចរាចរណ៍ដើម្បីអ្នកបើកបរបានដឹងជាមុនថានៅខាងមុខមានផ្លូវឆ្លងកាត់ផ្លូវដែកត្រូវបង្កើនស្មារតីប្រុងប្រយ័ត្ន និងទី៣គឺបង្កើនការផ្សព្វផ្សាយអប់រំទៅដល់ប្រជាពលរដ្ឋ។
លោកថា៖ «ក្រុមការងារជំនាញដែលមាននាយកដ្ឋានផ្លូវដែកនិងអ្នកបច្ចេកទេសរបស់ក្រុមហ៊ុនត្រូវចុះពិនិត្យគ្រប់ទីតាំងទាំងអស់ ជាពិសេសទីតាំងដែលមានបញ្ហាច្រើនជាងគេ ហើយទីតាំងណាត្រូវដាក់របាំងជាមួយនឹងឆ្មាំរបាំងចាំបិទបើកនិងផ្ដល់សញ្ញាដល់សាធារណជនដែលធ្វើដំណើរតាមដងផ្លូវ»។
លោក John Guiry នាយកប្រតិបត្តិក្រុមហ៊ុនរ៉ូយ៉ាល់រ៉េលវេបានគូលបញ្ជាក់នៅក្នុងសន្និសីទនោះដែរថា អ្នកបច្ចេកទេសរបស់ក្រុមហ៊ុនបានពិនិត្យផ្លូវឆ្លងកាត់ផ្លូវរថភ្លើងទាំងពីរខ្សែរួចរាល់ហើយ។ នៅក្នុងនោះក្រុមហ៊ុននឹងដាក់ប៉ារ៉ាស់រាល់កន្លែងមានផ្លូវឆ្លងកាត់ ហើយផ្លូវឆ្លងកាត់ខុសច្បាស់ក្រុមហ៊ុននឹងបិទចោលតែម្តង៕