ក្រសួងសុខាភិបាលបានអំពាវនាវដល់អាជ្ញាធរមូលដ្ឋានគ្រប់រាជធានីខេត្តចូលរួមទប់ស្កាត់ការផ្ដល់សេវាសុខាភិបាលដែលគ្មានការអនុញ្ញាតពីក្រសួងនិងណែនាំដល់អ្នកប្រកបវិជ្ជាជីវៈសុខាភិបាលឯកជនត្រូវគោរពក្រមសីលធម៌វិជ្ជាជីវៈ។
ការអំពាវនាវនេះធ្វើឡើងតាមរយៈសេចក្ដីប្រកាសព័ត៌មានពីម្សិលមិញ បន្ទាប់ពីក្រសួងសុខាភិបាលកត់សម្គាល់ឃើញការផ្សព្វផ្សាយក្នុងក្របខណ្ឌវិជ្ជាជីវៈសុខាភិបាលរបស់បុគ្គលមួយចំនួនពុំមានមូលដ្ឋានវិទ្យាសាស្ត្រ វេជ្ជសាស្ត្រ និងការទទួលស្គាល់ពីក្រសួងសុខាភិបាលឬគណៈវិជ្ជាជីវៈសុខាភិបាល។
ក្រសួងសុខាភិបាលថា៖ «[សកម្មភាពបែបនេះ] កំពុងធ្វើឱ្យប៉ះពាល់ក្រមសីលធម៌វិជ្ជាជីវៈ សេចក្ដីថ្លៃថ្នូររបស់អ្នកប្រកបវិជ្ជាជីវៈសុខាភិបាល និងប៉ះពាល់ដល់សុខភាពសាធារណៈ»។
ដើម្បីលុបបំបាត់សេវាសុខាភិបាលខុសច្បាប់ ក្រសួងសុខាភិបាលបានអំពាវនាវដល់អ្នកប្របករបរវិជ្ជាជីវៈសុខាភិបាលឯកជនដែលបានបើបបន្ទប់ពិគ្រោះព្យាបាល គ្លីនិក មន្ទីរពហុព្យាបាលត្រូវគោរពក្រមសីលធម៌វិជ្ជាជីវៈនិងច្បាប់ស្ដីពីការគ្រប់គ្រងអ្នកប្រកបវិជ្ជាជីវៈក្នុងវិស័យសុខាភិបាល ព្រមទាំងបញ្ឈប់ការផ្សព្វផ្សាយហួសពីការពិតឬបំភ្លៃការពិត។
ជាមួយនឹងនេះក្រសួងសុខាភិបាលបានជំរុញគណៈវិជ្ជាជីវៈសុខាភិបាលនីមួយៗត្រូវពង្រឹងគ្រប់គ្រងអ្នកប្រកបរបរក្នុងវិស័យសុខាភិបាលដែលស្ថិតក្រោមសមត្ថកិច្ចរបស់ខ្លួន និងពង្រឹងក្រមសីលធម៌វិជ្ជាជីវៈអ្នកប្រកបរបរនេះ ដើម្បីកិត្តិយសនិងសេចក្ដីថ្លៃថ្នូររបស់អ្នកប្រកបវិជ្ជាជីវៈក្នុងវិស័យសុខាភិបាល។
បន្ថែមពីលើសពីនេះ ក្រសួងបានណែនាំដល់អាជ្ញាធរមូលដ្ឋានគ្រប់រាជធានីខេត្តចូលរួមទប់ស្កាត់ការផ្ដល់សេវាសុខាភិបាលណាដែលគ្មានការអនុញ្ញាតពីក្រសួងសុខាភិបាល ជាពិសេសត្រូវទប់ស្កាត់រាល់ការផ្សព្វផ្សាយពាណិជ្ជកម្មក្នុងក្របខណ្ឌវិជ្ជាជីវៈសុខាភិបាលដែលពុំមានមូលដ្ឋានវិទ្យាសាស្ត្រ វេជ្ជសាស្ត្រ និងការផ្សព្វផ្សាយបំភ្លៃពីការពិត ដែលធ្វើឱ្យប្រជាជនមានការយល់ច្រឡំ។
ក្រសួងសុខាភិបាលបានប្រាប់ប្រជាជនកុំជឿលើការឃោសនាមិនហេតុផល គ្មានប្រភពច្បាស់លាស ជាពិសេសកុំជឿលើការផ្សព្វផ្សាយគ្រប់រូបភាពដែលគ្មានការអនុញ្ញាតពីក្រសួងសុខាភិបាល។
ក្រសួងសុខាភិបាលហាមពលរដ្ឋថា៖ «កុំទិញឱសថដាក់លក់តាមប្រព័ន្ធអនឡាញដែលគ្មានការអនុញ្ញាតពីក្រសួងសុខាភិបាល ព្រោះវាមិនស្របច្បាប់ ហើយមិនអាចធានាគុណភាពនិងសុវត្ថិភាព ដែលអាចបង្កគ្រោះថ្នាក់ធ្ងន់ធ្ងរដល់សុខភាព»។
ក្រសួងបន្តថា៖ «ចំពោះអាជីវករធ្វើអាជីវកម្មផលិតផលឱថសសម័យ ឱសថបុរាណ ផលិតផលបំប៉នសុខភាព គ្រឿងសម្អាង ឬផលិតផលបង្ការជំងឺត្រូវគោរពច្បាប់ប្រកបដោយសុចរិត ហើយត្រូវផ្សព្វផ្សាយ ចែកចាយ និងលក់ផលិតផលណាមានច្បាប់អនុញ្ញតពីក្រសួងសុខាភិបាល»។
ក្រសួងសុខាភិបាលសង្ឃឹមនិងជឿជាក់យ៉ាងមុតមោះថា អ្នកពាក់ព័ន្ធក្នុងរឿងនេះទាំងអស់នឹងចូលរួមទប់ស្កាត់ ដើម្បីចៀសវាងការប៉ះពាល់ដល់សុខភាព និងសុខុមាលភាពរបស់ប្រជាជន។
លោកវេជ្ជបណ្ឌិត គួច ម៉េងលី អ្នកជំនាញសុខភាពសាធារណៈដ៏ល្បី ធ្លាប់ប្រាប់ខ្មែរថាមស៍ថា បញ្ហានេះនៅតែមានកើតឡើង ប្រសិនបើការអនុវត្តច្បាប់នៅតែបន្តមានការខ្វះចន្លោះ ជាពិសេសការនាំចូលផលិតផលទាំងនោះត្រូវបានអនុញ្ញាតក្រោមរូបភាពធូររលុង។
លោកនិយាយថា៖ «ផលិតផលឱសថដែលគ្មានការអនុញ្ញាតដោយច្បាប់ គឺមិនត្រឹមតែបង្កផលប៉ះពាល់ធ្ងន់ធ្ងរដល់សុខភាពអ្នកប្រើប្រាស់ប៉ុណ្ណោះទេ ប៉ុន្តែអ្នកប្រកបរបរវិស័យសុខាភិបាលទាំងនោះថែមទាំងកំពុងប្រមូលលុយពីពលរដ្ឋដែលជឿជាក់លើការផ្សព្វផ្សាយរបស់ពួកគេ»។
លោកវេជ្ជបណ្ឌិត ស្នើឱ្យក្រសួងសុខាភិបាលរឹតបន្ដឹងការអនុវត្តច្បាប់ឱ្យបានតឹងរ៉ឹងដូចអ្វីដែលខ្លួនបានលើកឡើង ដើម្បីការពារសុខភាពប្រជាពលរដ្ឋ ចៀសវាងរងគ្រោះថ្នាក់ដោយសារការប្រើប្រាស់ផលិតផលទាំងនោះទេ៕
Related Posts
- September 5, 2023
- January 20, 2023
- January 10, 2023
- December 19, 2022
