របាយការណ៍ថ្មីមួយដែលចេញផ្សាយកាលពីថ្ងៃច័ន្ទបានឱ្យដឹងថា ១៦ ភាគរយនៃគ្រួសារនៅកម្ពុជាមិនមានលទ្ធភាពទិញរបបអាហារដែលមានជីវជាតិគ្រប់គ្រាន់ ដោយលើកឡើងពីសារៈសំខាន់នៃកម្មវិធីគាំពាសង្គមក្នុងការជួយដល់ពួកគេបន្ថែមទៀត។
រៀបចំឡើងដោយក្រុមប្រឹក្សាអភិវឌ្ឍន៍កសិកម្ម និងជនបទ ដោយមានការគាំទ្រពីកម្មវិធីស្បៀងអាហារពិភពលោក (WFP) និងមូលនិធិកុមាររបស់អង្គការសហប្រជាជាតិ (UNICEF) របាយការណ៍ដែលមានចំណងជើងថា Fill the Nutrient Gap analysis បានរកឃើញថារបបអាហារបច្ចុប្បន្ននៅមិនទាន់គ្រប់គ្រាន់នៅឡើយដែលរួមចំណែកធ្វើអោយមានបញ្ហាកង្វះអាហារូបត្ថម្ភ។
របាយការណ៍ដែលបានចេញផ្សាយដើម្បីប្រារព្ធទិវាជាតិអាហារូបត្ថម្ភលើកទី១០ របស់កម្ពុជាបានអោយដឹងថា កង្វះអាហារូបត្ថម្ភបានបង្កើនហានិភ័យនៃជំងឺមិនឆ្លង បន្ថែមបន្ទុកផ្នែកសេដ្ឋកិច្ចដែលគិតជាទឹកប្រាក់មានចំនួនរហូតដល់១.៥ ពាន់លានដុល្លារអាមេរិកក្នុងមួយឆ្នាំ ឬស្មើ៦.៦ ភាគរយនៃផលិតផលក្នុងស្រុកសរុប។
ជិត៨០ ភាគរយនៃកាឡូរីបានមកពីអង្ករ និងស្ករ ដោយមិនមានអាហារសម្បូរសារធាតុចិញ្ចឹម។
លោក Sok Silo អគ្គលេខាធិការ CARD បាននិយាយថា «ខណៈដែលភាពស្គាំស្គាំងកើតឡើងលើកុមារនៅតែបន្តកើនឡើង កង្វះអាហារូបត្ថម្ភនៅតែបញ្ហាប្រឈម។ រដ្ឋាភិបាលកម្ពុជានឹងផ្តល់អាទិភាពដល់ការពង្រឹងប្រព័ន្ធអាហារដើម្បីដោះស្រាយបញ្ហាទាំងនេះដូចដែលបានបញ្ជាក់នៅក្នុងយុទ្ធសាស្ត្របញ្ចកោណដែលលើកឡើងពីសារៈសំខាន់នៃការគាំពារសង្គម ការថែទាំសុខភាពសកល ការសម្របខ្លួននិងការកាត់បន្ថយការប្រែប្រួលអាកាសធាតុ »។
Will Parks តំណាងអង្គការយូនីសេហ្វប្រចាំកម្ពុជា បាននិយាយថា អាហារូបត្ថម្ភល្អ គឺជាមូលដ្ឋានគ្រឹះនៃការរស់រានមានជីវិត ការលូតលាស់ និងការអភិវឌ្ឍន៍របស់កុមារ។
លោកបានបន្តថា “កុមារដែលមានអាហារូបត្ថម្ភល្អ ប្រកបដោយគុណភាព និងជីវជាតិល្អ អាចផ្តោតលើការសិក្សានិងចូលរួមជាមួយសហគមន៍របស់ពួកគេបានប្រសើរ។ ពួកគេក៏មានភាពធន់ទៅនឹងការឆ្លងនៃជំងឺផងដែរ” ។
របាយការណ៍ក៏បានបង្ហាញផងដែរថា ភាពងាយរងគ្រោះរបស់កម្ពុជាចំពោះការប្រែប្រួលអាកាសធាតុធ្វើឱ្យរបបអាហារដែលមានសុខភាពល្អជួយប្រទះហានិភ័យ និងគំរាមកំហែងដល់ការអភិវឌ្ឍន៍ប្រទេស។
បើនិយាយពីការប្រែប្រួលអាកាសធាតុ របាយការណ៍នេះបានរំលេចទៀតថា តម្លៃអាហារទំនងជាកើនឡើង១០ ភាគរយនៅឆ្នាំ២០៣០ និង២០ ភាគរយនៅឆ្នាំ២០៥០ដែលធ្វើអោយកាន់តែពិបាកសម្រាប់អ្នកងាយរងគ្រោះក្នុងការទទួលបានអាហារដែលមានគុណភាព។
របាយការណ៍នេះបានផ្តល់នូវវិធានការមួយចំនួនដែលកម្ពុជាអាចពិចារណាដើម្បីកែលម្អរបបអាហារ រួមទាំងការពង្រឹងផ្នែកចំណីអាហារ អត្ថប្រយោជន៍ផ្ទេរសាច់ប្រាក់ ការផ្តល់អាហារតាមសាលារៀន ការផ្លាស់ប្តូរអាកប្បកិរិយាសង្គមចំពោះរបបអាហារដែលមានគុណភាពសម្រាប់ប្រជាជនទាំងអស់ និងបទប្បញ្ញត្តិស្តីពីអាហារដែលមិនមានគុណភាពចំណីអាហារកែឆ្នៃ និងភេសជ្ជៈក្នុងចំណោមកត្តាផ្សេងទៀត។Xinhua