យោងតាមរបាយការណ៍ពីអគ្គនាយកដ្ឋានគយ និងរដ្ឋាករកាលពីថ្ងៃចន្ទ បានឱ្យដឹងថា ការនាំចូលប្រេង និងឧស្ម័នរបស់កម្ពុជាសរុបមានចំនួន ២,២៨ពាន់លានដុល្លារ ក្នុងអំឡុងខែមករាដល់ខែសីហាឆ្នាំនេះ ធ្លាក់ចុះ ៩,៥ ភាគរយធៀបនឹងឆ្នាំមុន។

ដោយសារកម្ពុជាពឹងផ្អែកខ្លាំងលើការនាំចូលប្រេង និងឧស្ម័ន ក្រសួងរ៉ែ និងថាមពលបានព្យាករណ៍ថា តម្រូវការសម្រាប់ផលិតផលប្រេង និងឧស្ម័ននឹងកើនឡើងដល់ ៤,៨លានតោននៅឆ្នាំ ២០៣០ កើនឡើងពី ២,៨លានតោន ក្នុងឆ្នាំ២០២០។

​បច្ចុប្បន្នកម្ពុជា​នាំ​ចូល​ផលិតផល​ប្រេង​១០០%​។ ប្រភពនាំចូលភាគច្រើនគឺប្រទេសថៃ វៀតណាម និងសិង្ហបុរី។

អង្គការ OPEC រដ្ឋបាលព័ត៌មានថាមពលរបស់សហរដ្ឋអាមេរិក និងទីភ្នាក់ងារថាមពលអន្តរជាតិ សុទ្ធតែបានព្យាករណ៍ពីឱនភាពទីផ្សារកាន់តែធំនៅក្នុងត្រីមាសបន្ទាប់ ខណៈដែលប្រទេសផលិតធំៗបានរិតត្បឹតការផ្គត់ផ្គង់សកល ដោយកំណើនតម្រូវការប្រេងក្នុងពិភពលោករំពឹងថានឹងកើនឡើងក្នុងរយៈពេលដូចគ្នាដែរ។

វិធានការថ្មីៗរបស់ទីក្រុងប៉េកាំង និងការកើនឡើងទិន្នផលពីក្រុមហ៊ុនចម្រាញ់ប្រេងរបស់ចិនក៏បានជួយជំរុញដល់ទស្សនវិស័យតម្រូវការរបស់អ្នកនាំចូលប្រេងឆៅលំដាប់កំពូលរបស់ពិភពលោកផងដែរ។ ទន្ទឹមនឹងនេះ វិនិយោគិននៅតែមានការប្រុងប្រយ័ត្នមុនពេលធនាគារកណ្តាលអាមេរិកធ្វើការសម្រេចចិត្តលើគោលនយោបាយនៅសប្តាហ៍នេះ ដែលត្រូវបានគេរំពឹងថានឹងរក្សាអត្រាការប្រាក់ថេរ ប៉ុន្តែទំនងជានឹងនៅមិនមានភាពច្បាស់លាស់នោះទេ។

នៅ​តាម​ស្ថានីយ​ប្រេង​ក្នុង​ប្រទេស​កម្ពុជា​នៅ​ថ្ងៃ​ចន្ទ​នេះ សាំង​ធម្មតា​តម្លៃ ៤៦៤៦ រៀល (១,១២ ដុល្លារ) ក្នុង​មួយ​លីត្រ ខណៈ​ប្រេងម៉ាស៊ូត​តម្លៃ ៤៧៨៦ រៀល (១,១៥ ដុល្លារ) ក្នុង​មួយ​លីត្រ។ Xinhua/Khmer Times