ក្រសួងសេដ្ឋកិច្ច និងហិរញ្ញវត្ថុ នឹងសហការជាមួយក្រសួងសាធារណការ និងដឹកជញ្ជូន និងក្រសួងទេសចរណ៍ រៀបចំសិក្ខាសាលាពិគ្រោះយោបល់ជាមួយវិនិយោគិនលើ «ការអនុវត្តផ្នែកប្រតិបត្តិការ និងការថែទាំ (Operation and Maintenance – O&M) គម្រោងកំពង់ផែទេសចរណ៍ខេត្តកំពត ក្រោមយន្តការភាពជាដៃគូរវាងរដ្ឋ និងឯកជន»។
សិក្ខាសាលាពិគ្រោះយោបល់នេះ នឹងប្រព្រឹត្តទៅនៅថ្ងៃទី១៧ ខែសីហា ឆ្នាំ២០២៣ នៅសណ្ឋាគារ ហៃយ៉ាត់ រីជិនស៊ី ភ្នំពេញនិង តាមរយៈប្រព័ន្ធវីដេអូ ដោយមានការអញ្ជើញចូលរួម ពីវិស័យឯកជន ដូចជាប្រតិបត្តិករ កំពង់ផែទេសចរណ៍ក្នុងស្រុក តំបន់ និងអន្តរជាតិ ក៏ដូចជាក្រុមហ៊ុននាវាចរណ៍ និងក្រុមហ៊ុនវិនិយោគឯកជននានា ។
កិច្ចពិគ្រោះនេះ ដើម្បីបង្កើតជាឱកាសក្នុងការពិភាក្សា និងផ្តល់មតិយោបល់លើការគម្រោងអភិវឌ្ឍន៍កំពង់ផែទេសចរណ៍ខេត្តកំពត សម្រាប់គោលដៅនៃការអភិវឌ្ឍវិស័យ
ទេសចរណ៍ នៅតំបន់ឆ្នេរសមុទ្រក្នុងខេត្តកំពត ខេត្តកែប និងតភ្ជាប់គោលដៅទេសចរណ៍ ពីកម្ពុជាទៅកោះត្រល់
(Phu Quoc) និងប្រជុំកោះនានាជុំវិញតំបន់ជាប់សមុទ្រ។
សិក្ខាសាលាពិគ្រោះយោបល់នេះ នឹងផ្តល់នូវព័ត៌មានពាក់ព័ន្ធគម្រោង ព័ត៌មានទីផ្សារ តម្រូវការផ្នែកបច្ចេកទេស និងប្រតិបត្តិការ លក្ខខណ្ឌនៃការដេញថ្លៃ និងក្របខណ្ឌពេលវេលា ក្នុងការរៀបចំអភិវឌ្ឍគម្រោងកំពង់ផែទេសចរណ៍ខេត្តកំពត។
យោងតាមរបាយការណ៍ ហេដ្ឋារចនា
សម្ព័ន្ធដែលត្រូវសាងសង់ រួមមាន៖ កំពង់ផែប្រវែងជាង
១២៣ម៉ែត្រ មានទទឹងជាង ១១ម៉ែត្រ, អគារអ្នកដំណើរ និងភោជនីយដ្ឋាន ផ្លូវ អគារប្រមូលសំរាម អគារបច្ចេកទេស បន្ទប់ទឹកសាធារណៈ អាងស្តុកទឹក ស្រះទឹក និងប្រព័ន្ធហេដ្ឋារចនាសម្ព័ន្ធមួយចំនួនទៀត។
កំពង់ផែទេសចរណ៍ខេត្តកំពត បានសាងសង់ឡើងក្រោមកម្ចីថវិការបស់ ធនាគារអភិវឌ្ឍន៍អាស៊ី ADB ប្រមាណ ២០ លានដុល្លារអាមេរិក។ កំពង់ផែនេះ ដើរតួនាទីសំខាន់ សម្រាប់តភ្ជាប់ដំណើរទេសចរណ៍តាមសមុទ្រនៅកម្ពុជា និងជាមួយប្រទេសជិតខាង។ កំពង់ផែស្ថិតនៅជាប់នឹងដងព្រែក ដែលជាដៃសមុទ្រ ស្ថិតក្នុងស្រុកទឹកឈូចម្ងាយប្រមាណ ៦គីឡូម៉ែត្រ ពីក្រុងកំពត។ កំពង់ផែទេសចរណ៍សមុទ្រមួយនេះ សាងសង់ឡើងលើដីទំហំជាង ៤ ហិកតា ត្រូវបានចាប់ផ្តើមសាងសង់កាលពីឆ្នាំ២០១៨ ហើយបញ្ចប់ការសាងសង់ទាំងស្រុងនៅថ្ងៃខែមិថុនា ឆ្នាំ២០២២។
យោងតាមក្រសួងទេសចរណ៍ ខេត្តកំពតចាប់ផ្តើមមានភាពប្រសើរឡើង ហើយសេវាកម្មទេសចរណ៍ក៏ចាប់ផ្តើមកើនឡើង ដើម្បីតាមតម្រូវការកើនឡើង។ ខេត្តជាប់មាត់សមុទ្រមានរមណីយដ្ឋានទេសចរណ៍ចំនួន ២១ សហគមន៍ទេសចរណ៍ចំនួន ៤ និងកន្លែងបោះជំរំចំនួន ៥៕
ប្រែសម្រួលដោយ៖ សុ ជាតា