មន្ត្រីចិនបានសន្យាពង្រឹងកិច្ចសហប្រតិបត្តិការរវាងកម្ពុជា និងចិនបន្ថែមទៀត ជាមួយនឹងការប្តេជ្ញាចិត្តយ៉ាងមុតមាំក្នុងការកសាងសហគមន៍វាសនារួមចិន-កម្ពុជា នៅក្នុងយុគសម័យថ្មី។
នេះលើកឡើងដោយលោកស្រីZhong Jieទីប្រឹក្សាសេដ្ឋកិច្ច និងពាណិជ្ជកម្ម អមស្ថានទូតចិនប្រចាំកម្ពុជាក្នុងជំនួបសម្តែងការគួរសមជាមួយឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី កាលពីថ្ងៃទី៩។
នៅក្នុងជំនួបនោះ ភាគីទាំងពីរបានកត់សម្គាល់ពីយុទ្ធសាស្ត្របញ្ចកោណ របស់រាជរដ្ឋាភិបាលកម្ពុជា ដំណាក់កាលទី១ និងគោលនយោបាយអភិវឌ្ឍន៍ ដើម្បីទាញយកប្រយោជន៍ពីយុទ្ធសាស្ត្រទាំងនេះ សម្រាប់ប្រជាជននៃប្រទេសទាំងពីរ។
ឯកឧត្តម វង្សី វិស្សុត បានសង្កត់ធ្ងន់លើកិច្ចសហប្រតិបត្តិការយ៉ាងជិតស្និទ្ធ និងជាប្រពៃណីរវាងរដ្ឋាភិបាលនៃសាធារណៈរដ្ឋប្រជាមានិតចិន និងរាជរដ្ឋាភិបាលកម្ពុជា ដែលសម្រេចបាននូវលទ្ធផលគួរជាទីមោទនៈលើគ្រប់វិស័យ ជាពិសេសលើវិស័យសេដ្ឋកិច្ច និងពាណិជ្ជកម្ម ការវិនិយោគ និងទំនាក់ទំនងរវាងប្រជាជន និងប្រជាជន។
ឯកឧត្តមបានបន្តថា កិច្ចសហប្រតិបត្តិការក្រោមក្របខណ្ឌនៃគំនិតផ្តួចផ្តើមខ្សែក្រវាត់ និងផ្លូវ ដែលមិនត្រឹមតែជាគម្រោងកសាងហេដ្ឋារចនាសម្ព័ន្ធតភ្ជាប់ប៉ុណ្ណោះទេ ប៉ុន្តែថែមទាំងដើរតួនាទីយ៉ាងសំខាន់ក្នុងការតភ្ជាប់គោលនយោបាយអភិវឌ្ឍន៍ និងសេដ្ឋកិច្ចពាណិជ្ជកម្មរវាងប្រជាជន និងប្រជាជន និងស្ថាប័ននៃប្រទេសទាំងពីរ។
ឯកឧត្តមក៏បានសម្តែងសុទិដ្ឋិនិយមចំពោះសក្តានុពល និងផ្លែផ្កាដែលអាចសម្រេចបានក្រោមភាពជាដៃគូដ៏ជិតស្និទ្ធនេះ ដោយចាប់យកឱកាសដើម្បីលើកកម្ពស់កិច្ចសហប្រតិបត្តិការ និងភាពជាដៃគូយុទ្ធសាស្ត្រ និងគ្រប់ជ្រុងជ្រោយរវាងកម្ពុជា និងចិន ក្នុងក្របខ័ណ្ឌនៃការអនុវត្តផែនការសកម្មភាពកសាងសហគមន៍វាសនារួម កម្ពុជា-ចិន ក្នុងយុគសម័យថ្មី។
ភាគីទាំងពីរក៏បានសង្កត់ធ្ងន់លើការរួមគ្នាអនុវត្តកិច្ចសហប្រតិបត្តិការទ្វេភាគី “ត្បូងពេជ្រ” និងការលើកកម្ពស់ “ច្រករបៀងអភិវឌ្ឍន៍ឧស្សាហកម្ម” និង “ច្រករបៀងត្រី និងស្រូវ” ជាមួយប្រទេសចិន ដើម្បីធ្វើអោយកាន់តែប្រសើរឡើងនូវសមត្ថភាពអភិវឌ្ឍន៍របស់កម្ពុជា។AKP-CheaVannak