ព្រះរាជាណាចក្រកម្ពុជា និងសាធារណរដ្ឋឆេក បានឯកភាពគ្នាជំរុញកិច្ចសហប្រតិបត្តិការលើវិស័យពាណិជ្ជកម្ម និងការវិនិយោគ ក៏ដូចជាការផ្លាស់ប្តូរទស្សនកិច្ចកម្រិតខ្ពស់បន្ថែមទៀតរវាងប្រទេសទាំងពីរ។
ឯកឧត្តម សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ និងលោក Martin Vávraឯកអគ្គរដ្ឋទូតសាធារណៈរដ្ឋឆែក ប្រចាំព្រះរាជាណាចក្រកម្ពុជា បានលើកឡើងបែបនេះក្នុងជំនួបសម្តែងការគួរសមនៅទីស្តីការក្រសួងកាលពីដើមសប្តាហ៍នេះ។
យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ភាគីទាំងពីរបានកត់សម្គាល់ដោយពេញចិត្តយ៉ាងខ្លាំងចំពោះទំនាក់ទំនងជាប្រពៃណី និងកិច្ចសហប្រតិបត្តិការដ៏ល្អរវាងប្រទេសទាំងពីរ ហើយបានគូសបញ្ជាក់ពីសារៈសំខាន់នៃការពង្រឹងកិច្ចសហប្រតិបត្តិការបន្ថែមទៀតលើវិស័យដែលជាផលប្រយោជន៍ទៅវិញទៅមក។
ឯកឧត្តមឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលឆែកក ចំពោះការផ្តល់ជំនួយ និងការគាំទ្រកម្ពុជា ដែលនេះបានរួមចំណែកគួរឱ្យកត់សម្គាល់ក្នុងការអភិវឌ្ឍសេដ្ឋកិច្ចសង្គមរបស់ខ្លួន រួមទាំងការអប់រំ សុខាភិបាល ក៏ដូចជាវិស័យផ្សេងៗទៀត។AKP-C.Nika