នៅថ្ងៃទី១៧ ខែវិច្ឆិកា លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានទទួលជួបពិភាក្សាការងារ ជាមួយ លោក Stefan Messerer ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសហព័ន្ធអាល្លឺម៉ង់ ប្រចាំនៅកម្ពុជា ដើម្បីពិភាក្សាអំពីកិច្ចសហប្រតិបត្តិការលើវិស័យអភិវឌ្ឍន៍ជនបទនៅទីស្តីការក្រសួង។

លោករដ្ឋមន្ត្រីបានជម្រាបជូនឯកអគ្គរដ្ឋទូតអាឡឺម៉ង់អំពីអាទិភាពរបស់ក្រសួង ដោយអនុវត្តតាមចក្ខុវិស័យរបស់ខ្លួនស្របតាមយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល ដែលរួមមានការពង្រីកហេដ្ឋារចនាសម្ព័ន្ធផ្លូវជនបទ និងការដឹកជញ្ជូន ការទទួលបានសេវាសាធារណៈកាន់តែប្រសើរ ដូចជាសុខភាព និងអនាម័យនៅក្នុងសហគមន៍ជនបទ និងការធ្វើពិពិធកម្មសេដ្ឋកិច្ចជនបទតាមរយៈការបណ្តុះបណ្តាលជំនាញ និងការបង្កើតការងារសម្រាប់យុវជន។

ក្រៅពីនេះ ការពង្រឹងសេវារដ្ឋបាលថ្នាក់មូលដ្ឋាន ការកសាងសមត្ថភាពស្ថាប័នថ្នាក់ក្រោមជាតិ និងអភិបាលកិច្ចល្អក៏ជាអាទិភាពរបស់ក្រសួងផងដែរ។

ឯកអគ្គរដ្ឋទូត Messerer បានវាយតម្លៃខ្ពស់ចំពោះអាទិភាពរបស់ក្រសួង ក៏ដូចជាយុទ្ធសាស្រ្តបញ្ចកោណដំណាក់កាលទី១ ហើយបានបញ្ជាក់សារជាថ្មីនូវការប្តេជ្ញាចិត្តរបស់គាត់ក្នុងការគាំទ្របន្ថែមទៀតដល់កិច្ចសហប្រតិបត្តិការជាមួយក្រសួងអភិវឌ្ឍន៍ជនបទ។ AKP