លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជាបានលើកឡើងថា រាជរដ្ឋាភិបាលកម្ពុជា មានបំណងប្រែក្លាយខេត្តព្រះសីហនុ អោយទៅជាទីក្រុង Shenzhen ទី២ ដោយកាត់បន្ថយការចំណាយលើការដឹកជញ្ជូន ការផ្តល់កញ្ចប់លើកទឹកចិត្តវិនិយោគ និងពង្រឹងការអភិវឌ្ឍន៍ធនធានមនុស្ស ដើម្បីទាក់ទាញអ្នកវិនិយោគ។
Shenzhen គឺជាទីក្រុងទំនើបនៅភាគអាគ្នេយ៍នៃប្រទេសចិន គឺជាទីក្រុងដែលមានប្រជាជនច្រើនជាងគេទីបីបន្ទាប់ពីទីក្រុងសៀងហៃ និងទីក្រុងប៉េកាំង។ ទីក្រុងនេះក៏ជាមជ្ឈមណ្ឌលបច្ចេកវិទ្យាពិភពលោកទំនើបបំផុតមួយផងដែរ ហើយត្រូវបានគេហៅថា Silicon Valley របស់ប្រទេសចិន។
ថ្លែងក្នុងសិក្ខាសាលាស្តីពី “ការផ្សព្វផ្សាយច្បាប់វិនិយោគ និងអនុក្រឹត្យស្តីពីការអនុវត្តច្បាប់ស្តីពីការវិនិយោគ” នៅរាជធានីភ្នំពេញ នៅថ្ងៃចន្ទនេះ លោក ស៊ុន ចាន់ថុល បាននិយាយថា រាជរដ្ឋាភិបាលក្រោមការដឹកនាំរបស់លោកនាយករដ្ឋមន្ត្រី ហ៊ុន ម៉ាណែត បានដាក់ចេញនូវអាទិភាពក្នុងការ អភិវឌ្ឍភស្តុភារ និងតភ្ជាប់ហេដ្ឋារចនាសម្ព័ន្ធទូទាំងប្រទេស ដូចជាគម្រោងព្រែកជីកហ្វូណន ដែលនឹងតភ្ជាប់ទន្លេជាមួយសមុទ្រ ដើម្បីសម្រួល និងកាត់បន្ថយថ្លៃដឹកជញ្ជូនតាមផ្លូវទឹក។
លោកបានបន្ថែមថា ក្រៅពីនេះ រដ្ឋាភិបាលក៏កំពុងធ្វើការកែលម្អផ្លូវរថភ្លើងភ្នំពេញ-ប៉ោយប៉ែត ដើម្បីធ្វើយ៉ាងណាឱ្យរថភ្លើងអាចរត់ក្នុងល្បឿន ៨០ គីឡូម៉ែត្រក្នុងមួយម៉ោង ដែលមានសមត្ថភាពដឹកទំនិញបានប្រហែល ២០ តោនសម្រាប់កុងតឺន័រនីមួយៗ។
ចាប់តាំងពីរមានរដ្ឋាភិបាលថ្មី យើងអាចមើលឃើញថាការដឹកជញ្ជូនតាមផ្លូវអាកាសបាននិងកំពុងផ្លាស់ប្តូរទៅជាលំដាប់ 4E បច្ចុប្បន្នយន្តហោះអាចហោះហើរត្រង់មកកម្ពុជា ដូចជាអាកាសយានដ្ឋានអន្តរជាតិសៀមរាប (SIA) និងប្រតិបត្តិការអាកាសយានដ្ឋានអន្តរជាតិតេជោ (TIA) ក្នុងឆ្នាំ ២០២៥។
លោកបញ្ជាក់ថា រាជរដ្ឋាភិបាលក៏មានគម្រោងពង្រីកព្រលានយន្តហោះអន្តរជាតិខេត្តព្រះសីហនុ ផងដែរ។ លោកបានបន្តថា “ រដ្ឋាភិបាលចង់ប្រែក្លាយខេត្តព្រះសីហនុទាំងមូលអោយដូចជាទីក្រុង Shenzhen ហើយផែនការមេនេះនឹងពង្រីកដល់ខេត្តជាប់មាត់សមុទ្រទាំងអស់ រួមមានខេត្តកោះកុង កែប និងកំពត”។
“ដើម្បីសម្រេចបាននូវទស្សនវិស័យនេះ រាជរដ្ឋាភិបាលត្រូវការកិច្ចសហប្រតិបត្តិការ និងការវិនិយោគពីវិស័យឯកជន។ ដូច្នេះហើយ រដ្ឋាភិបាលបានដាក់ចេញនូវកញ្ចប់លើកទឹកចិត្ត ដើម្បីទាក់ទាញអ្នកវិនិយោគចូលមកក្នុងខេត្តព្រះសីហនុ ខណៈដែលច្បាប់វិនិយោគនេះនឹងជួយពន្លឿនដំណើរការប្រតិបត្តិការរបស់ពួកគេ»។
លោកក៏បានជម្រាបអ្នកវិនិយោគអន្តរជាតិថា ការវិនិយោគនៅកម្ពុជា មិនមែនគ្រាន់តែវិនិយោគជាមួយប្រជាជន ១៧ លាននាក់ក្នុងប្រទេសនោះទេ កម្ពុជាស្ថិតនៅទីតាំងយុទ្ធសាស្ត្រដែលតភ្ជាប់ពាណិជ្ជកម្មជាមួយអាស៊ី អាស៊ាន+៥ ជាសមាជិកកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP)និងតាមរយៈ ពន្ធអនុគ្រោះ (EBA) និងកូតាសម្រាប់ការនាំចូលទំនិញចូលសហភាពអឺរ៉ុបពីប្រទេសអភិវឌ្ឍន៍តិចតួច។
លោកបានបន្ថែមថា “យុវជនកម្ពុជាអាយុក្រោម ២៥ឆ្នាំ មានចំនូនច្រើនបើធៀបទៅនឹងប្រទេសផ្សេងទៀតនៅក្នុងតំបន់អាស៊ាន ដែលមានប្រមាណ ៦០ ភាគរយនៃចំនួនប្រជាជនសរុប មានន័យថា ធនធានមនុស្សរបស់ប្រទេសនេះមានសមត្ថភាពធ្វើការរហូតដល់ ៣០ ឆ្នាំខាងមុខ។
លោក ឡោ វិចិត្រ អនុប្រធានសមាគមពាណិជ្ជកម្មចិនកម្ពុជា បានប្រាប់កាសែតខ្មែរថាមស៍ថា ដើម្បីជំរុញការទាក់ទាញវិនិយោគនៅក្នុងខេត្តព្រះសីហនុ រដ្ឋាភិបាលគួរតែសម្រួលនីតិវិធីគយ និងប្រើប្រាស់បច្ចេកវិទ្យាដើម្បីបង្កើនប្រសិទ្ធភាពនីតិវិធីនាំចេញ ក៏ដូចជាអភិវឌ្ឍធនធានមនុស្សទៅជាជំនាញកម្រិតមធ្យម និងកម្រិតខ្ពស់ដែលអាច ឆ្លើយតបទៅនឹងតម្រូវការនៃឧស្សាហកម្មនាំចេញ និងផលិតកម្ម។
កញ្ចប់លើកទឹកចិត្តដាក់ចេញដោយរដ្ឋាភិបាល នាពេលថ្មីៗនេះ បង្ហាញសញ្ញាវិជ្ជមានថា យើងកំពុងដើរលើផ្លូវត្រូវ។ លោកបានបន្ថែមថា ជាលទ្ធផលក្នុងរយៈពេលបីខែដំបូង កម្ពុជាបានទាក់ទាញការវិនិយោគផ្ទាល់ពីបរទេស (FDI) សរុបជាង២ ពាន់លានដុល្លារ។