ព្រះមហាក្សត្រ នរោត្តម សីហមុនី បានចេញព្រះរាជសារអបអរសាទរទិវាព្រះពុទ្ធសាសនាអន្តរជាតិដែលប្រារព្ធធ្វើពីម្សិលមិញ។ នៅក្នុងព្រះរាជសារនោះ ព្រះមហាក្សត្របានជំរុញការផ្សព្វផ្សាយ «ពុទ្ធឱវាទ» ឱ្យបានទូលំទូលាយនិងកាន់តែផុសផុលឡើង ដើម្បីបុព្វហេតុនៃការរីកចម្រើនព្រះពុទ្ធសាសនា និងការកសាងសន្តិភាពនៅក្នុងសង្គមជាតិកម្ពុជា។
ព្រះមហាក្សត្រ នរោត្តម សីហមុនី មានព្រះបន្ទូលថា ទិវាព្រះពុទ្ធសាសនាអន្តរជាតិប្រារព្ធឡើងដើម្បីឯកភាពនិងសាមគ្គីភាពរវាងនិកាយទាំងអស់នៃព្រះពុទ្ធសាសនា និងដឹកនាំពុទ្ធបរិស័ទគ្រប់និកាយត្រឡប់ទៅបតិបត្តិខ្ជាប់ខ្ជួនតាមពាក្យប្រៀនប្រដៅដើមដំបូងរបស់ព្រះសម្មាសម្ពុទ្ធ។
ព្រះមហាក្សត្របានជំរុញថា៖ «សូមមានការផ្សព្វផ្សាយព្រះពុទ្ធឱវាទឱ្យទូលំទូលាយនិងកាន់តែសកម្មផុសផុលឡើង ដើម្បីបព្វហេតុនៃការរីកចម្រើនព្រះពុទ្ធសាសនានិងការកសាងសន្តិភាពនៅក្នុងសង្គមជាតិយើងនិងនៅលើសាកលលោកទាំងមូល»។
ក្រសួងធម្មការនិងសាសនានិងក្រសួងស្ថាប័នពាក់ព័ន្ធបានធ្វើពិធីប្រារព្ធទិវាព្រះពុទ្ធសាសនាអន្តរជាតិពីម្សិលមិញ ដើម្បីរំលឹកព្រះរាជបូជនីយកិច្ចរបស់ព្រះមហាក្សត្រ នរោត្តម សីហមុនី ដែលបានទទួលព្រះរាជបរមងារកិត្តិយសជា“ព្រះស្រីលោកធម្មិករាជ“ នៅប្រទេសជប៉ុនកាលពីឆ្នាំ២០១៤។
ព្រះបរមងារកិត្តិយសដែលព្រះមហាក្សត្របានទទួលនោះមានន័យថា៖ «ព្រះរាជាមានគុណធម៌ដ៏ខ្ពង់ខ្ពស់បំផុត ជាគំរូក្នុងការប្រតិបត្តិនិងផ្សព្វផ្សាយព្រះធម៌ព្រះពុទ្ធលើសកលលោក»។
សម្រាប់ក្រសួងធម្មការនិងសាសនា នេះជាភស្តុតាងយ៉ាងប្រត្យក្ស ដើម្បីរំលឹកព្រះរាជសកម្មភាពរបស់ព្រះមហាក្សត្រដែលបានបំពេញចំពោះប្រទេសជាតិនិងព្រះពុទ្ធសាសនា។
បន្ថែមលើសពីនេះ ការប្រារព្ធទិវាព្រះពុទ្ធសាសនាអន្តរជាតិ គឺជាការរួមចំណែកជំរុញការផ្សព្វផ្សាយ ការផ្ទេរចំណេះដឹង ការក្រើនរំលឹក បំផុសស្មារតី និងមនសិការដល់ប្រជាពលរដ្ឋទាំងអស់។
លោក ចាយ បូរិន រដ្ឋមន្ត្រីក្រសួងធម្មការនិងសាសនាមានប្រសាសន៍ថា រដ្ឋាភិបាលកម្ពុជាបានលើកកម្ពស់ការយល់ដឹង និងជំរុញតួនាទីព្រះពុទ្ធសាសនាក្នុងការចូលរួមអប់រំសីលធម៌ គុណធម៌ សុជីវធម៌ និងការបំផុស គំនិតច្នៃប្រឌិត ដើម្បីចូលរួមលើកកម្ពស់សង្គមជាតិ។
ព្រះតេជគុណ ឃឹម សន ប្រធានលេខាធិការដ្ឋានគណៈសង្ឃនាយកកម្ពុជា បានមានថេរដីកាថា ការប្រារព្ធទិវាព្រះពុទ្ធសាសនាអន្តរជាតិ គឺជាការកំណត់ដោយអ្នកកាន់ព្រះពុទ្ធសាសនានៅលើកពិភពលោក ដើម្បីថ្លែងសារទៅកាន់ពុទ្ធសាសនិកទាំងអស់នៅលើពិភពលោក ជាពិសេសថ្លែងសារថ្វាយព្រះមហាក្សត្រនិងរំលឹកនឹកឃើញថ្នាក់ដឹកនាំប្រទេសជាដើម។ ព្រះតេជគុណបានបញ្ជាក់ថា ទិវាព្រះពុទ្ធសាសនាអន្តរជាតិត្រូវបានកំណត់នៅក្នុងកិច្ចប្រជុំកំពូលព្រះពុទ្ធសាសនាពិភពលោកលើកទី៦ របស់អ្នកគោរពព្រះពុទ្ធសាសនាទាំង៤១ប្រទេសតំណាងពុទ្ធសាសនិកជន៥១០លាននាក់នៅទូទាំងពិភពលោកកាលពីឆ្នាំ២០១៤ ដែលប្រារព្ធធ្វើនៅប្រទេសជប៉ុន។ ការកំណត់នេះធ្វើឡើងជាមួយនឹងការថ្វាយព្រះព្រះរាជគោរមងារកិត្តិយសជា «ព្រះស្រីលោកធម្មិករាជ» ចំពោះព្រះមហាក្សត្រ នរោត្តម សីហមុនី។
ព្រះតេជគុណបានបន្ថែមថា៖ «កម្ពុជាជាប្រទេសកាន់ព្រះពុទ្ធសាសនា ប៉ុន្តែប្រសិនបើពុទ្ធសាសនិកយល់អំពីគោលបំណងឬទ្រឹស្ដីជាក់លាក់ដែលព្រះពុទ្ធបានត្រាស់សម្ដែង ដូចជាការហាមប្រព្រឹត្តអំពើអាក្រក់ទាំងពួង ហើយធ្វើតែសេចក្ដីល្អ ចេះអប់រំចិត្តឱ្យល្អជាដើម គឺជាការចូលរួមចំណែកក្នុងសង្គម»។
ព្រះតេជគុណ ឃឹម សន បានអំពាវនាវដល់ព្រះសង្ឃគ្រប់អង្គថា នៅក្នុងថ្ងៃនេះជាការប្រារព្ធទិវាព្រះពុទ្ធសាសនាអន្តរជាតិ ព្រះសង្ឃគ្រប់អង្គនិងពុទ្ធសាសនិកទាំងអស់បានចងចាំក្នុងចិត្តទាំងអស់គ្នា ហើយរួបរួមគ្នា្ផផ្សព្វផ្សាយនូវពុទ្ធឱវាទរបស់ព្រះសម្មាសម្ពុទ្ធទៅដល់មនុស្សទូទៅ ជាពិសេសអ្នករស់នៅក្នុងព្រះរាជាណាចក្រកម្ពុជា។
ព្រះតេជគុណថា៖ «យ៉ាងហោចណាស់យើងមានសីលប្រាំទាំងអស់គ្នា ដើម្បីចូលរួមលើកស្ទួយវប្បធម៌និងសីលធម៌សង្គមរបស់យើង ក៏ដូចជាជួយដល់រាជរដ្ឋាភិបាលនិងប្រទេសជាតិរបស់យើងទាំងមូលដែរ»។
រដ្ឋធម្មនុញ្ញបានចែងថា ព្រះពុទ្ធសាសនាជាសាសនារបស់រដ្ឋ។ ប្រជាពលរដ្ឋខ្មែរទាំងពីរភេទមានសិទ្ធិពេញទីខាងជំនឿ ប៉ុន្តែសេរីភាពខាងជំងឺនិងការប្រតិបត្តិខាងផ្លូវសាសនាត្រូវបានរដ្ឋធានាក្នុងលក្ខខណ្ឌដែលមិនប៉ះពាល់ដល់ជំនឿនិងសាសនាដទៃទៀតដល់សណ្ដាប់ធ្នាប់និងសន្តិសុខសាធារណៈ។
រដ្ឋាភិបាលអាណត្តិទី៧ដឹកនាំដោយលោកនាយករដ្ឋមន្ត្រី ហ៊ុន ម៉ាណែត នៅតែប្រកាន់គោលនយោបាយធានាសិទ្ធិសេរីភាពគ្រប់សាសនាទាំងអស់។ កន្លងមកលោកបានអំពាវនាវដល់គ្រប់មជ្ឈដ្ឋានដែលកាន់សាសនាខុសគ្នានៅកម្ពុជា។
កាលពីចុងឆ្នាំ២០២៣ លោកនាយករដ្ឋមន្ត្រី ហ៊ុន ម៉ាណែត បានបញ្ជាឱ្យទប់ស្កាត់សកម្មភាពទាំងឡាយណាដែលប៉ះពាល់ដល់ការប្រតិបត្តិសាសនានៅកម្ពុជា។ លោកថារាល់ការប្រតិបត្តិសាសនាត្រូវមានមូលដ្ឋានច្បាស់លាស់។ យ៉ាងណាលោកបញ្ជាក់ថា នេះមិនមែនរដ្ឋាភិបាលបិទសិទ្ធិខាងជំនឿសាសនានៅកម្ពុជានោះឡើយ៕