លោក Anwar Ibrahim នាយករដ្ឋមន្ត្រីម៉ាឡេស៊ីបានលើកឡើងថា វៀតណាម និងកម្ពុជាបានបង្ហាញចំណាប់អារម្មណ៍ក្នុងការប្រើប្រាស់រូបិយប័ណ្ណក្នុងស្រុករបស់ពួកគេសម្រាប់ធ្វើពាណិជ្ជកម្មជាជំហានមួយដើម្បីកាត់បន្ថយការពឹងផ្អែកលើប្រាក់ដុល្លារអាមេរិក។
“ម៉ាឡេស៊ីកំពុងកាត់បន្ថយការពឹងផ្អែកយ៉ាងខ្លាំងលើប្រាក់ដុល្លារអាមេរិក ហើយរហូតមកដល់ពេលនេះយើងបានទទួលការឆ្លើយតបយ៉ាងល្អ។
លោក Anwar បានបន្តថា “តាមពិតទៅ យើងទើបតែបានចុះហត្ថលេខាលើកិច្ចព្រមព្រៀងមួយនៅអំឡុងកិច្ចប្រជុំកំពូលអាស៊ានក្នុងឆ្នាំនេះ ហើយប្រទេសទាំងពីរបានទទួលស្គាល់កិច្ចព្រមព្រៀងក្របខ័ណ្ឌទូទាត់រូបិយប័ណ្ណក្នុងស្រុក (LCSF) ដែលត្រូវបានចុះហត្ថលេខានាពេលថ្មីៗនេះ” ។
លោកបានអោយដឹងទៀតថា នាយករដ្ឋមន្ត្រីវៀតណាមលោក Pham Minh Chinhក៏បានណែនាំឱ្យពន្លឿនការចរចាស្តីពីការប្រើប្រាស់រូបិយប័ណ្ណក្នុងស្រុកសម្រាប់ធ្វើពាណិជ្ជកម្មផងដែរ។
វៀតណាមគឺជាដៃគូពាណិជ្ជកម្មធំបំផុតទី១០ របស់ម៉ាឡេស៊ី។
លោកបានឆ្លើយតបទៅនឹងសំណួរទាក់ទងនឹងផែនការចុងក្រោយបង្អស់ស្តីពីវិធីសាស្រ្តកាត់បន្ថយការពឹងផ្អែកលើប្រាក់ដុល្លារអាមេរិក ដើម្បីលើកទឹកចិត្តដល់ការធ្វើពាណិជ្ជកម្មរវាងប្រទេសនានាដោយប្រើរូបិយប័ណ្ណរីងហ្គីត និងតើគំនិតផ្តួចផ្តើមនេះត្រូវបានស្វាគមន៍ដោយប្រទេសក្នុងតំបន់ក្នុងកម្រិតណា។
លោក Anwar បានបន្ថែមថាសិង្ហបុរី ដែលជាដៃគូពាណិជ្ជកម្មដ៏សំខាន់របស់ប្រទេសក្នុងអាស៊ាន មិនបានបង្ហាញពីចំណាប់អារម្មណ៍ក្នុងការប្រើប្រាស់រូបិយប័ណ្ណក្នុងស្រុកសម្រាប់ធ្វើពាណិជ្ជកម្មនោះទេ។
“ដោយប្រាក់ដុល្លារអាមេរិកនៅតែរឹងមាំសម្រាប់ធ្វើការជួញដូរក្នុងវិស័យពាណិជ្ជកម្ម ដូច្នេះប្រទេសនានានៅតែជ្រើសរើសប្រើប្រាស់ប្រាក់ដុល្លារអាមេរិក។
លោកបានបន្ថែមថា ” ប្រទេសជប៉ុន ហុងកុង និងកូរ៉េខាងត្បូងមិនបាបង្ហាញចំណាប់អារម្មណ៍ក្នុងបញ្ហានេះទេ ខណៈដែល ឥណ្ឌានៅតែដាក់កំហិតលើប្រាក់រូពីនៅបរទេស លើកលែងតែពលរដ្ឋ ដូច្នេះការចរចាអាចត្រូវការពេលវេលា” ។
ប៉ុន្តែលោកជឿជាក់ថាភាពជោគជ័យរបស់អាស៊ាន និងចិនក្នុងការប្រើប្រាស់រូបិយប័ណ្ណក្នុងស្រុកអាចលើកទឹកចិត្តប្រទេសផ្សេងទៀតឱ្យចូលរួមដោយទាញយកអត្ថប្រយោជន៍ពីចំពេលប្រទេសមួយចំនួនមានទំនោរឈប់ប្រើប្រាស់ប្រាក់ដុល្លារអាមេរិក។
លោកក៏បានស្វាគមន៍ចំពោះសំណើប្រើប្រាស់រូបិយប័ណ្ណDinarដើម្បីពង្រឹងពាណិជ្ជកម្ម និងសេដ្ឋកិច្ចជាមួយប្រទេសពាក់ព័ន្ធ។
“ខណៈដែលទីផ្សារឧស្សាហកម្មម្ហូបហាឡាលកើនឡើងដល់ជាង១ទ្រ៊ីលានដុល្លារ បណ្តាប្រទេសមូស្លីមបានដឹងពីតម្រូវការប្រើប្រាស់រូបិយប័ណ្ណdinar រួចហើយ ប៉ុន្តែចាប់តាំងពីទសវត្សរ៍ទី៩០ មក មិនទាន់ដាក់ចេញនូវយន្តការណាមួយឡើយ។
លោកបាននិយាយទៀតថា “នេះគឺជាប្រធានបទមួយដែលនឹងត្រូវពិភាក្សាក្នុងអំឡុងកិច្ចប្រជុំស្តីពីសេដ្ឋកិច្ច និងហិរញ្ញវត្ថុឥស្លាមនៅទីក្រុងគូឡាឡាំពួក្នុងខែធ្នូ។Bernama